Demographie vu Lëtzebuerg

D'Demographie vu Lëtzebuerg zeechent sech duerch e kontinuéierleche Bevëlkerungswuesstem aus. D'Zuel vun den Awunner am Land louch den 1. Januar 2024 bei 672.050 Leit, 1,7 % méi wéi dat Joer virdrun. Dës Steigerung ass manner héich wéi nach am Joer 2022 (Erhéijung vun 2,4 %), e Joer dat vun der Arrivée vu villen ukrainesche Krichsflüchtlinge gepräägt war. Dëse Wuesstemstaux vun 1,7 % ass ee vun den niddregsten am leschte Joerzéngt (wou en tëscht 2,0 an 2,5 % variéiert huet), mat Ausnam vun de Jore vun der COVID-19-Pandemie (Wuesstemstaux an de Joren 2020 an 2021 vun 1,4 an 1,7 %).

De Bevëlkerungswuesstem ass haaptsächlech op d'Migratioun zeréckzeféieren: 26.964 Leit sinn 2023 an d'Land ukomm a 16.588 si fortgaangen. Et goufe 6.320 Puppelcher gebuer (175 manner am Verglach mat 2022). De Fruchtbarkeetstaux louch bei 1,25 Kanner pro Fra an e war zënter e puer Joerzéngten nach ni esou niddereg. 2023 si 4.431 Leit gestuerwen (18 manner wéi 2022). D'Liewenserwaardung bei der Gebuert louch bei 85,0 Joer fir d'Fraen an 81,0 Joer fir d'Männer. Am Joer 2023 louch de Gebuertebilan (Gebuert - Doudesfäll) bei 1.889 Leit, wärend de Migratiounsbilan (Arrivéeën - Departen) bei 10.376 Persoune louch.

De STATEC sammelt, analyséiert a publizéiert vun ëffentlecher Säit Zuelen iwwer d'Demographie am Land.

Bevëlkerung

Bestandsopnam

Op den 1. Januar 2024 hat Lëtzebuerg 672.050 Awunner, 11.241 Awunner méi wéi am Joer virdrun (+1,7 %). D'Bevëlkerung ass manner gewuess wéi am Joer 2022 (Erhéijung vun 2,4 %), dat Joer dat vun der Arrivée vun ukrainesche Krichsflüchtlinge markéiert war. Den Taux vun 1,7 % ass ee vun de niddregste Wuesstemstauxe vum leschte Joerzéngt (wou en tëscht 2,0 an 2,5 % louch), mat der Ausnam vun de COVID-19-Joren (Wuesstem 2020 an 2021 vun nëmmen 1,4 an 1,7 %).

Zënter 1981 ass d'Populatioun ëm 84,3 % gewuess.

Populatioun vu Lëtzebuerg (1981 – 2024)
	1981	1991	2001	2011	2021	2024
Total	364.602	384.634	439.539	512.353	643.941	672.050
Fraen	186.733	196.064	222.998	257.386	319.586	333.776
Männer	177.869	188.570	216.541	254.967	324.355	338.274
Nationalitéit
Lëtzebuerger	268.813	269.269	277.254	291.831	339.890	354.372
Auslänner	95.789	114.152	162.285	220.522	304.051	317.678
Net bekannt	-	1.213	-	-	-	-
Undeel Auslänner	26,3 %	29,4 %	36,9 %	43,0 %	47,2 %	47,3 %
Altersklassen
0-19 Joer	95.446	87.861	107.930	119.173	135.997	140.821
20-39 Joer	111.849	124.841	133.651	144.339	189.476	198.128
40-64 Joer	107.761	116.886	136.888	177.099	223.592	232.071
65-79 Joer	41.351	38.596	48.044	52.014	69.485	74.520
80 Joer a méi	8.195	11.702	13.026	19.728	25.391	26.510
Net bekannt	-	4.748	-	-	-	-
Familljestand
Jonggesell·in	143.784	154.411	185.256	227.012	294.601	307.763
Bestuet	180.702	186.111	202.252	216.613	247.545	256.713
Gepacst	-	-	-	6.364	25.110	28.150
Gescheet/Getrennt	11.764	15.188	22.219	33.660	46.319	47.934
Wittmann·fra	28.352	28.924	28.026	28.244	27.552	27.647
Net bekannt	-	-	1.786	460	2.814	3.843
Bevëlkerungsdicht (Aw./km²)	141,0	148,7	169,6	198,1	249,0	259,8

Wéinst dem liicht méi héijen Undeel vu Männer an der Migratiounen, zënter 2014, ass den Undeel vun de Männer an der Bevëlkerung mat 50,3 % e bësse méi héich wéi dee vun de Fraen (géint 49,7%). Den Iwwerschoss vu Männer läit bei 4.498.

Den Undeel vun den Auslänner ass am Laf vun der Zäit stänneg eropgaangen: vu 26,3 % am Joer 1981 op 47,3 % am Joer 2024. Dësen Undeel ass trotzdeem – global gesinn – zënter 2018 liicht erofgaangen (47,9 %) wéinst dem Unhuele vun der Lëtzebuerger Nationalitéit, am Kader vum Gesetz iwwer d'duebel Nationalitéit zënter 2009.

D'Altersstruktur vun der Lëtzebuerger Bevëlkerung huet sech iwwer déi lescht Joerzéngte g'ännert. Et gëtt, relativ gesinn, ëmmer manner Jonker am Alter vun 0 bis 19 Joer, iwwerdeems d'Zuel vun de Leit aus den Altersklassen tëscht 40 a 64 Joer an iwwer 80 Joer eropgeet. D'Alterung vun der Bevëlkerung gesäit ee gutt an den Alterspyramiden:

Entwécklung vun den Alterspyramiden tëscht 1910 an 2024

Am Joer 1910 hat d'Alterspyramid hiren Numm nach verdéngt: eng breet Basis an eng dënn Spëtzt. D'Fruchtbarkeet vun de Fraen an där Zäit erkläert déi grouss Zuel vu jonke Leit. Wat een an den Altersgruppe méi eropgeet, wat d'Zuel vu Leit ofhëlt, well de Risiko fir ze stierwe mam Alter eropgeet. D'Liewenserwaardung war zu där Zäit vill manner héich, Leit an engem héijen Alter ware méi rar.

1970 war d'Form vun der Pyramid net méi kloer z'erkennen, well et an där Zäit zu engem Réckgang vun der Fruchtbarkeet koum, iwwerdeems d'Zuel vun de Leit an de mëttelsten an ieweschten Altersklasse gewuess ass. D'Effekter vun den zwee Weltkricher sinn eng manner héich Zuel vu Gebuerten an dësen onsécheren Zäiten. Den Aschnëtt bei de 50-54-Järegen entsprécht dem Gebuertendefizit wärend dem Éischte Weltkrich. Den Defizit vum Zweete Weltkrich ass manner ausgepräägt, mat engem liichten Aschnëtt tëscht 20 an 29 Joer. De Baby-Boom just nom Enn vum Zweete Weltkrich ass och gutt ze gesinn; e weist eng bedeitend Erhéijung vun der Gebuertequot an dofir en Iwwerschoss vu Leit am Alter tëscht 5 a 24 Joer.

D'2024-er Pyramid charakteriséiert sech haaptsächlech duerch eng zimmlech schmuel Basis, mat enger méi breeder Mëtt, déi dann no uewen hin nees méi schmuel gëtt. De Surplus vun de Leit am Alter fir schaffen ze goen erkläert sech virun allem duerch d'Migranten, déi aus beruffleche Grënn op Lëtzebuerg kommen. D'Alterung vun der Bevëlkerung ass och ganz kloer ze gesinn, mat enger zimmlech héijer Zuel vu Leit am Alter vun 80 Joer an driwwer.

Den Duerchschnëttsalter vun der Bevëlkerung läit bei 40,6 Joer fir d'Fraen an 39,2 Joer fir d'Männer. D'Auslänner sinn däitlech méi jonk wéi d'Lëtzebuerger. Den Duerchschnëttsalter fir d'Lëtzebuerger Frae läit bei 42,2 Joer am Verglach zu 38,7 Joer fir d'auslännesch Fraen. Bei de lëtzebuergesche Männer ass den Duerchschnëttsalter 40,0 Joer géintiwwer 38,4 Joer fir d'auslännesch Männer.

Wat de Familljestand ugeet, sou ass den Undeel vun de Singelen am Laf vun der Zäit eropgaangen, iwwerdeems dee vun de bestuete Leit erofgeet. Den Taux vun de gescheeten oder getrennte Leit huet sech méi wéi verduebelt, iwwerdeems dee vun de Wittleit just nach d'Hallschent ass. Ëmmer méi Leit si gepacst oder liewen an enger Partnerschaft, wat de Réckgang vum Prozentsaz vun de Bestueten erkläert.

D'Bevëlkerungsdicht, d. h. d'Moyenne vun den Awunner pro Kilometerkaree, ass an de leschte Joerzéngten däitlech eropgaangen, vun 141 Leit pro km² am Joer 1981) op hautdesdaags 260.

Territorial Verdeelung vun der Bevëlkerung

De Kanton Lëtzebuerg ass mat 207.650 Awunner de Kanton mat de meeschten Awunner, eleng an der Stad Lëtzebuerg wunnen 134.697 Leit. Op der zweeter Plaz läit de Kanton Esch-Uelzecht mat 192.739 Awunner, wäit virum Kanton Capelle mat 54.352 Awunner. De Kanton mat de mannsten Awunner ass Veianen mat 5.680 Leit.

Et gëtt eng méi oder manner gläich Verdeelung vu Männer (50,3 %) a Fraen (49,7 %) an der Lëtzebuerger Bevëlkerung. Interessant ass awer, datt dëst Gläichgewiicht an der Stad net gëllt, wou d'Männer iwwerrepresentéiert sinn (51,8%).

Op kommunalem Niveau ass d'Gemeng Lëtzebuerg bei wäitem déi Gemeng mat de meeschten Awunner (134.697), wat e Fënneftel (20,0 %) vun der Bevëlkerung ausmécht.. Hannendru kommen d'Gemengen Esch-Uelzecht (37.455 Awunner), Déifferdeng (30.364) an Diddeleng (22.043). Um Wupp vun der Lëscht sinn d'Gemenge Sëll (980 Awunner), Pëtschent (1.176), Kiischpelt (1.260) a Fëschbech (1.300).

Awunner pro Kanton op den 1. Januar 2024
LAU1-Code	Kanton	Fraen	Männer	Awunner
LU-01	Capellen	27.387	29.965	54.352
LU-02	Esch-Uelzecht	96.286	96.453	192.739
LU-03	Lëtzebuerg	102.002	105.648	207.650
dovun: Stad Lëtzebuerg		64.917	69.780	134.697
LU-04	Miersch	18.098	18.164	36.262
LU-05	Klierf	10.358	10.856	21.214
LU-06	Dikrech	17.761	18.003	35.764
LU-07	Réiden	10.526	10.612	21.138
LU-08	Wolz	9.568	9.962	19.530
LU-09	Veianen	2.838	2.842	5.680
LU-10	Iechternach	10.085	10.198	20.283
LU-11	Gréiwemaacher	16.584	16.463	33.047
LU-12	Réimech	12.283	12.108	24.391
Total Lëtzebuerg		333.776	338.274	672.050

Den Taux vun den Auslänner variéiert staark jee no Gemeng. E schwankt tëscht 19,9 % zu Noumer a 70,4 % an der Stad. Et gëtt besonnesch vill Auslänner – relativ gesinn – an de Gemenge ronderëm d'Stad, a verschiddene Gemengen am Südwesten, Nordosten an am Zentrum-Nord vum Land

Auslännesch Bevëlkerung zu Lëtzebuerg

Vun der Gesamtbevëlkerung am Grand-Duché (op den 1. Januar 2024) waren 317.678 Leit Auslänner (42,72 %), vun deenen der 12,4 % zu Lëtzebuerg gebuer sinn. 77,3 % vun der auslännescher Bevëlkerung zu Lëtzebuerg kommen aus Staate vun der Europäescher Unioun (-1,1 % am Verglach mat 2023). Am Joer 1981 hunn déi aktuell 27 Memberstaate souguer 91,5 % vun der auslännescher Bevëlkerung zu Lëtzebuerg ausgemaach. D'Diversifikatioun vun der Immigratioun bréngt mat sech, datt den Undeel vun den Auslänner, déi keng EU-Nationalitéit hunn, eropgeet. Mat 90.915 Awunner sinn d'Portugisen déi gréisst auslännesch Communautéit am Land, virun de Fransousen (49.234) an den Italieener (25.116).

D'Bierger vun den aneren europäesche Länner bilden déi zweetgréisste Grupp vun Auslänner zu Lëtzebuerg. Si representéiere 7,4 % vun der auslännescher Bevëlkerung, dovu virop d'Ukrainer an d'Britten. No der massiver Flucht vu 4.268 Ukrainer op Lëtzebuerg am Joer 2022, bilden d'Ukrainer déi stäerkst europäesch, net-EU Communautéit mat 5.357 Leit. Den Undeel vun den Net-EU-Europäer an der auslännescher Bevëlkerung ass deemno tëscht 2022 an 2023 ëm 1,3 % geklommen; vun 2023 op 2024 ass dës Populatioun awer just ëm 0,9 % eropgaangen.

Duerno kommen – mat 6,9 % vun der auslännescher Bevëlkerung – d'Bierger aus engem asiatesche Land. D'Nationalitéiten déi am meeschte vertruede sinn, sinn Indien a China. D'Afrikaner an d'Amerikaner sinn déi véiert (5,5 %) a fënneft (2,7 %) Grupp vun Auslänner déi am meeschte vertruede sinn, mat virop dem Cap Vert an Eritrea an hannendru Brasilien an den USA. D'Zuel vun de Staatsbierger aus Ozeanien, den Apatriden a vun deenen, deenen hir Nationalitéit net bekannt ass, ass relativ marginal.

Op Gemengenniveau variéiert den Undeel vun den EU-Europäer tëscht 16,7 % zu Groussbus-Wal an 53,2 % an der Stad. Si konzentréieren sech virun allem an de Gemenge ronderëm d'Stad, an de Gemengen am Südweste vum Land, grad wéi och – manner prononcéiert – an de Gemengen am Uelzechtdall, am Nordosten an an der nërdlecher Spëtzt vum Land. Och den Taux vun den Net-EU-Europäer ënnerscheet sech staark jee no Gemeng, mam klengsten Undeel vun 0,6 % am Kiischpelt a 5,8 % zu Iechternach.

Den Undeel vun asiatesche Staatsbierger an der Bevëlkerung variéiert tëscht 0,3 % zu Viichten an 10,9 % zu Bäerdref. Den héijen Taux zu Bäerdref erkläert sech duerch d'Flüchtlingsstruktur an der Weilerbaach, wou vill Flüchtlingen aus Syrien oder Afghanistan ënnerdaach koumen. Duerno kommen d'Gemenge Lëtzebuerg (5,9 %), Stroossen (5,8 %) a Bartreng (4,6 %). Allgemeng fënnt een déi meescht Asiaten an der Ëmgéigend vun der Haaptstad, an e puer Gemengen am Südwesten, zu Biwer (3,6 %) an an e puer Gemengen tëscht Esch-Sauer a Veianen, inklusiv Ettelbréck (4,1 %) an Dikrech (3,9 %).

Wat d'Bierger vum afrikanesche Kontinent ugeet, wunnen déi meescht (4,8 %) zu Esch-Uelzecht an zu Dikrech an déi mannst zu Weiler zum Tuer an zu Bech (0,5%). Aner Konzentratioune vun Afrikaner sinn zu Wolz (4,2 %), Ettelbréck (4,1 %) grad ewéi zu Tandel an zu Ëlwen (3,8 %).

Wat d'Nationalitéiten vum amerikanesche Kontinent ugeet, sou variéiert den Undeel tëscht 0,0 % ze Pëtschent an 2,4 % an der Stad. Am Allgemenge konzentréiere sech d'Bierger vum amerikanesche Kontinent haaptsächlech ronderëm d'Stad (mat Ausnam vun de Gemenge Sandweiler a Walfer). No der Haaptstad fënnt een déi meescht Amerikaner zu Hesper (1,9%), Stroossen (1,8%), Bäerdref (1,8%), Koplescht (1,7%) a Bartreng (1,7%). De klengsten Undeel wunnt am Norde vum Land.

Auslännesch Bevëlkerung no Nationalitéit
Nationalitéit	1981	1991	2001	2011	2021	2024	2024 (%)
Europäesch Unioun^A	87.665	101.113	137.350	186.576	245.906	245.548	77,3%
Portugal	29.305	39.303	58.657	82.363	93.659	90.915	28,6%
Frankräich	11.940	13.203	19.979	31.456	49.071	49.234	15,5%
Italien	22.257	19.077	18.996	18.059	23.881	25.116	7,9%
Belsch	7.854	10.255	14.800	16.926	19.692	18.889	5,9%
Däitschland	8.851	8.874	10.052	12.049	12.906	12.480	3,9%
Europa (net EU)	4.735	6.601	16.851	19.167	18.844	23.585	7,4%
Ukrain^B	–	–	180	427	1.063	5.357	1,7%
Vereenegt Kinnekräich	2.027	3.190	4.331	5.471	4.289	3.739	1,2%
Montenegro^C	–	–	–	3.814	2.862	2.842	0,9%
Russland^D	–	–	402	930	1.969	2.389	0,8%
Asien	585	1.612	2.592	4.963	17.420	21.876	6,9%
Indien	65	132	199	569	3.641	5.091	1,6%
China	35	290	1.070	1.610	4.130	4.545	1,4%
Syrien	0	0	1	25	2.688	3.742	1,2%
Afrika	624	1.723	2.675	5.565	13.554	17.507	5,5%
Cap Vert	301	1.101	1.660	2.472	2.562	2.518	0,8%
Eritrea	0	0	0	21	2.688	2.458	0,8%
Marokko	74	120	252	524	1.612	2.107	0,7%
Amerika	1.025	1.833	2.204	3.812	7.742	8.576	2,7%
Brasilien	64	147	307	1.203	2.859	3.255	1,0%
USA	694	1.215	1.127	1.295	2.196	2.159	0,7%
Kanada	85	140	244	376	584	540	0,2%
Ozeanien	33	92	105	187	245	271	0,1%
Australien	26	56	79	136	189	204	0,1%
Apatriden	1.024	572	441	197	183	158	0,0%
Net bekannt	98	1.817	67	50	157	147	0,0%

^A Ouni d' Vereenegt Kinnekräich
^B Ukrain steet ënnert der Sowjetunioun (1981, 1991)
^C Montenegro steet ënnert Jugoslawien (1981, 1991), duerno ënnert Serbien a Montenegro
^D Russland steet ënnert der Sowjetunioun (1981, 1991)

Duebel Nationalitéit

Vun all de Leit déi op den 1. Januar 2024 als Lëtzebuerger gezielt ginn, hu 77,3 % just d'lëtzebuergesch Nationalitéit, wärend 22,7 % op d'mannst nach eng zweet Nationalitéit hunn (am Verglach zu 5,2 % am Joer 2011). Dës Steigerung vun der Zuel vun de Leit déi d'Lëtzebuerger Nationalitéit kritt hunn, geet op d'Tatsaach zeréck, datt et zënter dem Gesetz vun 2008 méiglech ass, d'Lëtzebuerger Nationalitéit unzehuelen, ouni datt ee seng éischt Nationalitéit verléiert.

69,7 % vun de Lëtzebuerger mat enger duebeler Nationalitéit hunn als zweet Nationalitéit eng aus engem aneren EU-Land (25,1 % vun der Gesamtbevëlkerung hunn déi portugisesch, 14,3 % déi franséisch a 7,4 % déi italieenesch Nationalitéit). Den Undeel vun de Lëtzebuerger mat enger zweeter europäescher, awer Net-EU-Nationalitéit, läit bei 16,7 %. Déijéineg mat enger zweeter Nationalitéit aus engem asiatesch Land läit bei 5,3 %, aus Afrika bei 5,2 %, aus Amerika bei 3,0 % an aus Ozeanien ëm 0,1 %.

D'Lëtzebuerger mat enger zweeter Nationalitéit si relativ jonk (an der Moyenne 29,6 Joer) am Verglach zum Altersduerchschnëtt vun 41,1 fir all d'Leit mat der Lëtzebuerger Nationalitéit.

Zuel vun de Lëtzebuerger no hirer zweeter Nationalitéit
Zweet Nationalitéit	2024	2024 (%)
Europäesch Unioun	56.138	69,7%
Portugal	20.215	25,1%
Frankräich	11.477	14,3%
Italien	5.991	7,4%
Belsch	5.874	7,3%
Däitschland	4.753	5,9%
Europa (net EU)	13.448	16,7%
Montenegro	3.193	4,0%
Vereenegt Kinnekräich	2.792	3,5%
Bosnien an Herzegowina	1.682	2,1%
Serbien	1.478	1,8%
Russland	1.140	1,4%
Afrika	4.158	5,2%
Cap Vert	1.507	1,9%
Marokko	446	0,6%
Asien	4.284	5,3%
Syrien	156	1,3%
Indien	610	0,8%
Amerika	2.400	3,0%
Brasilien	1.031	1,3%
USA	579	0,7%
Ozeanien	76	0,1%
Net bekannt	6	0,0%
Total	80.510	100,0%

Gebuerten a Doudesfäll

Gebuerten

Gebuerten, Doudesfäll a Gebuertebilan (1980-2023)

Am Joer 2023 goufen ënner de Leit, déi zu Lëtzebuerg wunnen, 6.320 Gebuerten a 4.431 Doudesfäll enregistréiert. Am Verglach mat 2022, ass dat e Réckgang bei de Gebuerte vu -2,7 % a bei den Doudesfäll vu -0,4 %. Déi natierlech Bevëlkerungsentwécklung (Gebuertebilan), d. h. den Iwwerschoss vun de Gebuerten zu den Doudesfäll louch bei 1.889 Leit. Nom Eropgoe vun de Gebuerten an der Stagnatioun vun den Doudesfäll zënter der Mëtt vun den 1980er Joren, ass de Gebuertebilan bis 2013 eropgaangen (mat engem Maximum vun 2.293). Tëscht 2014 an 2020 ass e stabel bliwwen, oder souguer liicht erofgaangen, wéinst enger méi héijer Zuel vun Doudesfäll (de Pic vun den Doudesfäll am Joer 2020, am Zesummenhang mat der COVID-19-Pandemie, ass kloer ze gesinn). Am Joer 2021 louch de Gebuertebilan bei 2.201, iwwerdeems en duerno (am Joer 2022) op 2.046 an am Joer 2023 op 1.889 erofgaangen ass.

Ënnert de 6.320 Gebuerten am Joer 2023 sinn d'Jonge liicht iwwerrepresentéiert (51,1 %). 60,1 % vun de Kanner koume bannent enger bestueter Koppel op d'Welt, iwwerdeems 39,9 % vun de Kanner baussent dem Bestietnes gebuer goufen. Deen Undeel geet weiderhin erop: e louch 1950 bei just 3,4 %, bei 5,9 % am Joer 1980 a bei 21,9 % am Joer 2000. Am Verglach zu 2022 ass en awer nees liicht, ëm 2,1 Prozentpunkten, erofgaangen.

51,9 % vun Neigebuerene si Lëtzebuerger. Vun den 48,1 % mat enger auslännescher Nationalitéit sinn déi meescht Portugisen (689), Fransousen (507), Italieener (234), Belsch (144) a Spuenier (113). Den Duerchschnëttsalter vun der Mamm läit bei 32,2 Joer am Joer 2023 wärend d'Mamm bei der Gebuert vun hirem éischte Kand an der Moyennen 31,2 Joer al ass. Deen Duerchschnëttsalter vun der Mamm fir déi éischt Gebuert ass am Laf vun der Zäit stänneg eropgaangen: 28,1 Joer am Joer 2000, 29,5 am Joer 2010 an 30,9 am Joer 2020. Den aktuelle Fruchtbarkeetstaux (indicateur conjoncturel de fécondité, ICF), dat heescht déi duerchschnëttlech Zuel vu Kanner pro Fra, ass 1,25 am Joer 2023, woubäi en 1,43 fir auslännesch Fraen an 1,09 fir Lëtzebuerger Fraen ass. Den ICF ass an de lescht Joerzéngten dramatesch erofgaangen: 1980 louch en nach bei 1,50 (1,83 fir auslännesch an 1,37 fir lëtzebuergesch Fraen).

Gebuerten zu Lëtzebuerg
	1980	1990	2000	2010	2020	2023
Total	4.169	4.936	5.723	5.874	6.459	6.320
Jongen	2.082	2.582	2.978	2.960	3.296	3.231
Meedercher	2.087	2.354	2.745	2.914	3.163	3.089
Alter vun der Mamm
Ënner 20 Joer	228	149	146	111	64	51
20-24 Joer	1.231	960	839	622	436	382
25-29 Joer	1.590	2.009	1.828	1.584	1.416	1.346
30-34 Joer	831	1.354	1.936	2.152	2.478	2.471
35-39 Joer	219	403	843	1.107	1.602	1.617
40-44 Joer	46	55	121	279	419	404
45 Joer a méi	3	-	6	14	35	44
Net bekannt	21	6	4	5	9	5
Alter vun der Mamm (1. Gebuert)	–	–	28,1	29,5	30,9	31,2
Indicateur vun der Fruchtbarkeet
Bevëlkerung (Total)	1,50	1,62	1,78	1,63	1,37	1,25
Bevëlkerung (Lëtzebuerger)	1,37	1,61	1,70	1,31	1,23	1,09
Bevëlkerung (Auslänner)	1,83	1,59	1,90	1,96	1,53	1,43

De Fruchtbarkeetstaux (ICF) ass an den 1960er Joren a bis an d'Mëtt vun den 1970er Jore staark erofgaangen, änlech wéi déi meescht aner europäesche Länner déi eng änlech Evolutioun erliewen, awer mat e puer Nuancen. An den 1960er Jore war de Lëtzebuerger ICF (2,22 am Joer 1960) ënnert de schwaachsten an Europa. De séiere Réckgang huet zu Lëtzebuerg an der Mëtt vun de 1970er Joren opgehalen, ass duerno stabel bliwwe fir duerno, an der Mëtt vun den 1980er Joren, nees bis 2000 eropzegoen. E goung vun 1,38 am Joer 1985 op 1,78 am Joer 2000. Zënter 2000 ass den Indicateur allgemeng erofgaangen an huet am Joer 2023 en historesch nidderegen Niveau erreecht, mat just 1,25 Kanner pro Fra.

Am Ufank vun den 2010er Jore kann de Réckgang vun der Fruchtbarkeet zum Deel mam Impakt vun der Wirtschafts- a Finanzkris erkläert ginn. An där Zäit hu besonnesch déi jonk Koppelen éischter dozou tendéiert, fir de Projet vun der Familljegrënnung oder -vergréisserung no hannen ze réckelen, besonnesch no enger manner gënschteger Situatioun um Aarbechts- a Wunnengsmaart. Wéi och ëmmer, duerno ass de Fruchtbarkeetstaux awer net eropgaangen, och wann déi wirtschaftlech Indicateure méi gënschteg waren (virun der COVID-19 Pandemie). Dësen Ofwäertstrend, deen haut nach besteet, huet d'Demographen encouragéiert fir no aner Erklärungen ze sichen. Et schéngt, wéi wann déi aktuell Entwécklung vun der Gesellschaft an déi grouss Erausfuerderungen, déi mat dëser Evolutioun verbonne sinn, net nëmmen eng Roll a Bezuch zum Alter, mä och op d'Zuel vu Kanner déi d'Koppele sech wënschen, spillt.

Wat d'Virnimm vun de Neigebuerenen am Joer 2023 ugeet, ass Emma sou just nach un der Spëtzt bei de Meedercher mat 42 Fäll; duerno kommen op de Plazen 2 bis 5 Olivia (41 Fäll), Mia (39), Maria (32) a mat jee 28 Fäll Chloé, Luna a Sofia. Bei de Jongen ass de Gabriel un der Spëtzt vum Ranking mat 61 Fäll an duerno komme Leo (48 Fäll), Noah (47), Liam (39) a Louis (37).

Klassement vun de Virnumm vun den Neigebuerenen 2023
Jongen				Meedercher
Lëtzebuergesch Gebuerten		Auslännesch Gebuerten		Lëtzebuergesch Gebuerten		Auslännesch Gebuerten
Leo	41	Gabriel	27	Mia	28	Emma	26
Gabriel	34	Adam	22	Sophie	19	Olivia	25
Liam, Louis, Matteo, Noah	26	Noah	21	Olivia	18	Mia	23
Elias	17	Lucas	18	Chloé, Eva	17	Sofia	22
Lucas, Théo	16	Leonardo	16	Charlotte, Elie, Emma	16	Alice	19

Doudesfäll

Nodeems d'Zuel vun den Doudesfäll am Joer 2020 (nom Ausbroch vun der COVID-19 Pandemie) eropgaangen ass (4.609 Doudesfäll), huet s'an de Joren duerno däitlech ofgeholl: 4.489 Doudesfäll am Joer 2021, 4.449 am Joer 2022 an der 4.431 am Joer 2023. Am Joer 2023 waren eT liicht méi Doudesfäll bei de Fraen (50,8 %) wéi bei de Männer (49,2 %). Den Undeel vun de Lëtzebuerger Doudesfäll läit bei 76,0 % géintiwwer 24,0 % bei den Auslänner.

Bei den Auslänner gëtt et déi meescht Doudesfäll bei de Portugisen (281), virun den Italieener (198) an de Fransousen (144). Den Duerchschnëttsalter vun de Verstuerwenen läit bei 78,0 Joer (81,0 Joer fir D'Fraen a 75,0 Joer fir D'Männer). D'Liewenserwaardung bei der Gebuert ass 85,0 Joer fir d'Fraen an 81,0 fir d'Männer. Tëscht 1980 an 2023 ass d'Liewenserwaardung staark eropgaangen: ëm 10,5 Joer fir d'Männer an 8,1 Joer fir Fraen. De Mortalitéitstaux bei de Puppelcher ass an de leschten 43 Joer weesentlech erofgaangen: 11,6 ‰ am Joer 1980 am Verglach zu 4,3‰ am Joer 2023. Am Joer 2022 louch d'Kannerstierflechkeet nach liicht méi niddereg, bei 3,5‰.

Doudesfäll zu Lëtzebuerg
	1980	1990	2000	2010	2020	2023
Total	4.113	3.773	3.754	3.760	4.609	4.431
Männer	2.109	1.880	1.895	1.903	2.375	2.182
Fraen	2.004	1.893	1.859	1.857	2.234	2.249
Nationalitéit
Lëtzebuerger	3.749	3.373	3.207	3.049	3.511	3.366
Auslänner	364	400	547	711	1.098	1.065
Altersklassen
0	48	36	29	20	29	27
1-19 Joer	51	32	17	13	17	14
20-39 Joer	123	137	127	84	67	62
40-59 Joer	544	483	453	449	412	380
60-89 Joer	725	641	546	460	564	540
70-79 Joer	1.378	988	993	869	933	934
80-89 Joer	1.081	1.195	1.166	1.359	1.574	1.444
90-94 Joer	129	215	325	349	740	701
95 Joer a méi	34	46	98	157	273	329
Mortalitéitstaux bei de Puppelcher	11,6	7,3	5,1	3,4	4,5	4,3
Liewenserwaardung bei der Gebuert
Männer	70,0	72,6	74,8	78,6	80,0	81,0
Fraen	76,7	79,1	81,0	83,4	84,5	85,0

Bestietnes a Scheedung

Bestietnesser a Scheedungen zu Lëtzebuerg (1980-2023)

Bestietnesser

2023 goufen 2.539 Hochzäiten zelebréiert. Wärend der COVID-19-Pandemie tëscht 2019 an 2020, waren d'Zuele vun den Hochzäiten ëm 15,9 % erofgaangen, ier se sech déi Joren duerno nees erholl hunn: 1.945 Hochzäiten am Joer 2021 (+7,9 % am Verglach zu 2020) an der 2.475 am Joer 2022 (+27,2 % am Verglach mam Joer virdrun). Mat den 2.539 Hochzäite vun 2023 geet den Hochzäits-Boom virun, souguer mat engem liichte Wuesstem vu +2,6 % par Rapport zu 2022.

Am Joer 2023 waren 98,1 % vun de Mariagen (2.492 Fäll) Bestietnesser tëscht Mann a Fra, iwwerdeems 1,9 % (47 Mariagen) gläichgeschlechtlech Bestietnesser waren. Ënnert de gläichgeschlechtlechen Hochzäite waren der 25 tëscht zwou Fraen an 22 tëscht zwee Männer. D'Zuel vun de gläichgeschlechtlech Mariagen ass méi héich wéi déi 3 Joer virdrun: 39 am Joer 2020, 36 am Joer 2021 a 35 am Joer 2022.

72,5 % vun de Bestietnesser am Joer 2023 waren „éischt Hochzäiten“, dat heescht wou déi zwee Partner sech fir d'éischt Kéier bestuet hunn; 27,5 % waren deemno „Re-Mariagen“, wou op d'mannst ee vun der Koppel virdru schonn eng Kéier bestuet war. Bei den „éischten Hochzäiten“ waren d'Fraen duerchschnëttlech 32,7 Joer al an d'Männer 34,5 Joer.

Bei 1.012 Koppelen (39,9 %) hate béid Partner déi lëtzebuergesch Nationalitéit, bei 696 Bestietnesser (27,4 %) war ee Partner Lëtzebuerger an deen aneren Auslänner an an 831 Fäll (32,7 %) ware béid Partner Auslänner.

Bestietnesser zu Lëtzebuerg
	1980	1990	2000	2010	2020	2023
Bestietnesser (Total)	2.149	2.312	2.148	1.749	1.803	2.539
Mann a Fra	2.149	2.312	2.148	1.749	1.764	2.492
Gläichgeschlechtlech	-	-	-	-	39	47
Éischte Mariage	1.737	1.652	1.410	1.146	1.271	1.841
Re-Mariage	412	660	738	603	532	698
Männer	2.149	2.312	2.148	1.749	1.810	2.536
Jonggesell	1.877	1.835	1.630	1.292	1.419	231
Wittmann	47	46	27	23	21	18
Gescheet	225	431	491	434	370	487
Fraen	2.149	2.312	2.148	1.749	1.796	2.542
Jonggeselin	1.888	1.888	1.647	1.373	1.435	2.076
Wittfra	33	20	24	21	7	12
Gescheet	228	404	477	355	354	454
Duerchschnëttsalter beim 1. Bestietnes
Männer	-	-	30,2	32,6	34,3	34,5
Fraen	-	-	27,6	30,2	32,3	32,7

Scheedungen

Am Joer 2023 ass d'Zuel vun de Scheedungen, déi vun de Geriichter gesprach goufen, ëm +9.3% am Verglach mat Virjoer op 1.359 eropgaangen. En Héichpunkt vun 1.906 Scheedunge gouf et am Joer 2019, iwwerdeems an den dräi Joren duerno manner Bestietnesser gescheet goufen: 1.447 am Joer 2020, 1.400 am Joer 2021 an 1.243 am Joer 2022. Vun den 1.359 Scheedunge vun 2023 waren 1.342 Mann-Fra-Bestietnesser a 17 gläichgeschlechtlech Hochzäiten.

Déi meescht Scheedunge gëtt et no 2 Joer Bestietnes (81 Scheedungen). 22,7 % vun de Mariagë ginn no manner wéi fënnef Joer opgeléist (19,9 % am Joer 2000), 24,4 % no 5 bis 9 Joer Bestietnes (31,8 % am Joer 2000), 16,4 % no 10 bis 14 Joer (18,4 % am Joer 2000) an 13,8 % no 15 bis 19 Joer (10,9 % am Joer 2000). E bësse manner wéi e Véierel vun de Scheedungen (22,6 %) gëtt et no op d'mannst 20 Joer Bestietnes (18,9 % am Joer 2000).

Am Laf vun der Zäit gouf eng Erhéijung vun der Zuel vu Scheedungen, engersäits no manner wéi 5 Joer Bestietnes an anersäits no op d'mannst 20 Joer Bestietnes, festgestallt, iwwerdeems den Taux vun de Mariagen déi tëscht 5 an 19 Joer opgeléist ginn, stänneg nogelooss huet. Den Ament vun der Scheedung läit d'Duerchschnëttsdauer vum Bestietnes am Joer 2023 bei 12,9 Joer (am Joer 2000 bei 11,7 Joer). De Scheedungstaux, d. h. d'Verhältnis tëscht der Zuel vun de Scheedungen an der duerchschnëttlecher Gesamtbevëlkerung ass zënter 1980 stänneg eropgaangen, vun 1,60 ‰ op 3,07 ‰ am Joer 2019. En ass zënterhier awer nees op 2,04 ‰ am Joer 2023 erofgaangen (2.30 ‰ am Joer 2020, 2.19 ‰ 2021 an 1.90 ‰ 2022).

Scheedungen zu Lëtzebuerg
	1980	1990	2000	2010	2020	2023
Scheedungen	582	759	1.030	1.083	1.447	1.359
Dauer vum Bestietnes (Joer)
0-4	120	134	205	185	322	309
5-9	159	200	328	297	327	332
10-14	114	154	190	186	263	223
15-19	86	98	112	186	199	188
20 a méi	103	173	195	229	335	307
Dauer net bekannt	–	–	–	–	1	–
Duerchschnëttsdauer vum Bestietnes virun der Scheedung	–	–	11,7	12,9	13,0	12,9
Scheedungstaux	1,60	1,99	2,36	2,14	2,30	2,04

Acquisitioun vun der Lëtzebuerger Nationalitéit

Acquisitioun vun der Lëtzebuerger Nationalitéit vun Auslänner

Am Joer 2023 hunn am Ganzen 11.904 Leit d'Lëtzebuerger Nationalitéit kritt:

5.772 Leit duerch Optioun;
4.932 duerch Recouvrement;
1.200 duerch Naturalisatioun.

Méi Informatioun doriwwer am Artikel: Lëtzebuerger Nationalitéit.

Bis Ufank vun den 2000er Jore gouf et wéineg Demandë fir d'Lëtzebuerger Nationalitéit unzehuelen. Mam Akraafttriede vum Gesetz iwwer d'duebel Nationalitéit den 1. Januar 2009 ass d'Zuel vun den naturaliséierte Leit reegelrecht explodéiert. 2018 gouf et e Pic mat 11.876 Leit déi d'Lëtzebuerger Nationalitéit ugeholl hunn, ier dës Zuel wéinst der Pandemie tëscht 2020 an 2021 nees erofgaangen ass. Duerno ass d'Zuel vun de Leit déi d'lëtzebuergesch Nationalitéit ugeholl hunn nees eropgaangen: 10.499 Acquisitiounen am Joer 2022 an 11.904 am Joer 2023 (+13,4 % am Verglach mat 2022).

Déi héich Zuel vun Naturalisatioune vun 2009 un erkläert sech mat de ville Leit déi d'Lëtzebuerger Nationalitéit ugeholl hunn, ouni datt se zu Lëtzebuerg wunnen. Am Joer 2009 huet den Undeel vun den Net-Residenten ënner deenen déi naturaliséiert goufen, 0,9 % ausgemaach. Duerno ass dëse Prozentsaz stänneg eropgaangen, bis en an de Joren 2019 an 2020 op e Maximum vu 50,6 % koum. Am Joer 2021 war den Undeel vun den Residentë mat 72,5 % vill méi héich am Verglach mat de 27,5 % Net-Awunner. D'Net-Residenten hunn awer dunn am Joer 2022 nees bal d'Hallschent ausgemaach (49,0 %), iwwerdeems den Taux d'Joer drop méi wéi d'Hallschent ausgemaach huet (51,0 %). Nieft de 5.831 Residentë vu Lëtzebuerg déi d'Lëtzebuerger Nationalitéit accordéiert kruten, koumen am Ranking hannendru 4.264 Residenten aus Brasilien, 907 aus den USA, 371 aus Frankräich, 173 aus der Belsch an der 60 aus Däitschland.

Acquisitioun vun der Lëtzebuerger Nationalitéit vu Residenten an Net-Residenten (2009-2023)

Am Ranking vun den Auslänner, déi d'Lëtzebuerger Nationalitéit ugeholl hunn, stinn d'Fransousen op der éischter Plaz: tëscht 2009 bis 2023 kommen op 109.214 Acquisitiounen eleng 20.369 Fransousen (18,7 %). Duerno kommen d'Portugisen (17.858, 16.4 %) op der zweeter an d'Belsch (16.017, 14.7 %) op der drëtter an dann d'Brasilianer op der véierter (13.135, 12,0 %) Plaz, virun den Italieener an den Däitschen. Déi grouss Zuel vun Naturalisatioune vu Brasilianer an Amerikaner kënnt duerch d'Recouvrementsprozedur déi et bis den 31. Dezember 2025 jidderengem erlaabt, d'Lëtzebuerger Nationalitéit ze kréien, wann en op den 1. Januar 1900 e Lëtzebuerger Virfaren hat. D'Emigratiounswell vun de Lëtzebuerger an d'USA an a Brasilien am Ufank vum 20. Joerhonnert erkläert dann och déi grouss Zuel vun „neie Lëtzebuerger“ aus Brasilien oder Amerika.

Iwwerdeems bal all naturaliséiert Portugisen Awunner vum Grand-Duché sinn, representéieren déi franséisch a belsch Residentë just eng Minoritéit. Wat d'Geschlecht ugeet, waren et 2023 mat 52,4 % méi Fraen déi d'Lëtzebuerger Nationalitéit krute wéi Männer. Am Laf vun der Zäit ass den Taux fir d'Unhuele vum Lëtzebuerger Pass vu 6,7 ‰ am Joer 1990 op 18,5 ‰ am Joer 2023 eropgaangen. Ze bemierken ass nach, datt wéinst dem Brexit d'Zuel vun de Britten déi naturaliséiert goufen, geklommen ass: zënter 2016 hunn 2.222 Britten déi lëtzebuergesch Nationalitéit ugeholl.

Acquisitioun vun der Lëtzebuerger Nationalitéit
	1980	1990	2000	2010	2020	2023
Total	489	748	684	4.311	9.387	11.904
Männer	-	-	347	2.057	4.523	5.662
Fraen	-	-	337	2.254	4.864	6.242
Residenz
Lëtzebuerg	-	-	-	4.203	4.640	5.831
Ausland	-	-	-	108	4.747	6.073
Nationalitéit (vun de Residenten)
Däitschland	125	97	50	326	225	258
Belsch	65	79	72	237	332	341
Frankräich	68	106	52	301	648	768
Holland	21	30	14	49	34	38
Italien	124	191	157	663	244	310
Portugal	-	-	150	1.349	968	1.228
Aner Nationalitéiten	-	-	189	1.278	2.189	888

International Migratiounen

Arrivéeën, Departen a Migratiounsbilan

Lëtzebuerg ënnerscheet sech vun aneren europäesche Länner duerch seng demographesch Dynamik an dëst haaptsächlech wéinst der internationaler Migratioun. De Populatiounswuesstem an de leschten zéng Joer ass fir ronn 80 % op d'international Migratioun zeréckzeféieren.

No engem Réckgang vun de Migratiounen am Joer 2020 no der COVID-19 Pandemie, ass s'am Joer 2021 erëm eropgaangen an huet 2022 en neie Rekord erreecht: 31.433 Leit sinn op Lëtzebuerg komm a 17.227 sinn der fortgaangen. 2023 goufe 26.964 Arrivéeën (-14.2% am Verglach zum 2022) a 16.588 Departen (-3,7%) enregistréiert. De Migratiounsbilan, dat heescht d'Differenz tëscht Immigranten an Emigranten, louch am Joer 2023 bei 10.376 Leit. Souwuel bei der Immigratioun wéi och bei der Emigratioun leien d'Männer liicht virun de Fraen: 16.131 (53.2 %) sinn der zu Lëtzebuerg ukomm an 9.345 (54.6 %) sinn der fortgaangen.

Tëscht 1990 an 2023 huet sech d'Zuel vun den Arrivéeë mat 2,6-mol multiplizéiert (+162,3 %) iwwerdeems d'Departen an d'Ausland ëm 161,7 % geklomme sinn. D'Bevëlkerung vu Lëtzebuerg charakteriséiert sech deemno duerch staark ausgepräägt Migratiounsstréim wat zu enger „Erneierung“ vun der Bevëlkerung féiert. Well dacks Leit immigréieren, déi am Alter si fir schaffen ze goen, ass d'Alterung vun der Bevëlkerung manner grouss wéi an anere Länner vun der Europäescher Unioun. Den Iwwerschoss tëscht den Arrivéeën an Departen ass am Laf vun der Zäit och eropgaangen: vun 3.942 am Joer 1990 op 10.376 am Joer 2023 (+163.2%), mat engem Héichpunkt vu 14.206 am Joer 2022.

Et gëtt méi Leit mat enger auslännescher Nationalitéit déi op Lëtzebuerg immigréieren oder déi Lëtzebuerg verloossen: am Joer 2023 waren d'Auslänner responsabel fir 93,3 % vun den Arrivéeën an 81,3 % vun den Departen.

Migratioun zu Lëtzebuerg
	1990	2000	2010	2019	2020	2021	2022	2023
Immigratioun	10.281	11.765	16.962	26.668	22.490	25.335	31.433	26.964
Auslänner	9.310	10.792	15.814	25.150	20.970	23.758	29.851	25.144
Lëtzebuerger	971	973	1.148	1.518	1.520	1.577	1.582	1.820
Emigratioun	6.339	8.121	9.302	15.593	14.870	15.959	17.227	16.588
Auslänner	5.523	7.025	7.651	13.008	12.048	12.896	13.954	13.486
Lëtzebuerger	816	1.096	1.651	2.585	2.822	3.063	3.273	3.102
Migratiounsbilan	3.942	3.644	7.660	11.075	7.620	9.376	14.206	10.376
Auslänner	3.787	3.767	8.163	12.142	8.922	10.862	15.897	11.658
Lëtzebuerger	155	-123	-503	-1.067	-1.302	-1.486	-1.691	-1.282

Immigratioun

Zënter 1990 ass d'Immigratioun vun de Lëtzebuerger ëm 87,4 % geklommen, am Verglach mat 170,1 % vun den Auslänner. Allerdéngs ass d'Zuel vun de Lëtzebuerger déi d'Land verloossen, méi héich wéi déi vun den Auslänner. Se huet sech mat ongeféier 3,8 (+280,1 %) multiplizéiert, wärend déi vun den Auslänner sech nëmme mat ongeféier 1,4 multiplizéiert huet (+144,2 %). Dësen Trend vun der Emigratioun vun de Lëtzebuerger huet och net mat der COVID-19-Kris ofgeholl, am Géigendeel. 1995 gouf et fir d'éischt Kéier en Iwwerschoss vun Departe vu Lëtzebuerger (-40). Dësen Iwwerschoss ass mat der Zäit geklommen an hat 2022 mat -1.691 säi Maximum erreecht. 2023 louch en e bësse méi déif, mat -1.282 Leit.

Wann déi ursprénglech Immigranten nom Zweete Weltkrich haaptsächlech Italieener waren, koumen duerno d'Portugisen. Méi spéit huet d'Immigratioun sech diversifizéiert, mä d'EU-Bierger bleiwen nach ëmmer vir bäi; am Joer 2023 maachen se 60,1 % vun der Immigratioun aus. Dat Joer virdru louch den Taux just bei 52,5 %, wat haaptsächlech mat der héijer Zuel vu Fraen (4.268) z'erklären ass, déi aus der Ukrain op Lëtzebuerg koumen.

Am Immigratiouns-Ranking kommen no den europäesche Bierger d'Asiaten (3.284, 12.2 %), d'Afrikaner (3.217, 11.9 %), déi europäesch Net-EU-Bierger (2.769, 10,3 %) an dann d'Amerikaner (1.408, 5,2 %). Wat d'Emigratioun ugeet, sinn et d'EU-Europäer déi am meeschten emigréieren (79,4 %), duerno kommen d'Net-EU-Europäer (1.216, 7,3 %), virun den Asiaten (896, 5,4 %) an den Amerikaner (644, 3,9 %).

2023 representéieren d'Portugisen (3.638 Leit, 13,6 %) déi Gemeinschaft, déi am meeschten op Lëtzebuerg immigréiert ass. No 2013 waren se 2021 nees fir d'éischt Kéier, déi mat de meeschten Immigranten (3.885 Leit). Am Joer 2022 waren d'Ukrainer op der éischter Plaz (4.268, 13,6 % vun den Arrivéeën), iwwerdeems se 2023 just op der 9. Plaz waren (807 Arrivéeën, 3 %). 2023 koumen duerno d'Fransousen (3.145, 11,6 %), d'Italieener (1.947, 7,2%), d'Lëtzebuerger (1.820, 6,7 %), d'Spuenier (1.022, 3,8 %) an d'Inder (889, 3,3 %).

D'Inder (889, 3,3 %), d'Ukrainer (3,0 %) an d'Syrer (770, 2,9%) sinn déi eenzeg Nationalitéite baussent der EU, déi am Joer 2023 an der Top-10 vun den Immigrante virkommen. D'Chineesen (452) sinn op der drëtter Plaz vun den asiateschen Nationalitéiten déi am meeschte vertruede sinn. D'Marokkaner (373) sinn un der Spëtzt vum afrikanesche Ranking, virun den Tunesier (329) an den Eritreeër (321). Vum amerikanesche Kontinent kommen déi meescht Immigranten aus Brasilien (483), virun den US-Amerikaner (371) an de Kolumbianer (126).

Immigratioun an Emigratioun 2023

Emigratioun

Wat d'Departen ugeet, sou maachen d'EU-Europäer 79,4 % vun der Emigratioun aus, am Verglach zu 83,8 % am Joer 2022. Vun deenen, leien d'Lëtzebuerger mat 3.102 Leit un der Spëtzt (18,7 %), virun de Portugisen (3.091, 18.6 %), de Fransousen (2.159, 13.0 %) an den Italieener (1.083, 6,5 %). No de Joren 2020 an 2021 ass et déi drëtt Kéier, datt d'Lëtzebuerger déi sinn, déi am meeschten an d'Ausland ausgewandert sinn. Am Joer 2022, waren d'Portugisen (3.633, 11,6%) un der Spëtzt vun deem Ranking.

Et sinn och d'EU-Bierger déi am meeschten emigréieren. An der Top-10 vun den Departe vu Lëtzebuerg leien d'Ukrainer op der 7. Plaz (570 Departen, 3,4 %) an d'Inder op der Plaz 10 (337, 2,0 %). Fir den amerikanesche Kontinent leien d'US-Amerikaner mat 289 Departen virun de Brasilianer (168) an de Kanadier (48). Wat Asien ugeet, kommen no den Inder d'Chineesen (164) an d'Japaner (72). Bei den afrikanesche Emigranten leien d'Kapverdianer (66) virun de Kameruner (65) an de Marokkaner (62).

Top-10 vun den Nationalitéiten 2023

Intern Migratiounen

Am Joer 2023 hunn 33.223 Leit eng Lëtzebuerger Gemeng verlooss fir sech an enger anerer Gemeng am Grand-Duché néierzeloossen. Dës Changementer vum Wunnsëtz bannent dem Lëtzebuerger Land gëtt intern Migratioune genannt; Migratioune bannent der selwechter Gemeng oder aus dem Ausland op Lëtzebuerg ginn net berécksiichtegt.

Bei der interner Migratioune leien d'Auslänner mat 55,8 % virun de Lëtzebuerger an d'Männer (51,9 %) plënnere bannent dem Land och liicht méi wéi d'Fraen. Wat den Alter ugeet, fält iwwer d'Hallschent vun der interner Migratiounen an d'Altersklass vun de jonken Erwuessenen tëscht 18 a 40 Joer (51,8 %), wärend ongeféier e Véierel an d'Altersklass tëscht 41 an 69 fält (25,2 %). Déi Jonk ënner 18 Joer maachen 18,8 % an d'Seniore vu 70 Joer an driwwer 4,2 % aus.

Op Gemengenniveau hunn 63 vun den 100 Gemengen e positive Migratiounsbilan, 34 en negativen a bei 3 Gemengen (Stauséigemeng, Munneref a Walfer) gouf et esouvill Arrivéeë wéi Departen.

Den héchste Migratiounsbilan gouf et an de Gemenge Kielen (399), Déifferdeng (246), Péiteng (222), Mäertert (196) a Mamer (181) iwwerdeems et op der anerer Säit den niddregsten Taux an der Stad Lëtzebuerg (-3.155) an an de Gemenge Stroossen (-212), Miersch (-161), Esch-Uelzecht (-121) an Dippech (-67) gouf.

Besonnesch an de Stied an a verschiddene Gemenge ronderëm d'Stad Lëtzebuerg gëtt et eng negativ intern Migratioun, iwwerdeems et ëmgedréint eng positiv international Migratioun gëtt. D'Haaptstad a verschidden Nopeschgemengen, grad ewéi verschidde méi urban Gemengen am Rescht vum Land, zéien deemno méi Immigranten aus dem Ausland un, wärend d'Lëtzebuerger éischter d'Tendenz hunn aus der Stad Lëtzebuerg an och aus aneren urbanen Zentren erauszeplënneren, fir sech a méi ländleche Gemengen néierzeloossen.

Lëtzebuerger am Ausland

Op den 1. Januar 2024 hu knapp 137.000 Leit mat Lëtzebuerger Nationalitéit baussent dem Territoire vum Grand-Duché gelieft. Déi meescht dovun a Frankräich (32.925 Leit), viru Brasilien (27.632), der Belsch (27.212) an Däitschland (20.466). Elleng an den dräi Nopeschlänner liewen ongeféier 59 % vun de Lëtzebuerger déi net zu Lëtzebuerg wunnen. Op der fënnefter a sechster Positioun kommen d'USA (14.972) an d'Schwäiz (2.859). An de leschte fënnef Joer huet sech d'Zuel vun de Lëtzebuerger a Brasilie mat 4,3 multiplizéiert, déi an den USA huet sech bal verdräifacht. Dës Erhéijung kënnt duerch déi héich Zuel vu Leit déi d'Lëtzebuerger Nationalitéit iwwer d'Recouvrements-Prozedur kruten, d. h. déi op den 1. Januar 1900 e Virfar mat Lëtzebuerger Nationalitéit haten.

Allgemeng kann ee feststellen, datt d'Zuel vun de Lëtzebuerger déi am Ausland wunnen, stänneg eropgeet (+68,5 % tëscht 2020 an 2024). Engersäits gëtt et ëmmer méi Lëtzebuerger déi d'Land verloossen a sech an engem vun den Nopeschlänner néierloossen an anersäits gëtt et vill Leit, déi d'Lëtzebuerger Nationalitéit kréien, wärend s'am Ausland wunnen.

Lëtzebuerger déi am Ausland wunnen - nom Land vun der Residenz
Nationalitéit	2020	2021	2022	2023	2024
Total	81.526	95.904	108.386	122.349	137.392
Europäesch Unioun	64.424	71.831	77.959	82.493	86.160
Frankräich	22.772	26.569	29.663	31.480	32.925
Belsch	22.205	23.981	25.385	26.450	27.212
Däitschland	16.040	17.460	18.621	19.621	20.466
Portugal	453	629	775	975	1.134
Éisträich	736	792	872	951	1.009
Spuenien	528	567	650	761	880
Holland	558	593	633	696	762
Italien	570	603	631	664	710
Europa (net EU)	3.745	4.006	4.292	4.751	5.214
CHE Schwäiz	2.269	2.368	2.525	2.693	2.859
Vereenegt Kinnekräich	1.275	1.411	1.552	1.750	1.968
Afrika	316	338	363	413	475
Cap Vert	36	48	43	68	94
Südafrika	52	55	61	62	69
Amerika	12.305	18.933	24.875	33.707	44.398
Brasilien	6.363	10.999	14.105	19.939	27.632
USA	5.060	6.833	9.501	12.268	14.972
Kanada	477	575	649	723	808
Asien	517	563	653	699	825
Vereenegt Arabesch Emirater	100	108	122	136	180
Thailand	82	89	88	101	111
Ozeanien	219	233	244	286	320

Lëtzebuerg am internationale Verglach

Am Verglach mat der Europäescher Unioun an den Nopeschlänner stécht Lëtzebuerg virun allem duerch seng demographesch Dynamik eraus. Tëscht 1970 an 2024 ass den demographesche Wuesstem an der EU just ëm 16,9 %, vun 384.326.562 Leit am Joer 1970 op 449.206.579 am Joer 2024 geklommen. Wärend der selwechter Zäit huet d'Bevëlkerung vum Grand-Duché sech bal verduebelt (+98,5 %), vun 338.507 op 672.050 Awunner.

Dëse bedeitende Populatiounswuesstem zu Lëtzebuerg, an de Wuesstemsecart am Verglach mam Duerchschnëtt an der EU, konzentréiert sech op d'Period vun 1985 bis 2024. An de leschte 15 Joer vun der iwwerwaachter Period (tëscht 1970 an 1985) ass d'Bevëlkerung vum Grand-Duché nämlech nëmmen ëm 8,2 % geklommen, wat just e bësse méi ass wéi fir d'Bevëlkerung vun den EU (+7,2 % vun 1970 bis 1985). Ënnert den Nopeschlänner ass et Frankräich, deem seng demographesch Entwécklung am nooste bei där vu Lëtzebuerg läit (Bevëlkerungserhéijung vu 35,4 % vun 1970 op 2024), duerno déi vun der Belsch (+22,5 %). An Däitschland (bannent de Grenzen no 1991), ass d'Populatioun nëmme ganz liicht geklommen (+6,6%).

Op eng méi kuerz Period gekuckt, an de leschten zéng Joer, ass den héchsten demographesche Wuesstem net zu Lëtzebuerg mä op Malta enregistréiert ginn (+31,2 %). Lëtzebuerg läit op der zweeter Plaz (+22,3 %), virun Irland (+15,2 %). D'Belsch (+5,8 %), Däitschland (+3,3 %) a Frankräich (+3,4 %) leie liicht iwwer der europäescher Moyenne (+1,4 %).

Demographesch Indicateure vu Lëtzebuerg am Verglach mat den Nopeschlänner an der EU
	Lëtzebuerg	EU	Frankräich	Belsch	Däitschland
Awunner^E	672.050	449.206.579	68.401.997	11.832.049	83.445.000
Undeel Leit vun 0 bis 24 Joer^F	27,10	25,50	29,50	28,10	24,00
Undeel Leit vu 25 bis 64 Joer^F	58,20	53,40	49,60	52,40	53,90
Undeel Leit vu 64 Joer a méi^F	14,80	21,10	21,00	19,50	22,20
Undeel Auslänner^F	47,01	-	7,80	12,80	13,10
Demographesch Indicateuren
Kanner pro Fra (Joer)^F	1,31	1,46	1,79	1,53	1,46
Liewenserwaardung Männer^F	80,80	77,90	79,30	79,70	78,30
Liewenserwaardung Fraen^F	85,20	83,30	85,10	83,90	83,00
Gebuertebilan^F	3,10	-2,90	0,80	-0,20	-3,90
Migratiounsbilan^F	20,50	8,90	2,40	10,90	17,30
Bestietnestaux^F	3,80	4,20	3,60	4,20	4,70
Scheedungstaux^F	1,90	1,60	-	1,70	-

^E op den 01.01.2024
^F op den 01.01.2023

Quell vum Artikel

François Peltier, Charlie Klein, La démographie luxembourgeoise en chiffres (Text iwwersat aus dem Franséischen), 23.10.2024, statistiques.public.lu (D'Reproduktioun vum Text oder Auszich dovun ass erlaabt, wann d'Quell zitéiert gëtt.)