Gemeng Mamer
D'Gemeng Mamer ass eng vun den 102 lëtzebuergesche Gemengen. Se läit am Kanton Capellen. De Chef-lieu vun der Gemeng ass d'Uertschaft Mamer vun där se och hiren Numm huet.
| Mamer | |
|---|---|
 | |
 d'Gemengenhaus vu Mamer | |
| Aussprooch | |
| An anere Sproochen |
fr: Mamer de: Mamer |
| Land | Lëtzebuerg |
| Kanton | Capellen |
| Buergermeeschter | Gilles Roth (CSV) |
| Awunner | 10.218 |
| 1 Januar 2021 | |
| Fläch | 2.754 ha |
| Héicht | 294 m |
| Koordinaten |
49° 37’ 38’’ N 06° 01’ 22’’ O |
| Websäit | http://www.mamer.lu/ |
 D'Gemeng Mamer (orange) am Kanton Capellen (rout) | |
Uertschaften an der Gemeng[1]Änneren
GeographieÄnneren
D'Gemeng Mamer läit westlech am Lëtzebuerger Land am Kanton Capellen. Ronderëm leien Gemenge Käerch a Kielen am Norden, Stroossen am Osten, Bartreng an Dippech am Süden, Garnech a Stengefort am Westen. D'Uertschaft Mamer läit un der Mamer.
Duerch Mamer leeft d'Nationalstrooss N6 déi op hirer ganzer Längt zu der Voie de la Liberté gehéiert.
GeschichtÄnneren
Mamer gëtt an engem Schenkungsakt vum 8. Abrëll 960, an deem d'Gräfin Liutgardis d'Uertschaft Mambra, déi si vun hiren Eltere Wigerich a Kunigunde geierft hat, un d'Klouschter Sankt Maximin vun Tréier verschenkt, fir d'éischt schrëftlech ernimmt.
Entwécklung vun der AwunnerzuelÄnneren
Quell:STATEC
WopenÄnneren
De Wope vun der Mamer Gemeng gouf an der Gemengerotsëtzung vum 27. August 1979 ugeholl, an e gouf den 12. Oktober 1979 duerch Arrêté ministériel agreéiert (Mémorial B 1979 Säit 1030). Beschreiwung sou wéi se am Arrêté steet:
D'azur à la façade de temple antique à quatre colonnes d'or, au chef du même chargé d'une roue d'azur entre deux crampons de gueule
D'Haaptfaarwe sinn aus dem Wope vun den Häre vu Miersch (Gold mat blo gesträift), den Tempel ass dra fir drun z'erënneren datt an der Réimerzäit e grousst Duerf do stoung, vun deem Iwwerreschter fonnt gi sinn, d'Rad kënnt aus dem Wope vun der bekannter humanistescher Famill Mameranus déi vu Mamer war, déi zwéi rout Kreep kommen aus dem Wope vun der aristokratescher Famill, déi och den Numm Mamer hat.
PolitikÄnneren
De Gemengerot vu Mamer gëtt nom Proporz-Walsystem gewielt. E setzt sech aus 13 Conseilleren zesummen.
ZesummesetzungÄnneren
| Joer | CSV | DP | gréng | LSAP |
|---|---|---|---|---|
| 1999 | 4 | 4 | 2 | 3 |
| 2005 | 6 | 2 | 2 | 3 |
| 2011 | 6 | 1 | 3 | 3 |
| 2017 | 6 | 1 | 3 | 3 |
Quell: Inneministère / RTL.lu /elections.lu
Buergermeeschtere vu MamerÄnneren
- Jean-Baptiste Kayl (1844-1848)[2]
- Nicolas Bornong (1852-1870)
- J.B. Risch (1870-1873)
- Jean Schmit (1873-1879)
- Jean Wester vu Mamer (1879-1897)
- Henri Funck vu Capellen (1897-1912)
- Charles Risch vu Capellen (1912-1919)
- Jean Schneider vu Mamer (1919-1929)
- J.P. Wilhelm vu Mamer (1929-1956)[3]
- Jean Marx vu Mamer (1956-1968)
- François Trausch vu Mamer (1968-1975)
- René Federspiel vu Mamer (1976-1981)
- Josy Konz vu Mamer (1982-1992)
- Henri Hosch vu Capellen (1993-1999)
- Gilles Roth vu Mamer (2000-)
Interkommunal SyndikaterÄnneren
D'Gemeng Mamer ass Member vu follgenden interkommunale Syndikater:
KuckeswäertesÄnneren
- Réimesch Thermen
1972 goufe bei archeologeschen Ausgruewungen zu Mamer no beim Tossebierg Iwwerreschter vun ë. a. Thermen aus der réimescher Zäit entdeckt.
Méi Informatioun doriwwer am Artikel: Réimesch Thermen zu Mamer.
Fräizäit zu MamerÄnneren
An der Gemeng Mamer an an der noer Ëmgéigend gëtt et en Netz vun Trëppelpied dat eng Totallängt vun 41 Kilometer huet. Nieft dem Circuit autopédestre am Juckelsbësch deen 9 Kilometer laang ass, sinn déi aner 6 gezeechent Pied tëscht 3,7 a 6,3 km laang. Eng Kaart mat den Trëppelpied kann een op der Mamer Gemeng gratis kréien.
JumelageÄnneren
- Mamer ass zanter 1976 jumeléiert mat der franséischer Gemeng Dangé-Saint-Romain.
Bekannt Leit aus der Gemeng MamerÄnneren
- Josy Barthel, Sportler a Politiker
- Josy Braun, Schrëftsteller
- Nicolas Flener, Lokalhistoriker
- Nicolas Frantz, Vëlossportler
- Jean-Claude Juncker, Politiker
- Henri Kirpach, Politiker
- Carlo Losch, Moler an Auteur
- Nicolaus Mameranus
- Ody Roos, Filmregisseur a Filmproduzent
- Mars Schmit, Moler
- Hary Trauffler, Editeur
- Henri Losch, Schrëftsteller a Schauspiller
Kuckt ochÄnneren
Um SpaweckÄnneren
| Commons: Mamer – Biller, Videoen oder Audiodateien |
ReferenzenÄnneren
- ↑ D'Nimm vun den Uertschaften entspriechen deenen déi de Kadaster, unhand vu sengen Attributiounen déi am Gesetz vum 25. Juli 2002 portant réorganisation de l’administration du cadastre et de la topographie festgehale sinn, opgestallt huet, an déi am «Registre national des localités et des rues» opgezielt sinn. Häff a Lieu-diten sinn déi localités wéi se zousätzlech am Annuaire officiel d'Administration et et de législation 2000 ënner III. Annexes opgelëscht sinn.
- ↑ ARRÊTÉ ROYAL GRAND-DUCAL, du 29 décembre 1843, n°2926f, portant nomination des Bourgmestres et Echevins des villes, et des Bourgmestres des campagnes du Grand-Duché am Memorial N°3 vun 1844
- ↑ Memorial A N° 4 vun 1946 mam Avis: Administrations communales. COMPOSITION DES COLLEGES ECHEVINAUX