Haaptmenü opmaachen

Nicolaus Mameranus

lëtzebuergesch Historiker

Den Nicolaus Mameranus gebuer de 6. Dezember 1500, vläicht als Nik Wagener, zu Mamer, a gestuerwe warscheinlech 1567 zu Augsburg, war Haffdichter a Krichsschreiwer vum Karel V.

Nicolaus Mameranus
Mameranus Statu.jpg
Mameranus-Statu zu Mamer bei der Kierch
Gebuer 6. Dezember 1500 jul.
Gestuerwen 1567
Nationalitéit Lëtzebuerg
Aktivitéit Historiker, Dichter
Wikidata-logo-without-paddings.svg

Hien huet et vum einfachen Zaldot zum Haffdichter vum Karel V. bruecht an ass mat deem sengen Arméie queesch duerch Europa, bis an Nordafrika gezunn. Tëschenduerch huet hien zu Emmerich, Köln a Bordeaux studéiert.

De Mameranus huet iwwer déi ënnerschiddlechst Theme geschriwwen: Geschicht, Theologie, Pedagogik an Numismatik, mä och satiresch Texter a Geleeënheetsgedichter.

Ee vu sengen éischte Bicher war De causa calamitatum huius temporis (1546), wou en driwwer geklot huet, wat fir schwéier Zäiten do wieren (et war zu der Zäit vun de Glawenskricher). An der Annexe vum Georg Sabinus senger Electio et coronatio Caroli V (1550) huet en iwwer säi Keeser an deem säi Räich geschriwwen. Seng Bicher huet e bei sengem Brudder Heinrich, deen zu Köln gelieft huet, drécke gelooss.

Vum Mameranus erhale sinn och Inventaireslëschte vum spueneschen Haff (Catalogus familiae totius aulae Caesarae, 1550), an e Kurtze und eugentliche Verzeychnus (1566) vum Haff beim Reichstag zu Augsburg. Ausserdeem gëtt et eng akribesch Opzielung vum spueneschen an dem géigneresche Waffenarsenal beim Schmalkaldesche Krich. D'Descriptio novi aquaeductus ass e Lueflidd op de Willebroeck-Kanal vu Bréissel, dee 1562 ageweit gouf, weider huet en iwwer de spueneschen Handkuss (Carmen de bezo las manos, 1550) geschriwwen, a Gedichter mat Wierder opgesat, déi mat C oder P ufänken (Dictiones quae ab C et P incipiunt, 1550).

Den Nicolaus Mameranus gouf 1555 vum Karel V., als eng vun deem senge allerleschten Amtshandlungen, zum Poeta laureatus a Pfalzgrof ernannt.

Hien ass warscheinlech 1567 zu Augsburg gestuerwen[1].

Literatur zum ThemaÄnneren

  • Didier, Nicolas. Nikolaus Mameranus. Ein Luxemburger Humanist des XVI. Jahrhunderts am Hofe der Habsburger. Sein Leben und seine Werke. In: Hémecht 1912-1914 (23 Deeler, ill.).

Um SpaweckÄnneren

Commons: Nicolaus Mameranus – Biller, Videoen oder Audiodateien

ReferenzenÄnneren

  1. Dem Hary Trauffler säi Theaterstéck "Nikolaus Mameranus" gouf fir de 400. Doudesdag vun dësem eminente Mamer Bierger komponéiert an opgefouert.