Schengen

Schengen
Schengen
	Vue op Schengen (2016)
Aussprooch
An anere Sproochen	fr: Schengen; de: Schengen
Land	Lëtzebuerg
Kanton	Réimech
Gemeng	Schengen
Buergermeeschter	Michel Gloden
Awunner	711
	1. Januar 2023
Fläch	10,63 km²
Héicht	147 m
Koordinaten	49° 28’ 13’’ N; 6° 21’ 50’’ O

Schengen ass eng lëtzebuergesch Uertschaft an Haaptuert vun der Gemeng Schengen.

Bekannt ass se virun allem fir d'Schengener Ofkommes dat do ënnerschriwwe gouf.

2017 krut Schengen de Label du patrimoine européen vun der Kommissioun vun der Europäescher Union zouerkannt.^[1]

Geographie

Schengen läit un der Musel, am Dräilännereck mat Däitschland a Frankräich.

Méi Informatioun doriwwer am Artikel: Dräilännereck bei Schengen.

De westlechen Deel ass duerch de Markusbierg dominéiert, de südlechen duerch de Strombierg. Wënzerei an Tanktourismus sinn déi wirtschaftlech Haaptaktivitéiten an dëser Uertschaft.

Geschicht

Tuerm beim Schengener Schlass

Archeologesch Fonntsaachen aus der Bronzezäit weisen, datt déi haiteg Uertschaft Schengen schonn deemools bewunnt war. Déi éischt schrëftlech Dokumenter stamen aus dem Joer 877.

1909 gouf déi éischt Muselbréck zu Schengen ageweit, se huet d'Pont ersat, déi zanter 1451 existéiert huet. 1939, nodeem Frankräich a Groussbritannien Däitschland de Krich erkläert haten, gouf d'Bréck zerstéiert. 1959 gouf eng nei Bréck gebaut, an eng Autobunnsbréck, e bësse weider nërdlech, ass zanter 2003 a Betrib.

Schengener Ofkommes: Firwat Schengen?

De 14. Juni 1985 gouf um Muselschëff M.S. Marie-Astrid d'Schengener Ofkommes ënnerschriwwen, dat den 19. Juni 1990 duerch d'Schengener Konventioun ergänzt gouf, an de 26. Mäerz 1995 a Kraaft getrueden ass.

Méi Informatioun doriwwer am Artikel: Schengener Ofkommes.

Schengen ass dofir erausgesicht ginn, well Lëtzebuerg 1985 d'Presidence vum Conseil vun der Europäescher Unioun hat, a fir en Accord iwwer d'Ophiewe vu Grenzkontrollen en Dräilännereck vu senger Symbolik hir ganz gutt gepasst huet. Aus praktesche Grënn gouf dofir Schengen erausgesicht, well den Dräilännereck zu Rodange an enger net fotogener Industriebrooch läit, an deen zu Léiler, am Éislek ze schwéier zougänglech fir déi ganz Ministere war. Soss géif et haut vläicht weltbekannte "Rodange-" oder "Lieler-Visae" ginn...

Seng Bekanntheet krut Schengen doduerch, datt dem Duerf säin Numm op Millioune vu Visaen a Päss aus der ganzer Welt pecht. Se äussert sech a sou skurrillen Detailer wéi deem, datt eng brittesch Rockband "Schengen" heescht, oder datt et zënter dem Enn vun den 1980er Joren zu Tanger, am Marokko, e "Café Schengen" gëtt. Caféën oder Restaurante mam Numm "S(c)hengen* gëtt et der och zu Tbilisi, Sankt Péitersbuerg, zu Nei-Delhi an zu Bukarest.^[2] Der Internet-Sichmaschinn Google no gëtt et iwwer 14,5 Millioune Säiten, wou iwwer "Schengen" rieds geet (Stand: Juli 2015).

Kuckeswäertes

Schengener Schlass

"Kochhaus" zu Schengen

D'Schlass

D' Schengener Schlass gouf 1390 gebaut. Et gouf awer, bis op den Tuerm, dee bis haut nach am ursprénglechen Zoustand ass, 1812 zerstéiert. Am 19. Joerhonnert gouf d'Schlass nees opgebaut, zum gréissten Deel aus Material vum fréiere Schlass. Den 13. September 1871 war de franséische Schrëftsteller a Politiker Victor Hugo hei op Besuch. Eng Zeechnung vum Schlass, déi e gemaach huet, ass erhalen. 1939 hunn d'Nonne vu Ste. Elisabeth d'Schlass iwwerholl. Zanter 2010 ass en Hotel am Schlass..

Just nieft dem Schlass läit e Gaart, deen Deel vum Projet Gäert ouni Grenzen ("de:Gärten ohne Grenzen") ass, an deen eng 25 Gäert am Dräilännereck ëmfaasst.

Kochhaus

Nieft dem Schlass kann een d'Kochhaus kucke goen. Et gouf 1779 gebaut an et gëtt zanter Mee 2015 no enger Renovéierung als Konferenzzentrum benotzt.

Méi Informatioun doriwwer am Artikel: Kochhaus (Schengen).

Den Tuerm vum Schlass, d'Kochhaus an e Gebai op Nr 74 an der Wäistrooss stinn um Inventaire supplémentaire vun der Lëscht vun de klasséierte Monumenter.

Centre Européen

Den 13. Juni 2010, genee 25 Joer nodeem de Schengener Vertrag ënnerschriwwe gouf, gouf am Centre Européen zu Schengen den Europa-Musée ageweit.

Op 200 Quadratmeter ginn d'Leit alles Wëssenswäertes iwwer Geschicht vum Schengener Vertrag gewuer. An der interaktiver Dauerausstellung kann ee sech historesch Fotoen, a Filmer ukucken. Zu der Ausstellung gehéiert ausserdeem eng interaktiv Kaartenanimatioun, wou een gesäit wéi Grenzen an Europa sech säit 1815 verännert hunn, een Europa-Puzzle,an een Schengen Pass Automat, wou all Visiteur sech säin eegene Schengen Pass als Souvenir ausdrécke kann.

Méi Informatioun doriwwer am Artikel: Centre européen Schengen.

D'Naturschutzgebitt Strombierg

Südlech vu Schengen läit, zum Deel an enger fréierer Gipsgrouf, d'Naturschutzgebitt Strombierg.

Literatur

Moes, G. & S. Müllenborn, 2007. Kulturlandschaft und Geologie der Region Schengen. Erausgi vun der Stëftung Hëllef fir d'Natur. Dréckerei saint-paul, 168 S. (ze kréien am Haus vun der Natur).

Fotoen

D'Musel am Dräilännereck Lëtzebuerg (vir am Bild), Däitschland (lénks hannen) a Frankräich (riets hannen). Riets vun der Mëtt vum Bild, um Uwänner vun der Musel, nieft dem Europafändel: d'Monument vum Schengener Ofkommes.
D'Musel bei Schengen. Hannen am Bild: d'Wier vun der Staustuf Schengen-Opech
Fräiheetsbam op der däitscher Säit vun der Musel mat Schengen hannen am Bild. Aquarell (1792) vum Goethe.

Kuckt och

Um Spaweck

Commons: Schengen – Biller, Videoen oder Audiodateien

Referenzen

↑ Figut, Irina, 2024. Das bringt das Kulturerbe-Siegel Schengen und Echternach. Luxemburger Wort vum 8. Oktober 2024, S. 14.
↑ Bodo Bost: "Schengen als Sehnsuchtsort." In: d'Lëtzebuerger Land Nr.29, 17. Juli 2015, S.13.

[1] Figut, Irina, 2024. Das bringt das Kulturerbe-Siegel Schengen und Echternach. Luxemburger Wort vum 8. Oktober 2024, S. 14.

[2] Bodo Bost: "Schengen als Sehnsuchtsort." In: d'Lëtzebuerger Land Nr.29, 17. Juli 2015, S.13.

[1]

[2]