Hamm (Stad Lëtzebuerg)

Hamm
Hamm
	Vue op Hamm, vun Osten aus
Aussprooch
An anere Sproochen	fr: Hamm; de: Hamm
Land	Lëtzebuerg
Kanton	Lëtzebuerg
Gemeng	Lëtzebuerg
Buergermeeschter	Lydie Polfer (DP)
Awunner	1.566
	31. Dezember 2022
Fläch	407,61 ha
Héicht	360,6 m
Koordinaten	49° 36’ 25’’ N; 06° 10’ 08’’ O

Dësen Artikel beschäftegt sech mat dem Quartier Hamm vun der Stad Lëtzebuerg. Fir aner Plaze mat dem selwechten Numm, kuckt wgl. Hamm.

Hamm ass ee vun de 24 offizielle Quartiere vun der Stad Lëtzebuerg a läit am Oste vun der Haaptstad.

Vun 1874 bis 1920 war et eng eegestänneg Gemeng Hamm.

Geographesches

Hamm ass 407,61 Hektar grouss a läit op enger Héicht tëscht 248,9 an 360,6 m. De Quartier grenzt am Norden un den Zens an dann, am Sënn vun der Auer, un d'Gemenge Sandweiler an Hesper an d'Quartiere Bouneweg-Süd a Polvermillen.

Hamm steet op engem Plateau am Oste vun der Stad Lëtzebuerg, tëscht dem Hammer Dällchen am Norden an dem Uelzechtdall. De Fluchhafe Lëtzebuerg um Findel mécht am Nordosten d'Grenz. Ee vun de gréisste Bëscher vun der Gemeng ass den Hammer Bësch, dee mat sengen 130 ha op der Sandweiler Säit läit. Do ass och den amerikaneschen Zaldotekierfecht ze fannen.

Geschicht

Den Numm Hamm gouf fir d'éischt am Joer 1238 an engem Akt vun der Gräfin Ermesinde ernimmt.

1796 war Hamm – op der Ferrariskaart vu 1778 als « Hamme » agezeechent – eng kleng Uertschaft mat nonzeg Awunner. Se krut awer méi Bedeitung duerch déi fënnef Millen op der Uelzecht: d'Gantebeensmillen, d'Follmillen, d'Schläifmillen, d'Bouneweger Millen an d'Polvermillen.

Nodeems d'Bridder Samson a Quetschlik Godchaux 1835 d'Schläifmillen an duerno och déi aner Mille kaaft an eng Duchfabrick gegrënnt hunn, gouf et Aarbecht fir eng ganz Rëtsch Leit an Hamm gouf en Aarbechterduerf. Zäitweis hu bis 800 Leit an der Draperies de Luxembourg S.A. geschafft.

Duerch dës industriell Entwécklung hunn d'Godchaux Bridder et fäerdeg bruecht, datt Hamm vu Sandweiler getrennt an den 1. Januar 1874 eng eegestänneg Gemeng gouf. Wéinst dem Éischte Weltkrich koum d'Fabrick a Schwieregkeeten, wat natierlech och Konsequenze fir d'Gemengefinanzen hat. D'Gemeng Hamm war du séier bereet fir 1920 mat der Stad Lëtzebuerg ze fusionéieren.

Iwwerdeems 1939 just nach 150 Leit an der Duchfabrick geschafft hunn, war et nom Zweete Weltkrich ganz eriwwer mat der Produktioun.

1931 gouf am Kierchegronn – baussent dem Duerfkär – eng Kolonie mat knapp 70 Eefamilljenhaiser gebaut^[1] an 1960 ass d'Zivilhospiz gebaut ginn.

Anescht wéi an anere Quartieren, goufen et keng grouss Wunnengsbauprojeten zu Hamm, absënns well d'Uertschaft an der Afluchschneis vum Fluchhafe läit.

Gemeng Hamm

Vum 1. Januar 1874 bis den 1. Juni 1920 war Hamm eng eegestänneg Gemeng.

Méi Informatioun doriwwer am Artikel: Gemeng Hamm.

Awunner

Demographie iwwer d'Zäit


Joer	1796	1803	1890	2018	2021
Awunnerzuel	90	95	668	1 456	1 519

Awunner haut

Op den 31. Dezember 2022 hunn zu Hamm 1.566 Leit gewunnt. Den Undeel vun de Lëtzebuerger louch bei 43,52 % géintiwwer 56,48 % Auslänner^[2].

**Hämmer no Nationalitéit** (31. Dezember 2022)
Rang	Nationalitéit	Awunner	Prozent
	TOTAL	1 566	100,00
1	Lëtzebuerg	682	43,55
2	Portugal	228	14,56
3	Frankräich	185	11,81
4	Italien	81	5,17
5	Belsch	42	2,68
6	Spuenien	37	2,36
7	Däitschland	24	1,53
8	China	20	1,28
8	Indien	20	1,28
10	Rumänien	18	1,15
	Top 10	1 337	85,38
	Aner Nationalitéiten	229	14,62