Mëllerdall Trail

Mëllerdall Trail, offiziell Mullerthal Trail, ass en zesummegesate Wanderwee an der Klenger Lëtzebuerger Schwäiz, deen iwwer 113,47 km dräi Wander-Circuite virgesäit, déi op de Schëlter "Route" genannt ginn. Zousätzlech gëtt et nach véier Extratier vun am Ganze 76,15 km, déi un d'Circuiten ugebonne sinn.

Mëllerdall Trail

Panorama op der Route 1
Iwwersiicht vum Pad
vu(n)	Iechternach
op	Fiels
Längt	189,62 km
Land	Lëtzebuerg
féiert duerch	Iechternach, Rouspert-Mompech, Bech, Bäerdref, Konsdref, Hiefenech, Waldbëlleg, Beefort, Reisduerf, Ärenzdallgemeng, Fiels, Noumer, Jonglënster, Steesel, Nidderaanwen

Routen, Etappen an Extratier

Circuit	Etapp	Streck	Plang	Distanz	Total
Route 1	1. Etapp	Iechternach - Méischdref	Plang	18,40 km	36,45 km
	2. Etapp	Méischdref - Iechternach		18,05 km
Route 2	1. Etapp	Iechternach - Mëllerdall	Plang	13,00 km	38,78 km
	2. Etapp	Mëllerdall - Iechternach		25,78 km
	Extratour C	Bech - Altréier	Plang	9,14 km	9,14 km
Route 3	1. Etapp	Mëllerdall - Fiels	Plang	20,30 km	38,24 km
	2. Etapp	Fiels - Mëllerdall		17,94 km
	Extratour A	Miedernach - Fiels	Plang	22,95 km	22,95 km
	Extratour B	Beefort - Bigelbaach	Plang	12,91 km	12,91 km
	Extratour D	Buerglënster - Blummendall	Plang	31,15 km	31,15 km
Total					189,62 km

Streck

Route 1: Iechternach - Méischdref - Iechternach

Giischterklaus

D'Route 1 vum Trail ass 36,45 km laang an ass an zwou Etappen opgedeelt: déi éischt geet vun Iechternach laanscht Steenem, Rouspert, Giischterklaus, Giischt, Bur op Méischdref. Déi zweet Etapp féiert da vu Méischdref iwwer Mompech, Hierber, Frombuerg hannescht op Iechternach.

Route 2: Iechternach - Mëllerdall - Iechternach

Priedegtstull

D'Route 2 ass 38,78 km laang an ass och an zwou Etappen opgedeelt: déi éischt geet vun Iechternach duerch d'Wollefsschlucht, laanscht de Perekop an d'Huel Lee op Bäerdref an da laanscht d'Raiberhiel, de Priedegtstull an d'Werschrummschlëff bis an de Mëllerdall. Vum Mëllerdall aus geet déi zweet Etapp da laanscht de Schéissendëmpel, Präiteler, Konsdrëffer Millen, Heeschbreg, Wuelper, Scheedgen, Lauterbuer an de Melickshaff zeréck op Iechternach.

Vun Heeschbreg aus leeft den Extratour C iwwer d'Schanz laanscht Zëtteg a Bech bis op de Flouer Schwaarzuecht bei Wuelper, wou en nees op der Route 2 erauskënnt.

Route 3: Mëllerdall - Fiels - Mëllerdall

Schéissendëmpel

D'Route 3 vum Trail ass 38,24 km laang an och déi ass an zwou Etappen opgedeelt: déi éischt geet vum Mëllerdall laanscht d'Schwaarz Iernz bis bei d'Grondhaffer Schlass, laanscht d'Halerbaach an d'Haupeschbaach op Beefort. De Pad féiert weider laanscht de Grewenhaff, Firtgeshaff an de Schwanterhaff bis an d'Fiels. Déi zweet Etapp féiert da vun der Fiels laanscht d'Wäiss Iernz, duerch d'Supp, laanscht Reiland an de Blummendall, duerch de Marscherwald a laanscht Präiteler an de Schéissendëmpel hannescht an de Mëllerdall.

Den Extratour A ass e Circuit dee vu Miedernach laanscht Schrondweiler, iwwer Noumer, duerch d'Noumerleeën a laanscht Meesebuerg an d'Fiels leeft. Vu do aus geet en iwwer d'Route 3 bis op den Ausgankspunkt zu Miedernach.

Vu Beefort aus geet den Extratour B duerch d'Beeforterheed, laanscht Déiljen, d'Scheedheck an d'Bigelbaach zeréck op Beefort.

Den Extratour D leeft vu Buerglënster aus iwwer Allënster, Schiltzbierg an de Blummendall, wou en Uschloss un d'Route 3 huet. Vun do aus geet en iwwer Jonglënster, Gonnereng an duerch de Gréngewald hannescht op Buerglënster.

Literatur

• Hoyer, T., 2010. Luxemburg: Mullerthal Trail. 112 S. Conrad Stein Verlag, an der Série Der Weg ist das Ziel. ISBN 978-3-86686-266-1 (Ze kréien an den Touristebureauën am Mëllerdall, z. B. an der Heringer Millen).

Kuckt och

• Wanderweeër zu Lëtzebuerg

Um Spaweck

Commons: Mëllerdall Trail – Biller, Videoen oder Audiodateien

• mullerthal-trail.lu