Polvermillen

Ee vun de 24 offizielle Quartiere vun der Stad Lëtzebuerg
(Virugeleet vu(n) Polfermillen)

D'Polvermillen[1] ass e Quartier am Oste vun der Stad Lëtzebuerg.

Polvermillen
PULVERMUHLE in WINTER, LU.jpg
Aussprooch
An anere Sproochen fr: Pulvermuhl
de: Pulvermühle
Land Lëtzebuerg
Kanton Lëtzebuerg
Gemeng Blason ville lu Luxembourg-ville.svg Lëtzebuerg
Buergermeeschter Lydie Polfer (DP)
Awunner 361 (31.12.2017)
Fläch 24,82 ha
Koordinaten 49° 36’ 33.1’’ N
      06° 09’ 06.2’’ O
Pulvermuhl quarter highlighted.png
D'Polvermillen (blo)
an der Stad Lëtzebuerg (gro)

NummÄnneren

Den Numm kënnt vun enger fréierer Millen (1562 dokumentéiert[2]) an där Holzkuele gemuel gouf, déi bei der Fabrikatioun vu Polver gebraucht gouf. Aus engem Akt vu 1668 geet ervir datt do e gewësse Peter Polffer Mëller war, dohier och d'Schreifweis Polffermillen déi een och geleeëntlech fënnt. Ëm 1795 goufen do Käre gemuel an ëm 1843 war do d'Kottengsspënnerei Kuborn. 1862 hu Conrot & Lamort eng Tricotsfabréck do bedriwwen an 1876 gouf se vun der Duchfabréck vun de Bridder Quetschlik a Samson Godchaux iwwerholl.

GeschichtÄnneren

Den 1. Januar 1874 (Gesetz vum 20. Dezember 1873[3]) ass aus der Sektioun Polvermillen an der Sektioun Hamm (mat den Uertschaften Hamm, Schläifmillen, Fetschebuer, Hammer Dällchen, Scheedgronn, Zens an Tawioun[4]), wat bis zu deem Zäitpunkt Sektioune vun der Gemeng Sandweiler waren, d'Gemeng Hamm entstanen. Dës huet hirersäits, zesumme mat de Gemengen Hollerech a Rollengergronn, den 1. Juni 1920 (Gesetz vum 26. Mäerz 1920) mat der Stad Lëtzebuerg fusionéiert.

Industrielle SiteÄnneren

Do wou fréier noeneen eng Millen, eng Kottengsspënnerei mat Fierwerei, eng Duchfabrick, en Atelier fir Seelzich ze produzéieren (Secalt) an eng industriell cheemesch Botzerei (Express nettoyage à sec) waren, huet de Stater Gemengerot de 14. Dezember 2015 gréng Luucht gi fir en neie Wunnquartier mat tëscht 200 an 230 Logementer (25.000 m²) a Büroen (1.600 m²) ze bauen. Mat an de Projet agebonne ginn och fënnef Gebaier déi um Inventaire supplémentaire vun den Nationalmonumenter stinn[5]. Dozou gehéieren och den eckege Schaarschtech an d'Kesselhaus an deem d'Dampmaschinn installéiert war.

Ier mat de Bauaarbechten ugefaange ka ginn, muss de Buedem um fréieren Industriesite sanéiert ginn. Nodeems schonn am Summer 2019 déi meescht Réckstänn vun Ueleg a Bensinn vun der Secalt eliminéiert waren[6], ass Enn vun deem Joer och mat den Aarbechten ugefaange ginn, fir de Buedem vun de cheemesche Réckstänn vun der fréierer Botzerei ze sanéieren. Do dernieft mussen och nach zwou Brécke méi breet a méi stabil gemaach ginn[7].

AwunnerÄnneren

2011 hunn op der Polvermillen 330 Leit gewunnt; op den 31.12.2017 waren et der 361. Den Undeel vun de Lëtzebuerger louch bei 31,30 % géintiwwer 68,70 % Auslänner[8].

Polvermillener no Nationalitéit
Rang Nationalitéit Awunner Prozent
TOTAL 361 100,00%
1   Lëtzebuerg 113 31,30%
2   Portugal 82 22,71%
3   Frankräich 50 13,85%
4   Italien 18 4,99%
5   Rumänien 13 3,60%
6   Däitschland 11 3,05%
7   Belsch 10 2,77%
  Griicheland 7 1,94%
8   Spuenien 7 1,94%
9   Vereenegt Kinnekräich 6 1,66%
10   China 4 1,11%
  Algerien 4 1,11%
  Irland 4 1,11%
  Polen 4 1,11%
  Cap Vert 4 1,11%
Top 10 337 93,35%
Aner Nationalitéiten 24 6,65%

BillerÄnneren

Literatur zum TheemaÄnneren

  • Hoffmann, Hubert: Pulvermühl im Laufe der Zeit, 1963

Um SpaweckÄnneren

Commons: Polvermillen – Biller, Videoen oder Audiodateien

Referenzen an NottenÄnneren

  1. och an der Schreifweis Pollfermillen ze fannen
  2. Schneider Klaus,Schläifmillen:Geschichte und Gegenwart
  3. Loi du 20 décembre 1873, créant une nouvelle commune du nom de Hamm op legilux.lu (gekuckt den 10. Februar 2018)
  4. Schreifweis am Gesetzestext: "Schleifmuhl, Fetschenbour, Haemmerstellgen, Scheidgrund, Scheidhof, Zens et Tavion"
  5. 230 logements sur les friches de Pulvermühle op bricks.lu, gekuckt den 18. Abrëll 2020
  6. Pulvermühle: Ein Bauvorhaben sorgt für Aufsehen op wort.lu de 26. Juli 2019, gekuckt den 19. Abrëll 2020
  7. Das weiße Zelt - Sanierungsarbeiten auf früherem Industriegelände in der Pulvermühle haben begonnen op tageblatt.lu den 20. Dezember 2019, gekuckt den 18. Abrëll 2020
  8. État de la population 2017 - Statistiques sur la population de la Ville de Luxembourg op vdl.lu, der Websäit vun der Stad Lëtzebuerg (gekuckt den 8. Februar 2018)