Haaptmenü opmaachen

Xavier Bettel

Lëtzebuergesche Politiker, Affekot

De Xavier Bettel, gebuer den 3. Mäerz 1973 an der Stad Lëtzebuerg, ass e lëtzebuergeschen Affekot an DP-Politiker. Hien ass zanter dem 5. Dezember 2018 Premierminister an der Regierung Bettel-Schneider-Braz, wou en zousätzlech Minister fir Kommunikatioun an de Kultus ass. Déi selwecht Fonctiounen (mat zanter 2015 zousätzlech dem Kultur-Ressort ) hat hie virdru scho vum 4. Dezember 2013 bis de 4. Dezember 2018 an der Regierung Bettel-Schneider.

Xavier Bettel
Tallinn Digital Summit. Handshake Xavier Bettel and Jüri Ratas (36718144533) CROP BETTEL.jpg
De Xavier Bettel, 2017.
Gebuer 3. Mäerz 1973
Lëtzebuerg
Nationalitéit Lëtzebuerg
Educatioun Université Nancy-II
Aktivitéit Politiker
Partei Demokratesch Partei
Famill
Bestuet mat Gauthier Destenay
Wikidata-logo-without-paddings.svg

Seng CarrièreÄnneren

Nom Ofschloss vum Secondaire classique am Lycée Hélène Boucher zu Diddenuewen a Frankräich [1] huet hien eng Maîtrise am Droit public an am Droit européen op der Droits-Fakultéit vun der Universitéit Nanzeg gemaach, an duerno och do en DEA a Politikwëssenschaft an am Ëffentleche Recht.[2] Vu 2001 bis 2013 war hien Affekot um Barreau vu Lëtzebuerg.[2]

1989 gouf hie Member an der Demokratescher Partei an 1989 Komiteesmember a Member vum Nationale Büro vun der JDL (Jeunesse démocrate et libérale) am Bezierk Zentrum.

1991 gouf hie President am Bezierk Zentrum a Vizepresident op nationalem Niveau vun der JDL. Hie war President vun der JDL vun 1994 bis 2002.

Bei de Gemengewale vum 10. Oktober 1999 ass hie fir d'éischt an de Gemengerot vun der Stad Lëtzebuerg gewielt ginn. 2005 gouf hie Schäffen. Bei de Gemengewale vum 9. Oktober 2011 gouf hien Éischtgewielten, virum amtéierende Buergermeeschter Paul Helminger. De 24. November 2011 gouf hien als neie Buergermeeschter vun der Stad vereedegt a blouf dat bis bis zu senger Ernennung zum Premierminister.

Den 13. Juni 1999 gouf hie fir d'éischt an d'Chamber gewielt. Bei de Chamberwale vum 13. Juni 2004, deene vum 7. Juni 2009, deene vum 20. Oktober 2013 an deene vum 14. Oktober 2018[3] ass hien als Deputéierten all Kéier erëmgewielt ginn. 2009 bis 2013 war hie President vun der parlamentarescher Fraktioun vun der DP.[2]

Als Folleg vun de Chamberwale vum 20. Oktober 2013 ass hien de 25. Oktober vum Grand-Duc Henri zum Formateur vun der neier Regierung ernannt ginn.[4] Dës Koalitioun aus DP, LSAP an Déi Gréng gouf de 4. Dezember 2013 vereedegt. D'Resultat vun de Chamberwale vum 14. Oktober 2018 huet et erméiglecht, déi selwecht Koalitioun virunzeféieren, an esou gouf de Xavier Bettel de 5. Dezember 2018 op en neies als Premierminister, dës Kéier vun der Regierung Bettel-Schneider-Braz, vereedegt.

Vum 29. Januar 2013 bis den 28. November 2015 war hie President vun der DP.[5]

Säi PrivatliewenÄnneren

Hien ass gebuer als Bouf vun engem Wäinhändler an enger Franséisin mat russeschen Originen (Famill vum Komponist a Pianist Rachmaninow[6][7][8]).

Den 28. Juni 2008 huet de Xavier Bettel an der RTL-Emissioun "Background" offen zu senger Homosexualitéit Stellung geholl. Hien ass zënter dem 15. Mee 2015 mam belschen Architekt Gauthier Destenay bestuet,[9] mat deem en zënter 2010 gepacst war.

GielercherÄnneren

Kuckt ochÄnneren

Um SpaweckÄnneren

Commons: Xavier Bettel – Biller, Videoen oder Audiodateien

ReferenzenÄnneren