Thomas Byrne (Industriellen)

Dësen Artikel beschäftegt sech mat dem ireschen Industriellen Thomas Byrne. Fir Persoune mat dem selwechten Numm, kuckt wgl. Thomas Byrne.

Den Thomas Byrne, gebuer 1824 zu Kilcullen an Irland a gestuerwen den 9. September 1884 an der Stad Lëtzebuerg, war en ireschen Ingenieur, Industriellen a Schmelzhär.

Thomas Byrne
Gebuer	1824 Kilcullen
Gestuerwen	9. September 1884 Lëtzebuerg
Nationalitéit	Vereenegt Kinnekräich
Aktivitéit	Ingenieur, Entreprener, Industriellen
Famill
Bestuet mat	Geneviève Baustert

Den Thomas Byrne koum kuerz virun 1860 mat enger Grupp vun auslänneschen Ingenieuren an Techniker ënnert der Leedung vum Edmond Le Gallais op Lëtzebuerg. Dës Leit, déi op de Bau vun Eisebunnsbrécke spezialiséiert waren, hunn ë. a. beim Bau vun de Brécken op der Nordstreck matgeschafft an déi brittesch Firma Waring Brothers ënnerstëtzt.

Nodeems d'Eisebunn bis an d'Gebitt vun de belsche Schmelze gebaut war an am Minett och déi nei Strecke vu Beetebuerg op Esch a weider op Däitsch-Oth grad wéi Näerzeng-Rëmeleng op waren, huet den Thomas Byrne sech fir déi lokal Minièren interesséiert. Hien huet verschidden äerzhalteg Terrainen um Téitenger a Rëmelenger Flouer kaaft, ë. a. op Kolscheid a besonnesch a Walert, där Minn, déi der MMR gehéiert huet an 1963 zougemaach gouf.

1872, zur selwechter Zäit wéi den Nic. Gonner d'Rëmelenger Schmelz opgemaach huet, huet den Thomas Byrne zesumme mam Charles Collart an 31 anere Leit d'Société des hauts-fourneaux de Rodange gegrënnt an 1874 huet den neie Schmelzhär ugefaange seng Schmelz ze bedreiwen. Bis 1897 hat d'Stolwierk zwee Héichiewen; de Jean-Pierre Hardt huet méi spéit nach en drëtte baue gelooss.

Um Enn vun den 1870er Joren huet de Byrne vum belschen Architekt Victor Besme d'Villa des Roses um Boulevard Royal an der Stad baue gelooss, an där hien och eng Zäitche gewunnt huet.

Den Thomas Byrne huet säi Betrib patriarchalesch geleet. Och wann hie vum Gesetz hier zu kenge Sozialleeschtunge verflicht war, huet hien awer eng Zort Betribskichen ageriicht, an där hien de Mineuren, déi Dag fir Dag schwéier geschafft hunn, op seng Käschten zousätzlech Moolzechte verdeelt huet.

Dat fréiert Byrne-Haus zu Rëmeleng

Am Ufank vun den 1880er Joren huet hien an der Rue des Martyrs en herrschaftlecht Haus baue gelooss, mat baussenzegen Elementer vum engleschen Architekturstil. An de Ställ nieft dem Haus stoungen dem Byrne seng Grouewepäerd. Wéi d'Rëmelenger Schmelz 1888 vun der neier Société des hauts-fourneaux de Rumelange iwwerholl gouf, ass d'Thomas-Byrne-Haus un de lokale Grouwebesëtzer Boever-Mettelock iwwergaangen.

Den Thomy Byrne ass den 9. September 1884 an der Stad gestuerwen. D'Rëmelenger Minn ass u seng Wittfra Geneviève Byrne-Baustert gaangen, déi d'Minn nach eng Zäit laang bedriwwen huet. Nom Byrne seng Doud ass d'Geneviève Byrne-Baustert an d'Stad geplënnert wou si hir lescht Joren an der Fondation Pescatore verbruecht huet.

Den Thomy Byrne grad ewéi seng Fra sinn um Nikloskierfecht begruewen.

Stroosseschëld zu Hamm

Éierungen

Fir un den Thomas Byrne z'erënneren, sinn am Stater Quartier Hamm an zu Téiteng jeeweils eng Strooss no him genannt.

Um Spaweck

• Aus dem Minett In: Luxemburger Wort, 113. Jg., n° 238 (25.08.1960), S. 4.
• Aus der Rümelinger Bergbaugeschichte. In: Luxemburger Wort, 124. Jg., n° 111 (21.04.1971), S. 6.
• Byrne Thomas Rumelange - Luxembourg, Geschichtlicher Überblick op industrie.lu