Bréck Gare Houwald

Bréck iwwer d'Gare Houwald
	De Bau vun der Bréck (August 2022)
Geographie
Land	Lëtzebuerg
Plaz	Lëtzebuerg (Gaasperech); Gemeng Hesper (Houwald)
Koordinaten	49° 34’ 52.3’’ N; 06° 07’ 57’’ O
Funktioun
Benotzt als	Bréck fir ëffentlechen Transport, Foussgänger a Vëloen
Féiert iwwer	CFL-Linn 6; CFL-Linn 4
Technesch Detailer
Bréckentyp	Dunnebréck
Material	Stol

D'Bréck bei der Gare um Houwald ass eng Bréck déi zanter 2022 am Bau ass an iwwer déi d'Linn T1 vum Stater Tram an och Bussen, Vëloen a Foussgänger vum Houwald, iwwer d'Gare Houwald an iwwer d'Zuchgleiser ewech, am Uschloss un d'Y-Bréck iwwer d'Autobunn A3, an de Ban de Gasperich fueren, respektiv goe kënnen^[1].

Historique

De Bau vun der Bréck gouf bis Enn 2023 duerch eng juristesch Streiderei ëm eng Parzell, déi dem Olos Fund gehéiert, gehënnert: De Staat huet 2020 eng Expropriatiounsprozedur vun der Parzell fir utilité publique an d'Weeër geleet, déi awer vum Proprietär viru Geriicht a Fro gestallt gouf. Am Dezember 2023 gouf eng Eenegung am Gudden tëscht Proprietär a Staat fonnt.^[2] Fir virunzekommen, gouf awer schonn 2022 mam Bau vun enger schmueler Versioun vun der Bréck ugefaangen, nërdlech vun der kontestéierter Parzell.^[3] Dat bréngt mat sech, datt den Tram zënter der Verlängerung vun der Linn op d'Cloche d'or (de 7. Juli 2024) a bis viraussiichtlech 2026 just op engem Gleis fuere kann, bis dat Stéck, dat feelt, fäerdeg gebaut ass^[4].

D'Tramshalt Howald Gare gouf provisoresch westlech vun der Bréck amenagéiert a gëtt awer op d'Bréck geréckelt, soubal déi fäerdeg ass. Vun der Tramshalt kënnt een engersäits erof op d'Quaie vun der Zuchgare an anersäits op d'Busgare vum Pôle d'échange Houwald.

Biller

Nërdlechen Deel vun der Bréck; Tramshalt, Zougang op d'Gare (Mee 2024).
Accès vum Boulevard des Scillas erop op d'Bréck; eréischt déi nërdlech Hallschecht ass gebaut (Mee 2024)
Bau vun der Stäipmauer vun der Ramp fir déi 2. Hallschecht (Juli 2024).
D'Dunne vun der 2. Hallschecht vun der Bréck gi geluecht (Aug. 2024)