Fort vun Ében-Émael

Fort vun Ében-Émael
Land	Belsch
Gemeng	Bassenge
Plaz	Eben-Emael
Koordinaten	50°47'49,99"N, 5°40'50,99"O
Datum vum Bau	1. Abrëll 1932
Genannt no	Eben-Emael

De Fort vun Eben-Emael ass eng vun de véier neie Festunge vum Lécker Festungsrank. E gouf tëscht 1932 an 1935 gebaut a sollt d'Haaptfestung am Norde vun der Position fortifié de Liège sinn.

De Fort läit ronn 10 km südlech vu Maastricht um Territoire vun Eben-Emael op der Montagne Saint-Pierre, déi tëscht dem Dall vun der Meuse (Floss) an dem Geer läit. Op 10 km am Süde läit déi belsch Stad Visé. D'Kasematten déi zu der Säit vun deene Stied leien hunn dofir den Numm, Maastricht 1 an 2, a Visé 1 an 2.

E läit 65 Meter iwwer dem Albertkanal, dee Léck mat Antwerpen verbënnt, an deen op der Héicht vum Fort duerch Tranchée de Caster, e kënschtlechen Aschnëtt duerch de Bierg, leeft. Eng Kuppel an eng Kasematt hunn direkt de Kanal iwwerwaacht.

De Grondrëss, ass en onreegelméissege Fënnefeck, mat enger Fläch vu 75 ha. Déi iewescht Strukture vun der Festung hunn eng Fläch vu 45 ha, wat aus dem Fort vun Eben-Emael, deemools déi gréisst Festung gemaach huet, déi jee gebaut gouf.