Fort de la Pompelle

De Fort de la Pompelle ongeféier 5 km südlech vu Reims läit op der lénkser Säit vun der Nationalstrooss déi vu Reims op Châlons-en-Champagne féiert, um Territoire vun der Gemeng Sillery. E gouf nom Franséisch-Preisesche Krich vun 1870/1871, tëscht 1880 an 1883 gebaut fir de Festungsrank vu Reims ze verstäerken, an huet zum System Séré de Revières gehéiert. En ass 2,31 ha grouss, an am Fort waren déizäit 6 Kanoune vun 155 mm, 4 Kanoune vum 138 mm a schwéier Maschinnegewierer als Bewaffnung. Eng Garnisoun vun 277 Mann war stänneg do stationéiert.

D'Entrée vum Fort am Mee 2007

De Fort gouf 1913 vun de Fransousen opginn an desarméiert. Sou koum et datt déi däitsch Truppen en am Ufank vum Éischte Weltkrich direkt besat hunn. D'Fransousen hunn et eréischt erëm kritt wéi se d'Preisen op der Marne geklappt haten. Vun do un, gouf en Haaptstützpunkt vun der franséischer Arméi.

Déi ganz Géigend ëm Reims gouf schwéier vun den däitschen Arméie bombardéiert, an Stad Reims gouf praktesch ganz zerstéiert. Mä déi franséisch Truppen am fort hunn duergehaalen. Am Ganzen hu sech 180 Regimenter der Rei no d'Hand ginn, fir d'Plaz ze verdeedegen. An där Zäit hat d'Besatzung en Effektif tëscht 1.500 an 2.000 Mann, an déi däitsch Truppe konnten de Fort ni mé anhuelen, am Contraire zu den anere Forten déi ronderëm louchen.

D'Truppen aus dem Fort goufen doderbäi vun der franséischer Marinn ënnerstëtzt déi mat Kanounebooter um Kanal tëscht Sept-Saulx a Courmelois louchen, an déi, déi däitsch Linne bombardéiert hunn.

Haut ass de Fort e Miltärmusée an deem e vill Kollektioune ka gesinn, ënner anerem eng vu 560 däitschen Helmer, aus enger Privatsammlung.

An de Vitrinne si Stécker ausgestallt déi den Zaldoten deemools gehéiert hunn, an op Mannequine kann en d'Uniforme vun der franséischer a vun alliéierten Arméie gesinn.

Eng Vitrinne erënnert un de russeschen Expeditiounscorps, deen den Tzar Nicolas II. dohi geschéckt hat fir de Fransousen ze hëllefen. Als Prise ge Guerre ass de Kavaleriesmantel vum däitsche Keeser Wëllem II. ze gesinn.

D'Liewen an den Tranchéen ass am Sall vun de Crapouillots duergestallt, an den Deel iwwer d'Aviatioun erënnert un de René Dorme, Pilot mat 23 homologéierte Victoiren, an deen iwwer dem Fort afgeschoss gouf.

Et gëtt och iwwer d'Kolonialarméi erzielt déi mat hirem éischte Corps ënner dem Generol Mazillier do vertruede war.

Imitéiert 155 GPF Kanoun um Glacis vum Fort de la Pompelle. Dës Kanoun soll nëmmen ongféier duerstellen, wéi eng GPF ausgesinn huet. GPF heescht Grande Puissance Fillioux nom Numm vu sengem Constructeur. Op dësem Bild ass awer just d'Lafette vun enger GPF. De Kanounelaf ass vun engem AMX 30 Tanks. Eng vun de wéinegen erhalene GPF Kanoune kann een am Artillerie's Musée zu Draguignan gesinn .

Eng 105 mm Schneider Kanoun um Glacis vum Fort de la Pompelle. Dës Schneider Kanoun kënnt aus Italien, wou se ënner Lizenz vun der Firma Ansaldo vu Genua 1918 gebaut gouf. Et ass awer net nozevollzéien, wéi a firwat datt se an der Champagne gelant ass.

Kuckt och

• Militärarchitektur: Approche - Bockellinn - Caponnière - Contre-escarpe - Courtine - Escarpe - Glacis - Kasematt - Ravelin - Redoute - Reduit - Zitadell

• Festung Lëtzebuerg: mat: Bastioun Louis - Fort Olizy - Fort Thüngen - Kasematten - Malakoff-Tuerm - Nei Paart - Spueneschen Tiermchen
• Festungen an der Belsch: Fort de Tancrémont - Fort de Battice - Fort d'Aubin-Neufchâteau - Fort d'Eben Emael - Fort d'Évegnée-Tignée - La Chartreuse - Zitadell vu Léck
• Festungen a Frankräich: Maginot-Linn - Château d'If - Fort d'Illange - Fort de Villy-La Ferté - Fort de la Pompelle - Zitadell Montmédy - Tour Solidor - Fort de Charlemont - Fort-La-Latte - Mont-Dauphin - Zitadell vu Bitche - Redoute de la Justice
• Festungen an Italien: Festunge vu Folgaria - Trentiner Festungen
• Festungen an Norwegen: Festung Akershus
• Festungen a Portugal: Fortaleza de Sagres - Tuerm vu Belém
• Festungen an den USA: Alcatraz
• Festungen a Kanada: Zitadell vu Québec

Um Spaweck

Commons: Fort de la Pompelle – Biller, Videoen oder Audiodateien