Stadbriedemes

Stadbriedemes
Stadbriedemes
	Gemengenhaus vu Stadbriedemes
Aussprooch
An anere Sproochen	fr: Stadtbredimus; de: Stadtbredimus
Land	Lëtzebuerg
Kanton	Réimech
Gemeng	Stadbriedemes
Buergermeeschter	Robert Beissel
Awunner	940
	1. Januar 2023
Héicht	147 m
Koordinaten	49° 33’ 49’’ N; 6° 21’ 52’’ O

Stadbriedemes ass eng lëtzebuergesch Uertschaft, an Haaptuert vun der Gemeng Stadbriedemes.

Den Numm kënnt vum Keltesche "Bre - den - Es", dat sou vill wéi "iwwer dem Waasser héije Buedem" heescht a "Stad" wat de dee selwechte Sënn wéi "Ufer" (vun der Musel, an dësem Fall) huet.

Geographie

Stadbriedemes läit op der Musel, vis-à-vis vum däitsche Palzem.

Geschicht

Wéi d'Musel kanaliséiert gouf, hunn Aarbechter, do wou haut d'Staustuf steet, Iwwerreschter vun enger réimescher Bréck fonnt. Analysen hunn erginn, datt déi Bréck méi al wéi Tréier ass.

Méi Informatioun doriwwer am Artikel: Monument Réimerbréck zu Stadbriedemes.

Sou goungen d'Réimer bei Stadbriedmes iwwer eng Furt, aus Gestengs, op déi aner Säit vun der Musel, wann de Floss niddreg war. Bei héijem Waasser hu si Pontone benotzt. Fir déi viru Feinden ze beschützen hate si, op der Plaz vum spéidere Schlass, e befestegten Tuerm opgeriicht.
1857 gouf, op der "Rauknupp", e réimesche Kierfecht, mat Kréi, Mënzen, Schosselen a soss Geschier fonnt.

Am 8. Joerhonnert huet de Pippin de Jonken den Haff Réimech, zu deem och Stadbriedemes gehéiert huet, der Abtei Sankt Maximäin vun Tréier geschenkt. Méi spéit goung den Haff un d'Abtei vu Prüm.

1602 gëtt fir d'éischt an Dokumenter den Numm "Stadtbredimus" ernimmt, virdru war et ëmmer "Bredeniss" oder "Bredimus". De Johann von Wiltz war den Här vu Stadbriedemes. No sengem Doud gouf säi Grondbesëtz an zwee gläich Deeler opgedeelt. Ee vun hinnen huet de Freiherr von Braubach kaaft, vun deem aneren Deel gëtt et weider keng Informatioun.

1670 koum Stadbriedemes an de Besëtz vun der Famill Meternich-Burscheid.

Kuckeswäertes

Schlass Stadbriedemes: do huet den Edmond de la Fontaine gewunnt. D'Wënzergenossenschaft Domaines de Vinsmoselle huet hire Sëtz am renovéierte Schlass.
De Kulturpad genannt "Sentier culturel Stadtbredimus".
Dem Dicks säi Graf bei der Kierch.
Dem Batty Weber säi Wunnhaus, d'Haus Heemecht.
Staustuf Stadbriedemes-Palzem, eng vun zwou Staustufen zu Lëtzebuerg.
Monument Réimerbréck bei der Staustuf Stadbriedemes-Palzem.
Monument fir de Paul Eyschen, de fréiere Wäibauminister, laanscht d'Musel zu Gréiwemaacher zou.