Eurovision Song Contest 1999
| 44. Eurovision Song Contest | |
|---|---|
| Datum | 29. Mee 1999 |
| Stad | Jerusalem (Israel) |
| Gebai | International Convention Centre |
| Gewënner | Charlotte Nilsson (Schweden) |
| Zuel vu Länner | 23 |
| Nei Participatiounen | Keng |
| Moderatioun | Yigal Ravid, Dafna Dekel a Sigal Shahamon |
| Interval Act | Dana International mam Titel "Free" |
| Ofstëmmungsreegel | All Land huet 12, 10, 8, 7, 6, 5, 4, 3, 2 an 1 Punkt un déi zéng bescht Lidder verginn. |
De 44. Eurovision Song Contest war den 29. Mee 1999 an Israel. Organiséiert gouf d'Eurovisioun dat Joer am International Convention Centre zu Jerusalem. Presentateure waren de Yigal Ravid, d'Dafna Dekel an d'Sigal Shahamon. D'Dafna Dekel war 1992 als Interpretin fir Israel ugetrueden.
Fir d'Zuel vun de Länner ze reduzéiere sinn d'Plaze vun de leschte 5 Joer gekuckt ginn an déi mat de mannste Punkte hu missen e Joer Paus maachen. Betraff vun dëser Reegel ware Finnland, Griicheland, d'Republik Mazedonien, Rumänien an d'Schwäiz. Lëtzebuerg huet scho wéi déi fënnef Joer virdrun fräiwëlleg drop verzicht fir matzemaachen. Och Italien, Ungarn a Russland hu fräiwëlleg net matgemaach. Am Ganze waren 23 Länner dobäi.
Verschidden Interprete ware scho virdrun emol eng Kéier dobäi, d'Doris Dragović fir Kroatien 1986 (fir Jugoslawien) an d'Darja Švajger fir Slowenien 1995.
Nodeem Norwege sech dat Joer virdrun (1998) beschwéiert hat, se hätte Problemer gehat fir Sponsoren ze fannen, ass zur besserer Finanzéierung d'Big-4 Reegel agefouert ginn, wat praktesch bedeit, datt déi véier Länner Däitschland, Groussbritannien, Frankräich a Spuenien ëmmer matmaachen däerfen, egal wéi se déi Jore virdrun ofgeschnidden hunn.
Eng weider Ännerung gouf et, wat d'Sprooch vun de Lidder ubelaangt. Vun deem Joer u war et nees erlaabt, d'Sprooch fräi ze wielen. Bis dohi war nëmmen déi offiziell Sprooch (oder eng vun den offizielle Sproochen) vum jeeweilege Land erlaabt.
Vun deem Joer u war och d'Begleedung vun den Interpreten duerch en Orchester net méi obligatoresch. An Israel ass dofir decidéiert ginn, keen Orchester virzegesinn. D'Begleetmusek ass vun engem Band komm, d'Interpreten hunn awer live gesongen.
D'Reegel fir d'Ofstëmmung ass d'selwecht bliwwe wéi déi Jore virdrun, allerdéngs ass an de meeschte Länner den Televoting duerch d'Spectateure benotzt gi fir ofzestëmme mat Ausnam vun der Tierkei, Bosnien an Herzegowina, Irland a Litauen, wou nach eng Jury d'Ofstëmmung gemaach huet. All Land huet duerch d'Ofstëmmung 12, 10, 8, 7, 6, 5, 4, 3, 2 an 1 Punkt un déi zéng bescht Lidder verginn. D'Resultater si per Telefon op Jerusalem matgedeelt ginn.
Déi éischt Plaz krut d'Vertriederin vu Schweden, d'Charlotte Nilsson mat 17 Punkte Virsprong virum Selma Björnsdóttir (Island). Déi drëtt Plaz krut d'Grupp Sürpriz, déi fir Däitschland ugetruede war.
Fir Schweden war et déi véiert Kéier datt et de Grand Prix gewonnen hat.
Klassement
änneren| Plaz | Startnr. | Land | Interpret | Titel | Punkten |
|---|---|---|---|---|---|
| 1. | 15 | Schweden | Charlotte Nilsson | Take Me to Your Heaven | 163 |
| 2. | 13 | Island | Selma Björnsdóttir | All out of Luck | 146 |
| 3. | 21 | Däitschland | Sürpriz | Reise nach Jerusalem – Kudüs'e seyahat | 140 |
| 4. | 4 | Kroatien | Doris Dragović | Marija Magdalena | 118 |
| 5. | 19 | Israel | Eden | Happy Birthday (Yom huledet) | 93 |
| 6. | 23 | Estland | Evelin Samuel & Camille | Diamond of Night | 90 |
| 7. | 22 | Bosnien an Herzegowina | Dino & Béatrice | Putnici | 86 |
| 8. | 9 | Dänemark | Michael Teschl & Trine Jepsen | This Time | 71 |
| 8. | 11 | Holland | Marlayne | One Good Reason | 71 |
| 10. | 18 | Éisträich | Bobbie Singer | Reflection | 65 |
| 11. | 6 | Slowenien | Darja Svajger | For a Thousand Years | 50 |
| 12. | 2 | Belsch | Vanessa Chinitor | Like the Wind | 38 |
| 12. | 5 | Groussbritannien | Precious | Say It Again | 38 |
| 14. | 8 | Norwegen | Stig André Van Eijk | Living My Life Without You | 35 |
| 15. | 20 | Malta | Times Three | Believe 'n Peace | 32 |
| 16. | 7 | Tierkei | Tugba Önal & Grup Mystik | Dön artık | 21 |
| 17. | 17 | Irland | The Mullans | When You Need Me | 18 |
| 18. | 12 | Polen | Mietek Szczesniak | Przytul mnie mocno | 17 |
| 19. | 10 | Frankräich | Nayah | Je veux donner ma voix | 14 |
| 20. | 1 | Litauen | Aistė Smilgevičiūtė | Strazdas | 13 |
| 21. | 16 | Portugal | Rui Bandeira | Como tudo comerçou | 12 |
| 22. | 14 | Zypern | Marlain Angelidou | Tha'ne erotas | 2 |
| 23. | 3 | Spuenien | Lydia | No quiero escuchar | 1 |
Déi rout markéiert Länner hunn am Joer drop (2000) wéinst hirem schlechte 5-Jores-Duerchschnëtt missen aussetzen.
Um Spaweck
änneren| Commons: Eurovision Song Contest 1999 – Biller, Videoen oder Audiodateien |
| Birmingham (Groussbritannien) | 
|
Stockholm (Schweden) |
|---|---|---|
| ESC 1998 | Eurovision Song Contest | ESC 2000 |