Eisebunnsstreck Beetebuerg-Wuelmereng

Eisebunnsstreck Beetebuerg-Wuelmereng
	D'CFL-Statioun zu Wuelmereng
	Streckekaart vun der Linn 6b
Linnennummer	6b
Besëtzer	Lëtzebuerg
Bedreiwer	CFL
vu(n)	Gare Beetebuerg
op	Gare Wuelmereng
iwwer	Gare Diddeleng-Biereng, Gare Diddeleng-Stad, Gare Diddeleng-Zenter, Gare Diddeleng-Schmelz
Technesch Donnéeën
Längt	7 km
Gréisst Steigung	11 ‰
Klengste Radius	190 m
Spuerbreet	Normalspuer
Vitesslimitatioun	80 km/h
Stroumsystem	25kV Wiesselstroum
Zuchsécherungssystem	European Train Control System

D'Eisebunnsstreck Beetebuerg-Wuelmereng ass eng Eisebunnsstreck zu Lëtzebuerg. Se féiert vu Beetebuerg op Wuelmereng.

Streck
Garen - Uschlëss - Brécken Tunnellen - Barriären		PK
	Beetebuerg	0,000
	Diddelengerbaach
	Ofzweigung Arcelor Mittal Diddeleng
	A 13
	PN. 102d Biereng (Route de Burange)
	Biereng (Rue J. Simon)
	Diddeleng-Biereng	3,000
	Diddeleng-Stad	4,000
	Diddeleng CR160 (R. de Kayl - Av. Grande-Duchesse Charlotte)	4,050
	PN. 103b Diddeleng (Rue Jean Jaurès)	4,355
	Diddeleng-Zenter	4,450
	PN. 104a Diddeleng (Rue Karl Marx)	4,550
	Uschloss Walzwierk Diddeleng
	Diddeleng-Schmelz	5,226
	Wuelmereng	7,000

D'Trass fir d'Eisebunnsstreck Beetebuerg-Wuelmereng gëtt vun der Administration des chemins de fer verdeelt. D'CFL bedreift a geréiert d'Infrastruktur vun der Streck, déi am Besëtz vum Lëtzebuerger Staat ass.

Linn

D'Eisebunnsstreck Beetebuerg-Wuelmereng gëtt vun der Eisebunnsverwaltung als Linn 6b bezeechent. Bis Enn 2024 war s'am kommerzielle Passagéierverkéier vun der CFL als Deel vun der Linn 60 bekannt.

Iwwer d'Streck fiert follgend CFL-Linn^{(Stand: Januar 2025)}

Beetebuerg - Wuelmereng, eng Niewelinn vun der Linn Lëtzebuerg - Esch-Uelzecht - Rodange.

D'Streck ass 7 km laang an - ausser an der Gare Diddeleng-Schmelz - op der ganzer Streck eegleiseg. D'Vitess op der Streck ass op 80 km/h limitéiert.

Geschicht

Wéi an den 1880er Joren eng Schmelz zu Diddeleng geplangt gouf, war och en Uschloss un d'Bunn néideg. D'Zuchstreck Metz - Lëtzebuerg, déi 1859 opgemaach gi war, ass zwar schonn iwwer Diddelenger Territoire gefuer, mä déi nooste Gare war zu Beetebuerg. D'Streck gouf mam Gesetz vum 12. Abrëll 1882 definitiv festgehalen^[1]^[2] an d'Compagnie Guillaume-Luxembourg (gekierzt GL, „de Wëllem“ genannt) krut d'Konzessioun fir d'Streck vu Beetebuerg aus laanscht Biermereng an duerch Diddeleng bis op d'franséisch Grenz ze bauen. Am Oktober 1882 huet d'GL der Reichseisenbahn (RB) d'Streck verpacht an d'Streck ass als Niewebunn eegleiseg gebaut ginn: d'GL huet sech ëm d'Bauaarbechte gekëmmert, iwwerdeems d'RB sech ë. a. ëm den Uewerbau, d'mechanesch Ariichtung an d'Signalisatioun gekëmmert huet.

Den 20. Dezember 1883 ass d'Streck Beetebuerg - Diddeleng du mat enger Längt vu 6,7 km opgemaach ginn. 1884 gouf den Uschloss (742 m.) op d'Beluedstatioun Reiteschkopp realiséiert an zanter 1888 war dat Gleis en Deel vun der Eisebunnsstreck. Zu Diddeleng gouf fir de Persounentrafick d'Gare Diddeleng-Stad opgemaach; d'Statioun Diddeleng-Schmelz bestoung sengerzäit just fir de Gidderverkéier.

Wéi dunn 1886 d'Diddelenger Schmelz opgoung ass den Transportvolume gewalteg an d'Luucht gaangen. Absënns well all Brennstoffliwwerungen an e groussen Deel vum Eisenäerz mat der Bunn transportéiert goufen, huet d'Streck zu enge vun de profitabelste Strecken zu Lëtzebuerg gehéiert^[3].

1959/60 gouf d'Streck elektrifizéiert, den elektresche Betrib huet den 9. Juli 1960 ugefaangen. D'Gidderzich si vun do u mat elektresche Lokomotive gefuer; wéinst Manktem un E-Lokomotive sinn d'Persounenzich awer – mat e puer Ausnamen – weiderhi wärend 18 Joer mat Dieselmaschinne bedriwwe ginn.

Wéi 1984 d'Stolwierk zougemaach gouf, blouf nëmmen nach e Walzwierk zu Diddeleng bestoen. De Gidderverkéier huet séier ofgeholl an déi kuerz Streck op d'Reiteschkopp gouf 1988 zougemaach.

Den 30. Mee 1999 koumen déi nei Halten Diddeleng-Biereng an Diddeleng-Zentrum bäi.

D'Verlängerung vun der Streck bis an dat franséischt Wuelmereng gouf den 10. Abrëll 2001 beschloss a gutt dräi Joer méi spéit, den 10. Dezember 2003 ageweit; zënter dem 15. Dezember ass se fir de Persouneverkéier op.

Wéi 2005 d'Walzwierk zougemaach huet, war et 2006 och mam Gidderverkéier eriwwer^[4] an zanterhier ass d'Streck just nach fir de Persouneverkéier op.

Passagéierzuelen

Op der Streck Beetebuerg - Diddeleng - Wuelmereng goufen am Joer 2022 699.000 Leit transportéiert, dat Joer duerno waren et der 736.000^[5].

Biller

D'Garen zu Diddeleng: Biereng...
Stad...
Zentrum...
a Schmelz.

Kuckt och

Geschicht vun der Eisebunn zu Lëtzebuerg

Um Spaweck

Commons: Eisebunnsstreck Beetebuerg-Wuelmereng – Biller, Videoen oder Audiodateien

Donnéeën iwwer d'Streck: Réseau Ferré Luxembourgeois - Document de Référence du Réseau 2026, Version 1.0.

Referenzen an Notten

↑ (fr)Loi du 12 avril 1882, portant approbation de la convention du 29 mars 1882, relative à la construction et a l'exploitation de divers embranchements de chemins de fer dans les vallées de Rumelange et de la Hoehl, et de Bettembourg à Dudelange. data.legilux.public.lu (12.04.1882). Gekuckt de(n) 16.03.2025.
↑ idem, mam Text vun der Konventioun vum 29.03.1882 (PDF)
↑ ibid S. 361
↑ ibid S. 362
↑ Luc Ewen, „Auf die Nebenlinien ist nicht immer Verlass“, Luxemburger Wort, 20.03.2024, S. 16

Quell vum Abschnitt Geschicht, wou net anescht uginn: Federmeyer, E., & Pasquali, Pierre. (2007). Eisenbahnen in Luxemburg. Gernrode Luxembourg: W. Herdam Fotoverl. G.A.R., Band 1, S. 360

[1] (fr)Loi du 12 avril 1882, portant approbation de la convention du 29 mars 1882, relative à la construction et a l'exploitation de divers embranchements de chemins de fer dans les vallées de Rumelange et de la Hoehl, et de Bettembourg à Dudelange. data.legilux.public.lu (12.04.1882). Gekuckt de(n) 16.03.2025.

[2] , mam Text vun der Konventioun vum 29.03.1882 (PDF)

[Federmeyer_1,_S._361-3] S. 361

[Federmeyer_1,_S._362-4] S. 362

[:1-5] Luc Ewen, „Auf die Nebenlinien ist nicht immer Verlass“, Luxemburger Wort, 20.03.2024, S. 16

[1]

[2]

[3]

[4]

[5]