Eisebunnsstreck Athus-Bertrix-Libramont

Infrabel Linn 165 / Athus-Bertrix-Libramont
	Garen - Uschlëss - Brécken - Tunnelen - Barriären	Km
	Uschloss: Athus Uschloss: Rodange Uschloss: Mont-Saint Martin
	Aubange
	Halanzy
	Signeulx
	Ofzweigung: Gorcy
	Virton Marbehan-Virton-Écouviez
	Orgeo
	Ofzweigung: Muno
	Bertrix
	Ofzweigung: Dinant/Namur
	Uschloss: Namur/Bréissel a fréier St. Vith
	Libramont
	Uschloss: Namur - Arel/Lëtzebuerg

D'Infrabel-Linn 165 ass eng belsch Eisebunnsstreck déi vu Libramont op de W bei Attem féiert. Um W deelt se sech a leeft lénkser Hand op Attem a rietser Hand op d'franséisch Grenz bei Mont-Saint-Martin.

Den Eisebunns-W vun Éibeng, vir den Aarm op Mont-Saint-Martin, an der Mëtt deen op Rodange an hannen dee fir op Attem.

Zesumme mat der Streck 166 Bertrix-Dinant bilt se déi sougenannt Athus-Meuse.

Entwécklung

Déi zweegleiseg Streck gouf a véier Etappe gebaut déi wéifollegt opgaange sinn:

20. Januar 1877: Athus - Signeulx
26. Mäerz 1879: Signeulx - Florenville
20. Dezember 1880: Florenville - Bertrix
21. August 1882: Bertrix - Libramont

Aus wirtschaftleche Grënn, notamment wëll déi international Gidderzich hei ongestéiert fuere kënnen, ass de gréissten Deel vun der Streck zanter dem 15. Oktober 2002 mat enger 25 kV 50 Hz Catenaire ekipéiert. D'Grenz fir an de Gläichstroumreseau läit zu Recogne bei Libramont.

De ganze Giddertrafic Belsch - Lëtzebuerg gëtt haut iwwer d'Linn 165 ofgewéckelt a wëll d'Gidderzich dobäi an der Belsch iwwer den 3kV Reseau musse fuere fir op d'Athus-Meuse ze kommem, gëtt de Giddertrafic exklusiv vun CFL 3000 an SNCB T13 gefuer.

Den Eisebunns-W bei Éibeng

Nieft dem Containerterminal vun Attem läit de W vun Éibeng deen déi bis dohin zweegleiseg Linn an 3 Deeler spléckt. Lénks geet et iwwer Attem op Arel, an der Mëtt leeft déi sougenannten 'Éibenger Kéier' op Rodange a riets geet et op Mont-Saint-Martin.

Och wann en Eisebunns-W u sech schonn eng Raritéit ass, sou ass deen zu Éibeng schonn eleng duerch seng Geschicht interessant.

Ier d'Linn elektrifizéiert war, hu béid Gleiser vun der Linn 165 op Attem gefouert an all Zuch fir op Rodange huet missen zu Attem Kapp maachen. 1994 ass dunn d'Éibenger Kéier gebaut ginn an d'Gidderzich konnten direkt op Rodange fueren, deemools waren dat meeschtens Zich déi d'Produite vun der Stolindustrie an der Minettsgéigend op Antwerpen gefouert hunn. D'Zich aus der Belsch fir an d'Frankräich hu weiderhi missen zu Rodange oder Beetebuerg Kapp maachen.

2004 ass, am Kader vun der Elektrifizéierung vun der Streck, eng Ofzweigung Éibeng - Mont-Saint-Martin gebaut ginn. Et huet zwar virdru schonn eng Linn bestanen, mä de maroden Zoustand vun de Schinnen an déi ongënschteg Lag par Rapport zur Linn 165, huet en Neibau méi effektiv gemaach.

Duerch dësen Neibau besteet haut e Gleisdräieck tëscht Éibeng, Rodange an Lonkech deen integral elektrifizéiert ass an eng Dréischeif fir den internationale Gidder- a Persounentrafic ass.

Zich déi iwwer d'Linn 165 fueren

D'Linn 165 ass an der Haaptsaach eng Gidderstreck, déi eréischt relativ rezent (2006) och vu Persounenzich befuer gëtt.

Gidderzich vun der Verbindung (Italien) - (Schwäiz) - Diddenuewen - Beetebuerg - Namur - (Antwerpen), am Kader vum Sibelit.
L Zich op der Verbindung Dinant - Libramont.
L Zich op der Verbindung Libramont - Gare Virton - Rodange - Attem - Arel (ënner der Woch).
P Zich vum CFL tëscht Rodange a Virton.

Uschlëss

Zu Athus:
- D'Eisebunnsstreck Arel-Autelbas-Athus (Linn 167)
- D'Eisebunnsstreck Athus-Lëtzebuerger Grenz (Linn 171)
Zu Signeulx
- Bis 1983 d'Eisebunnsstreck Signeulx-Gorcy
Zu Virton:
- D'Eisebunnsstreck Marbehan-Virton-Lamorteau-franséisch Grenz (Linn 155)
Zu Orgeo
- Bis 1969 d'Eisebunnsstreck Bertrix-Muno-franséisch Grenz (Linn 163A)
Zu Bertrix:
- D'Eisebunnsstreck Dinant-Neffe-Bertrix (Linn 166)
Zu Libramont:
- D'Eisebunnsstreck Namur-Sterpenich-Lëtzebuerger Grenz (Linn 162)
- Bis 1984 d'Eisebunnsstreck Libramont-St. Vith (Linn 163)

Um Spaweck

Commons: Linn 165 – Biller, Videoen oder Audiodateien

D'Linn 165 op belrail.be