Biisserbréck

D'Biisserbréck, och nach Viaduc Polvermillen, ass en Eisebunnsviaduc iwwer den Uelzechtdall um nërdlechen Enn vun der Stater Gare. Den Numm Biisserbréck krut se, well se iwwer de Biisserwee tëscht dem Stadgronn an der Polvermillen féiert.

Bisserbréck / Viaduc Polvermillen
Viaduc de Pulvermuhl

D'Biisserbréck vun der Cité judiciaire aus.
Geographie
Land	Lëtzebuerg
Plaz	Lëtzebuerg
Koordinaten	49° 36’ 26’’ N       6° 8’ 19’’ O
Funktioun
Benotzt als	Eisebunnsbréck
Benotzt vun	CFL-Linn 1 CFL-Linn 3
Féiert iwwer	Uelzechtdall Biisserwee
Technesch Detailer
Bréckentyp	Boubréck
Totallängt	ca. 242 m
Héicht	37 m
Material	Steen
Bemierkungen
Opgaangen	1862
Architekt(en) Konzeptioun	Waring Brothers

Iwwer déi 242 Meter laang Konstruktioun lafe parallel d'Nordstreck an d'Waasserbëlleger Streck.

D'Bréck ass vun der brittescher Entreprise Waring Brothers entworf ginn, a se gouf 1859 am Optrag vum Adolphe Favier, deen d'Konzessioun vun der Nordstreck hat, gebaut.

Tëscht 2009 an Abrëll 2019 waren Aarbechten am Gaang, de Viaduc véiergleiseg ze maachen. Gläichzäiteg gouf och de Perré hannendru verlängert an den Tunnel ënnert dem Boulevard d'Avranches méi breet gemaach. De Käschtepunkt war 2004 op 110 Milliounen Euro ugesat, louch awer schonn 2014 bei 246 Milliounen Euro. De Gesamtmontant ass nach net bekannt. Den erweiderte Viaduc gouf den 11. Juni 2019, zesumme mat der zweegleiseger Streck tëscht der Gare Lëtzebuerg a Sandweiler/Conter, ageweit.

Kuckt och

• Dräi aner Eisebunnsbrécken an der Stad Lëtzebuerg
  • Viaduc Dräi Eechelen
  • Clausener Viaduc
  • Pafendaller Viaduc

Um Spaweck

Commons: Biisserbréck – Biller, Videoen oder Audiodateien