Tornado vu Péiteng
Den Tornado vu Péiteng war e Wierbelstuerm, deen den Owend vum 9. August 2019 iwwert dat franséisch-lëtzebuergescht Grenzgebitt gezunn ass.
No Aschätzunge vum Schuedbild huet den Tornado Wandspëtzte vun 241 km/h erreecht,[1] entspriechend enger Stäerkt vun F2 op der Fujita-Skala oder T5 op der TORRO-Skala.
Well de Wierbelstuerm iwwer dicht besidelt Gebitt gezunn ass gouf et grouss Materialschied op béide Säite vun der Grenz an op der lëtzebuergescher Säit deels schwéier Blesséierter.[2]
Verlaf änneren
Den Tornado huet tëscht 10 a 15 Minutte gedauert an huet dobäi eng Streck vun ca. 18 bis 20 km zeréckgeluecht. D'Schneis hat eng Breet vun duerchschnëttlech 350 m, mä huet plazeweis eouguer eng Breet vu 750 m erreecht.
Nodeems de Wolléckerüssel bei der franséischer Uertschaft Lexy fir d'éischt de Buedem erreecht huet, ass en a Richtung Nordoste weidergezunn an ass bei Rodange op Kéier lëtzebuergescht Gebitt komm. Vu Péiteng un huet en du seng stäerkst Intensitéit entwéckelt an et huet sech e Multivortex entwéckelt, e Wierbelstuerm, deen aus méi Eenzelwierbele besteet, déi rondrëm ee gemeinsamen Zentrum kreesen. Dëst huet och zu enger Verbreedung vun der Schneis op bis zu 750 m gefouert.
Hanner Nidderkaerjeng hu sech d'Wierbelen schlussendlech opgeléist.[3][4]
Betraffen Uertschaften änneren
| Land | Gemeng | Uertschaft |
|---|---|---|
 Frankräich
|
Lexy | Lexy |
| Frankräich
|
Longwy | Longwy |
| Frankräich
|
Herserange | Herserange |
| Frankräich
|
Longlaville | Longlaville |
| Frankräich
|
Saulnes | Saulnes |
 Lëtzebuerg
|
 Péiteng
|
Rodange |
| Lëtzebuerg
|
Péiteng
|
Rolleng |
| Lëtzebuerg
|
Péiteng
|
Péiteng |
| Lëtzebuerg
|
Käerjeng | Nidderkäerjeng |
Chronologie änneren
9. August 2019 änneren
MeteoLux huet eng Warnung vun der Stuf Giel ("Danger potentiel") erausginn. Et goufen Donnerwiederen tëscht 17 an 21 Auer owes gemellt, mat staarkem Wand, vill Reen a Knëppelsteng.
13:30 änneren
MeteoLux stuft d'Wiederwarnung vun der Stuf Giel op Orange ("Danger") erop.[5]
16:05:27 änneren
Éischt Blëtzaktivitéit gëtt registréiert südlech vu Sugny (Département Ardennes). D'Donnerwieder befënnt sech ongeféier op hallwem Wee tëscht Reims a Verdun a bewegt sech a Richtung Nordosten.[6]
17:35 änneren
Éischt Rotatioun gouf an der Donnerwiederzell registréiert.[7] D'Donnerwieder huet sech mëttlerweil zur Superzell entwéckelt a befënnt sech kuerz virun der Lëtzebuerger Grenz.
ca. 17:40 änneren
Den Tornado entsteet an de Wierbel beréiert de Buedem.
ca. 17:50 änneren
Den Tornado léist sech op.
19:30 änneren
MeteoLux hieft d'Warnstuf Orange op.
21:00 änneren
De Staatsminister Xavier Bettel berifft eng Krisenzell an. Dës besteet ënner aanerem aus dem Inneministère, dem CGDIS, der Police, der Arméi, der CREOS an dem staatleche Wiederdéngscht MeteoLux.
Se kënnt ënner der Presidence vum Minister Dan Kersch, als Vertriedung vun der Inneministech Taina Bofferding zesummen.
Bilan änneren
19 Persoune goufe beim Tornado blesséiert, dovun zwou schwéier.
De Materialschued beleeft sech Schätzungen no op ronn 100 Milliounen Euro.[8]
Am Ganze goufe Schied un 314 Gebaier op lëtzebuergescher Säit verbucht.[9] Hei goufe gréisstendeels Daachzille lass gerappt oder d'Diech komplett ofgedeckt. Des Weideren huet sech duerch déi enorm Wandvitessen eng Projektilwollek gebilt, wouduerch Trümmer a Fassade stieche bliwwe sinn.
Sou goufen zu Péiteng ronn 30 Haiser komplett ofgedeckt, a bei weidere 50 goufen d'Diech schwéier beschiedegt. Zu Nidderkäerjeng goufen iwwer 100 Haiser beschiedegt, dovunner eng 30 mat Schied um Daach.
Beem goufen entwuerzelt, a Stroummasten ëmgeknéckt.
Autoen a Camionette goufen ëmgeheit an deplacéiert oder duerch Géigestänn, déi fortgeblosen oder ofgerappt goufen, beschiedegt. Den Zuchverkéier tëscht Péiteng an der Stad huet missen ënnerbrach ginn.
Iwwer 200 Pompjeeën a Leit vun de Rettungsdéngschter, a ronn 40 Polizisten waren direkt dono am Asaz. Den 112 krut eng Dausend Uriff dowéinst.[10]
Um Spaweck änneren
Videoen änneren
- "Anfang des Tornados in Luxemburg 😢😢😢" Video vum Wierbel dee ganz no bäi laanschtzitt, gutt ze gesinn de Wollekerüssel, gefilmt zu Rodange; youtube.com
- "Tornado wütet in Luxemburg (09.08.2019)" Videoe vum Tornado an de Schied; youtube.com
- "Tornado über Luxemburg" Videoe vum Wollekerüssel; youtube.com
- "Les habitants de Pétange après le passage de la tornade" Video vun de Schied zu Péiteng; youtube.com
Fotoen änneren
- "Tornadoliste Luxemburg" Fotogallerie vun de Schied
National Press änneren
- "Tornado suergt fir vill Schued am Süde vum Land." Reportage am Journal vun RTL Tele Lëtzebuerg; rtl.lu, 09.08.2019, mat den éischten Impressiounen.
- "Dossier: Tornado im Süden Luxemburgs." Artikelen zum Theema op wort.lu (gekuckt 2021-05-28).
International Press änneren
- "Tornadoes tear through Amsterdam and Luxembourg" The Washington Post, USA
- "Twin tornadoes whip through northern Europe, hospitalizing at least 14 people" CNN, USA
- "Tornado injures 19 in Luxembourg as storms batter Europe" The Telegraph, Vereenegt Kinnekräich
- "14 skadd i tornado i Luxembourg" Dagbladet, Norwegen
- "Tornado zog „Schneise der Verwüstung“" ORF, Éisträich
- "Tornado wütet in Luxemburg – Großherzog besucht Unglücksorte" Berliner Morgenpost, Däitschland
- "Tornado wütet über Luxemburg" Der Tagesspiegel, Däitschland
- "Tornado hinterlässt schwere Schäden" Deutsche Welle, Däitschland
Kuckt och änneren
Referenzen änneren
- ↑ report final TORNADO IN SOUTH-WESTERN LUXEMBOURG ON 9 AUGUST 2019
- ↑ Des dégâts matériels après la tornade sur le bassin de Longwy
- ↑ Tornade à Longwy (Meurthe-et-Moselle) et à Bascharage (Grand-Duché du Luxembourg) le 9 août 2019 - Tornade EF2 en région Grand Est - Tornade F2 en France
- ↑ report final
- ↑ Starke Gewitter im Anzug: Meteolux erhöht Warnstufe. Luxemburger Wort - Deutsche Ausgabe (2019-08-09). Gekuckt de(n) 2021-06-05.
- ↑ Belgien, Blitz vom 09.08.2019, 16:05:27 Uhr (starker Knaller). Kachelmannwetter - Jetzt Lesezeichen setzen. Gekuckt de(n) 2021-06-05.
- ↑ RadarHD-Stormtracking vom 09.08.2019, 17:35 Uhr - Meuse. Kachelmannwetter - Jetzt Lesezeichen setzen. Gekuckt de(n) 2021-06-05.
- ↑ Nach Tornado: 100 Millionen Euro Schaden. Luxemburger Wort - Deutsche Ausgabe (2019-08-14). Gekuckt de(n) 2021-06-05.
- ↑ Tornade ayant frappé les communes de Käerjeng et Pétange le 9 août 2019. 112.public.lu. Gekuckt de(n) 2021-06-05.
- ↑ "Erst Panik, dann Ratlosigkeit." wort.lu, 10/08.2019.