Kräizkapell Esch-Sauer

D'Kräizkapell vun Esch-Sauer, och Lochkapell genannt, ass eng kathoulesch Kapell déi zur Par Öewersauer Saint-Pirmin, zum Dekanat Norden an zu der Gemeng Esch-Sauer gehéiert.

Kapell vun Esch-Sauer
D'Kapell vun Esch-Sauer (2012) D'Kapell vun Esch-Sauer (2012)
Uertschaft / Plaz	Esch-Sauer
Par	Öewersauer Saint-Pirmin
Dekanat	Norden
Numm / Patréiner	Helleg Kräiz
Baujoer	1767
Koordinaten	49° 54’ 24.9’’ N       5° 56’ 7.7’’ O
Kierchen - Kapellen

D'Kapell ass dem hellege Kräiz geweit. Se steet baussent der Uertschaft a südlecher Richtung an der Eschduerferstrooss op enger Héicht vun 330 m (NG-L). Ronderëm d'Kapell ass zanter 1803 de Kierfecht ugeluecht. E Kräizwee aus dem 18. Joerhonnert verbënnt d'Duerf mat der Kapell. E fänkt u bei där Plaz wou déi barock Statu vum Jean-Georges Scholtus steet, déi de Johannes Nepomuk duerstellt.

Zanter dem 8. August 1955 steet d'Kapell zesumme mam Kierfecht an der Lannenallee, déi bei den Agank vum Kierfecht féiert, op der Lëscht vun de klasséierte Monumenter.

Geschicht

Bis de 7. Mee 2017 war et eng Kapell vun der Par Esch-Sauer, déi zum Parverband Öwersauer, Sankt Pirmin, zu der Pastoralregioun Norden an zum Dekanat Wolz gehéiert huet. Zur fréierer Par Esch-Sauer huet ausser der Kräizkapell och nach d'Parkierch vun Esch-Sauer an d'Schlasskapell vun der Buerg Esch-Sauer gehéiert.

Gebai

D'Kapell ass zanter 1628 schrëftlech bekannt. Si ass déi chrëschtlech Nofollgerin vun enger uraler keltescher Plaz, op där Druide reliéis Zeremonien ofgehalen hunn. 1767 gouf déi fréier Kapell duerch dat aktuellt Gebai ersat. 1772 huet se eng wichteg Reliquie vum wierkleche Christuskräiz kritt. Iwwer dem Agank ass e Relief deen d'helleg Anna an d'Maria duerstellt. 1966 goufe bei der Renovéierung vun der Kapell ënner dem Altor nach Deeler vum Altor vun der éischter Kapell fonnt. No der Renovéierung gouf den Altor vun der Kapell nei konsekréiert.

D'Miwwel bestinn haut aus engem Christus um Kräiz, ëmgi vun den zwéin Déif am spéitgotesche Stil an e puer Statue vum Sculpteur Michel Weiler.

Biller

• 
  Kierch
• 
  Entréesportal
• 
  Kierfecht
• 
  Al Griewer
• 
  Lannenallee

Kuckt och

• Lëscht vu reliéise Gebaier zu Lëtzebuerg
• Lëscht vun de Lëtzebuerger Paren
• Lëscht vun de fréiere Lëtzebuerger Paren
• Lëscht vun den nationale Monumenter an der Gemeng Esch-Sauer

Um Spaweck

Commons: Kräizkapell Esch-Sauer – Biller, Videoen oder Audiodateien

• Websäit vun der Par Öewersauer Saint-Pirmin
• D'Kapell op der Websäit vun der Par Öewersauer Saint-Pirmin
• D'Kräizkapell vun Esch-Sauer op der Websäit vum Service des sites et monuments nationaux {fr}