Kierch Fiels

D'Kierch an der Fiels ass eng kathoulesch Kierch, déi zur Par Mëllerdall Saint-Michel am Dekanat Zentrum an zu der Gemeng Fiels gehéiert.

Kierch vun der Fiels
De Kierchtuerm De Kierchtuerm
Uertschaft / Plaz	Fiels
Par	Mëllerdall Saint-Michel
Dekanat	Zentrum
Numm / Patréiner	Hl. Donatus
Konsekratioun	1862
Architekt(en)	Charles Arendt
Baujoer	1862
Koordinaten	49° 47’ 2.5’’ N       06° 13’ 14.2’’ O
Parkierch vun der Fiels (2014) Parkierch vun der Fiels (2014)
Kierchen - Kapellen

Niklosstatu

De Patréiner vun der Kierch ass den hellegen Donatus, deem säi Fest den 30. Juni gefeiert gëtt.

D'Kierch steet op der Kräizung vun der Mierscherstrooss, dem CR118, mat der Miedernacherstrooss, der N14.

Se gouf den 2. Mäerz 2018 als nationaalt Monument klasséiert.

Zur fréierer Par Fiels gehéiert och nach d'Fielsser Rochuskapell an d'Kapell vun Iernzen.

Geschicht

Den Hubert Victor de Roebé hat der Fiels d'Bauplaz vun der Kierch vermaach. Un hien erënnert e Panneau, dee lénks hannen an der Kierch ubruecht ass. D'Kierch gouf tëscht 1860 an 1862 no de Pläng vum Architekt Charles Arendt vum Entreprener Schergen vu Guedber am neogotesche Baustil gebaut. Déi barock Altär aus der Virgängerkierch goufen an di nei Kierch iwwerholl.

D'Molereien

D'Freskemolerei vun 1934 am Chouerraum ass vum Nicolas Brücher.

De Kräizwee

De Kräizwee am Nazarenerstil staamt vum Karl Georg Kaiser aus Stans an der Schwäiz.

Klacken

Am Joer 1888 huet d'Géisserei Causard / Dury vu Colmar fir déi Fielsser Parkierch dräi Klacke gegoss:

D'Marieklack

Se weit 1.180 kg, huet en Duerchmiesser vun 122 cm an ass 99 cm héich. Se laut um Toun Mi.
Op der Flank steet e Chronogramm: "HONORI BEATAE VIRGINIS CIVITAS RVpensIS PRAESIDE IOANNE KNAFF ME CONFLARI INGENIOSE CVRAVIT"
an hannendrop: "JOHANNE KANFF MAGISTRO CIVILE ET MATHIA SCHMIT PAROCHO"
drënner op engem gotesche Podest d'Maria an e Bëschof am Ornat.

D'Donatusklack

Se huet en Duerchmiesser vun 109 cm, eng Héicht vun 89 cm an e Gewiicht vun 815 kg. Se laut a Fa bémol.
D'Flankechronogramm: "HONORI BEATI DONATI RVPIS PATRONI ME CONFLARI CVRAVERVNT CIVES GRATI RVPENSIS
hannendrop: JOANNE KNAFF MAGISTRO CIVILI ET MATHIA SCHMIT PAROCHO

D'Péitrusklack

Déi klengst ass d'Péitrusklack mat engem Duerchmiesser vu 97 cm, enger Héicht vu 97 cm an engem Gewiicht vun 393 kg an engem Toun a Sol bémol.

Beim Flankechronogramm feelt en "M" fir 1.000: "PETRVS VOCOR PETRVS SCHARLE BENEFICUVS RVPENSIS CONFLARI INGENIOSE FECIT ECCLESIAE RVPENSI."
Op der Récksäit huet de Schmit en zweeten "t" ugehaange kritt: "JOANNES KNAFF MAGISTRO CIVILI ET MATHIA SCHMITT PAROCHO"
D'Klackebild weist e Kruzifix an d'Iwwerreechung vun den Himmelschlësselen un de Péitrus.

D'Statuen

Den Niklos

Hanne riets am Eck steet op engem Statuestänner un der Mauer eng Niklosstatu mat de Kanner an der Bidden.

De Bëschof Adames als Zinniklos

Fënsteren

Eng vun de Fënstere gouf vum Nicolas Boes, dem Paschtouer an der Fiels vun 1891-1902, gestëft. Si gouf vum Atelier Linster geschaaft a stellt den Hl. Niklos duer; den Artist huet dem Hellegen d'Gesiicht vum éischte Lëtzebuerger Bëschof Nicolas Adames ginn. D'Kanner an der Bidden hunn d'Gesiichter vu Fielsser Kanner vun deemools.

Kuckt och

• Lëscht vu reliéise Gebaier zu Lëtzebuerg
• Lëscht vun de Lëtzebuerger Paren
• Lëscht vun de fréiere Lëtzebuerger Paren

Um Spaweck

Commons: Kierch Fiels – Biller, Videoen oder Audiodateien

• D'Fënstere vun der Kierch an der Fiels op der Websäit vun der Stiftung Forschungsstelle Glasmalerei des 20. Jh. e. V. (de)
• D'Uergel vun der Kierch op Orgues.lu
• D'Kierch Fiels an der Facebookgrupp Patrimoine religieux Luxembourg - Reliéisen Ierwen Lëtzebuerg ^[sic]

• 
  Molerei um Plaffong vun der Kierch
• 
  Den "De Roebé"-Panneau an der Fielsser Kierch
• 
  D'Kiercheportal mat der Statu vum Hl. Donatus driwwer