Eurovision Song Contest 1973

Den 18. Eurovision Song Contest (mat offiziellen Numm Concours Eurovision de la Chanson) war de 17. Abrëll 1973 zu Lëtzebuerg. Organiséiert gouf d'Eurovisioun dat Joer am Neien Theater zu Lëtzebuerg. Presentatrice war d'Helga Guitton.


18. Eurovision Song Contest
Datum	7. Abrëll 1973
Stad	Lëtzebuerg (Lëtzebuerg)
Gebai	Neien Theater Stad Lëtzebuerg
Gewënner	Anne-Marie David (Lëtzebuerg)
Zuel vu Länner	17
Nei Participatiounen	Israel
Moderatioun	Helga Guitton
Interval Act	Charlie Rivel
Ofstëmmungsreegel	An der Jury vun all Land waren zwee Leit, den een ënner, den aneren iwwer 25 Joer. D'Jurore konnten all Land mindestens 1 Punkt, héchstens 5 Punkte ginn.

Obwuel Israel als neit Land derbäikomm ass, waren nëmme 17 Länner am Grand Prix, well Malta an Éisträich net matgemaach hunn. Israel war dat éischt net-europäescht Land dat matgemaach huet. D'Sécherheetsmoossnamen hunn dowéinst staark missen erhéicht ginn.

Verschidde Sänger ware scho virdru mol eng Kéier dobäi, d'Marion Rung fir Finnland 1962, de Massimo Ranieri fir Italien 1971 an de Cliff Richard fir Groussbritannien 1968.

D'Reegel datt nëmmen an der Landessprooch gesongen däerf ginn, ass opgehuewe ginn. Et hunn awer just déi skandinavesch Länner dovu Gebrauch gemaach. Dës Reegel war awer nëmme bis 1976 gëlteg. Am Joer 1999 ass fir d'zweet agefouert ginn.

D'Reegel fir d'Ofstëmmung war déi selwecht wéi dat Joer virdrun: An der Jury vun all Land waren zwee Leit, den een ënner, den aneren iwwer 25 Joer. D'Jurore konnten all Land mindestens 1 Punkt, héchstens 5 Punkte ginn. D'Jury konnt sou am Ganze maximal 10 Punkte verginn fir dat bescht Lidd, wat an dësem Joer awer net all Land gemaach huet. D'Jurye waren op der Plaz dobäi an hunn d'Resultater zum Schluss op der Bün bekannt ginn.

D'Lidd vu Spuenien ass vu Kritiker accuséiert ginn e Plagiat vum jugoslaweschen Titel vun 1966 ze sinn. Et ass awer net sanktionéiert ginn a gouf och e groussen Erfolleg.

Déi éischt Plaz krut d'Vertriederin vu Lëtzebuerg, d'Anne-Marie David mat 4 Punkte Virsprong virum Grupp Mocedades (Spuenien). Déi drëtt Plaz krut de Cliff Richard, dee fir Groussbritannien ugetruede war.

Fir Lëtzebuerg war et schonn déi véiert Kéier datt et de Grand Prix gewonnen hat.

Klassement

Plaz	Land	Interpret	Titel	Punkten
1.	Lëtzebuerg	Anne-Marie David	Tu te reconnaîtras	129
2.	Spuenien	Mocedades	Eres tú	125
3.	Groussbritannien	Cliff Richard	Power to All Our Friends	123
4.	Israel	Ilanit	Ey-sham	97
5.	Schweden	Nova	You're Summer – You Never Tell Me No	94
6.	Finnland	Marion Rung	Tom Tom Tom	93
7.	Norwegen	Bendik Singers	It's Just a Game	89
8.	Däitschland	Gitte	Junger Tag	85
8.	Monaco	Marie	Un train qui part	85
10.	Portugal	Fernando Tordo	Tourada	80
10.	Irland	Maxi	Do I Dream	80
12.	Schwäiz	Patrick Juvet	Je vais me marier, Marie	79
13.	Italien	Massimo Ranieri	Chi sarà con te	74
14.	Holland	Ben Cramer	De oude muzikant	69
15.	Jugoslawien	Zdravko Čolić	Gori vatra	65
15.	Frankräich	Martine Clémenceau	Sans toi	65
17.	Belsch	Nicole & Hugo	Baby Baby	58

Um Spaweck

Edinburgh (Groussbritannien)		Brighton (Groussbritannien)
ESC 1972	Eurovision Song Contest	ESC 1974