Lëtzebuerger Natur- a Vulleschutzliga

D'Lëtzebuerger Natur- a Vulleschutzliga (LNVL) a.s.b.l. war eng lëtzebuergesch Vereenegung ouni Gewënnzweck, déi sech fir Naturschutz am Allgemengen, an de Schutz vun de Vullen am Besonneschen, agesat huet.

Lëtzebuerger Natur- a Vulleschutzliga
Ofkierzung	LNVL
Zweck	Natur- a Vulleschutz
Grënnungsdatum	1920 (opgeléist 2012)
Sëtz	Haus vun der Natur
President	-

D'Associatioun, déi 1920 gegrënnt gouf, huet 2012 mat der Asbl natur&ëmwelt fusionéiert a besteet vun do un net méi als eegestännege Veräin.

2012 hat d'LNVL eng 13.000 Memberen.

Aktivitéiten

D'Theemegebidder, mat deenen d'LNVL sech befaasst huet, waren: Aarteschutz, ekologesch Korridoren, Natur am urbane Raum, Landwirtschaft, Forstwirtschaft a Remembrement, ekologesch Gestioun vum Waasser, Landschaftsschutz a Landesplanung, Natur- a Vulleschutz op internationalem Plang.

D'LNVL huet zwou Zäitschrëften ënner dem Numm Regulus publizéiert, dovun eng wëssenschaftlech Zäitschrëft, de Regulus / Wissenschaftliche Berichte. Béid Zäitschrëfte ginn zanter Mëtt 2012 vun natur&ëmwelt Asbl erausginn.

Geschicht

D'LNVL gouf 1920 op Initativ vum Jean Morbach ënner dem Numm Société pour la protection des animaux et des sites gegrënnt. 1921 gouf se a Ligue luxembourgeoise pour la protection des oiseaux utiles, an 1940 a Ligue luxembourgeoise pour l'étude et la protection des oiseaux ëmgenannt. 1983 krut se den Numm deen se bis zur Fusioun mat natur&ëmwelt behalen huet.

D'LNVL (resp. hir Virgängervereenegungen) hu sech dofir agesat, datt Lëtzebuerg d'international Konventioun iwwer de Vulleschutz, déi 1904 ratifizéiert gi war, an national Recht ëmgesat sollt ginn (dat geschouch 1928). Och d'Ausschaffe vum éischten Naturschutzgesetz vun 1982, an d'Revisioun dovun aus dem Joer 2004, huet d'LNVL vun Noem begleet. D'Donnéeën, déi se gesammelt hat, hu gehollef, d'Vulleschutz-Direktiv vun der EG vun 1979 an nationaalt Recht ëmzesetzen, andeems Schutzzonen ausgewise gi sinn.

1982 war d'LNVL ee vun de Grënnungsmembere vun der Stëftung Hëllef fir d'Natur, zesumme mat der Natura an der Société des naturalistes luxembourgeois.

Am September 2010 huet d'LNVL sech mat dräi aner Naturschutzorganisatiounen - der Natura, der Associatioun D'Haus vun der Natur an der Stëftung Hëllef fir d'Natur - informell ënner dem Numm natur&ëmwelt zesummegedoen. Nodeem d'Asbl natur&ëmwelt am Februar 2012 offiziell gegrënnt gi war, huet d'LNVL den 13. Juli 2012 mat där Organisatioun fusionéiert.

Kuckt och

• Vull vum Joer
• Naturschutzzentren zu Lëtzebuerg
• Mouvement écologique

Um Spaweck

• Websäit vun natur&ëmwelt
• LNVL Archiv
• Rinnen Henri: Menschen um Vogelschutz und Vogelkunde, Regulus 1970 2-5 archivéiert