Kierch Lëtzebuerg-Pafendall
D'Kierch am Pafendall ass eng kathoulesch Kierch, déi zur Par Lëtzebuerg Notre-Dame, zum Dekanat Lëtzebuerg an zu der Gemeng Lëtzebuerg gehéiert.
| ||||
|---|---|---|---|---|
 D'Kierch mam Théiwesbuer | ||||
| Uertschaft / Plaz | Pafendall | |||
| Par | Lëtzebuerg Notre-Dame | |||
| Dekanat | Lëtzebuerg | |||
| Numm / Patréiner | Hl. Téiwes | |||
| Konsekratioun | 1872 | |||
| Architekt(en) | Charles Arendt | |||
| Koordinaten | 49° 36’ 57.4’’ N 06° 07’ 58.7’’ O | |||
| Kierchen - Kapellen | ||||
De Patréiner vun der Kierch ass den hellegen Téiwes (St. Matthieu)[1], deem säi Fest den 21. September gefeiert gëtt.
D'Kierch gëtt zanter ëm 2020 net méi vun de Katholicke gebraucht a steet hautdesdaags – op Initiativ vum Theolog an Historiker Alex Langini – der rumänesch-orthodoxer Glawenscommunautéit zur Verfügung[2].
Geographie
ännerenSe steet am Quartier Pafendall an der Stad Lëtzebuerg nieft dem Théiwesbuer op der Kräizung vun der rue St. Mathieu an der rue Vauban, dem CR218, mat der rue du Pont, wou d'Bréck iwwer d'Uelzecht féiert.
Zur fréierer Par Lëtzebuerg-Pafendall gehéiert ausser der Pafendaller Parkierch och nach d'Kapell vum Sichenhaff.
Geschicht
änneren
1847 huet déi éischt Pafendaller Kierch hir Dieren opgemaach. Si gouf no de Pläng vum Jean-François Eydt, deen Architekt vun der Stad Lëtzebuerg war, gebaut. Kuerz duerno goufen de Pafendall an de Sichenhaff vun der Par Sankt Méchel lassgeléist an als eege Par etabléiert.[3]
D'Kierch nom J.-F. Eydt war e véiereckegt Gebai mat Glaskuppel am byzantinesche Stil. Well et ënner der Glaskuppel am Summer ze waarm an am Wanter ze kal war, gouf no engem Neibau gefrot.[4]
Déi al Kierch gouf doropshin ofgerappt an 1872 gouf déi haiteg Kierch, déi no de Pläng vum deemolege Staatsarchitekt Charles Arendt am neobyzantinesche Stil gebaut gouf, vum Bëschof Nicolas Adames ageweit.[4]
Vun 1861 bis zu sengem Doud am Joer 1902 war de Laurent Menager Organist an der Kierch[5].
1903 gouf eng nei Uergel vun der Firma Voigt&Söhne installéiert.[4]
Ëm 1920 goufen déi haiteg Kierchefënsteren agesat. Si goufe kuerz virun 2010, zesumme mat der Uergel, restauréiert.[4]
Am Zweete Weltkrich huet den deemolege Paschtouer Ries a säi Koschter ënner Liewensgefor eng Partie vu Lëtzebuerger Zwangsrekrutéierter wärend 14 Méint am Kierchtuerm an an engem Raum iwwert dem Duxall verstoppt, Zwangsrekrutéierter, déi net an enger preisescher Uniform kämpfe wollten. Et waren dat de Vic Fischbach, de René Schiltz, de Gaston Kerger, den Nicolas Schaefers, den Emile Schaefers an de Lucien Kraus.[6]
1947, bei der Geleeënheet vun der Joerhonnertfeier vun der Par, gouf nieft der Kierch den Don Bosco-Veräinslokal gebaut. E gëtt haut (2010) vu portugisesche Folklorgruppe fir déi Jonk benotzt[7].
1979 waren déi bis haut leschte Renovéierungsaarbechten un der Kierch ofgeschloss.[4]
Zukunft vun der Pafendaller Kierch
ännerenWell d'Kierch net méi vun der kathoulescher Communautéit benotzt gëtt, kéint et sinn, datt se entweit gëtt wann d'Konventioun tëscht dem Proprietär, der Stad Lëtzebuerg, an der Kierchefabrick Enn 2024 ausleeft[2].
Series pastorum
änneren- Mathias Bots, 1855–1861
- Anton Koecher, 1861-1894
- J.P. Mergen, 1894-1899
- Nikolaus Biwer, 1899-1910
- Nikolaus Freresm 1910-1912
- Ferdinand Joachim, 1912-1937
- Jean-Pierre Ries, 1937-1956
- Roger Kinsch, 1956-1982
- Charles Pantenburg, 1982-1989
- Pierre Ries, 1988-2006
- Jos Morn, 2006-2010
- Bert Deischter, 2009-
Literatur
änneren- Fischbach, Victor, 2000. Versteckt in der Kirche von Pfaffenthal. ons stad 71, S. 16-17, ill.
- Loutsch, J.-C., 1982. La famille Eydt de Neumühle-lez-Luxembourg. In: 125 Joer Sang a Klang Pafendall, S. 240-264. Dréckerei Service-Print Lëtzebuerg, 280 S.
Kuckt och
ännerenUm Spaweck
änneren| Commons: Kierch Lëtzebuerg-Pafendall – Biller, Videoen oder Audiodateien |
Biller
änneren-
D'Pafendaller Kierch vun der rue du Pont aus gekuckt. -
Statu vum hellegen Théiwes op der viischter Fassad vun der Kierch -
Zur Erënnerung un de Laurent Menager. Plack lénks vun der Entrée. -
Plack op der Pafendaller Kierch, riets vun der Entrée.
Referenzen an Notten
änneren- ↑ Offiziell Websäit vun der Par Archivéiert de(n) 26.09.2011. Gekuckt de(n) 04.10.2010.
- ↑ 2,0 2,1 (lb)Serie Stater Kierchen (1): Desakraliséierung? An dono?. www.rtl.lu. Gekuckt de(n) 2023-08-17.
- ↑ J.-C. Loutsch 1982.
- ↑ 4,0 4,1 4,2 4,3 4,4 F.T. = Fernand Théato, Websäit vun der Par Pafendall
- ↑ Quell: Plack lénks nieft der Kierchenentrée
- ↑ Victor Fischbach: Versteckt in der Kirche von Pfaffenthal Ons Stad, Nr. 71, Dezember 2002, S. 16-17
- ↑ Quell: Schëld iwwer der Entrée