Charly Gaul

De Charly Gaul, gebuer den 8. Dezember 1932 am Pafendall a gestuerwen de 6. Dezember 2005 zu Lëtzebuerg, war e lëtzebuergesche Vëlossportler. Hien huet 1958 den Tour de France gewonnen.

Charly Gaul
Gebuer	8. Dezember 1932 Pafendall
Gestuerwen	6. Dezember 2005 Lëtzebuerg
Doudesursaach	Longenentzündung
Nationalitéit	Lëtzebuerg
Aktivitéit	Vëlossportler
Positioun oder Spezialitéit	Grimpeur
Gréisst	173 Zentimeter
Gewiicht	64 kg
Veräin/Ekipp	Faema, Gazzola, Peugeot, Libertas
Famill
Kanner	Fabienne Gaul

D'Nelux Ekipp 1958 um Stadion

De Charly Gaul an de Federico Bahamontes virum Monument vum François Faber an Nicolas Frantz am Park vun der Stad Lëtzebuerg

Affiche als Erënnerung un de Charly Gaul an der Opfaart vun der Strada del Monte Bondone

De Charly Gaul nieft dem Jacques Anquetil den 19. Mee 1959 am 42. Giro d'Italia, den de Charel gewonnen hat.

Ee vum Gaul senge Vëloen am Lëtzebuerg City Museum.

De Charly Gaul war e Biergspezialist a gouf dofir um Héichpunkt vu senger Carrière, déi vun 1953 bis 1965 gedauert huet, "Engel vun de Bierger" genannt.

Nieft senger Victoire am Tour de France 1958 ass de Gaul 1955 an 1961 Drëtten an dëser Course ginn. 1955 a 1956 huet hien och den Tricot vum beschte Biergcoureur gewonnen. 1956 an 1959 huet en de Giro d'Italia gewonnen. Am Ganzen huet hie beim Tour de France 10-mol a beim Giro 11-mol eng Etapp gewonnen.

No senger Cyclistëcarrière huet hien e Café zu Bouneweg opgemaach, an ass dono bei en Autosconcessionnaire schaffe gaangen. Zéng Joer laang huet hien dono am Éislek zeréckgezunn an engem Juegdchalet gewunnt, ier e schlussendlech am Sportsministère eng Plaz als Conseiller technique krut, fir en Archiv iwwer de Lëtzebuerger Vëlossport zesummenzestellen.

Den 31. Mee 2011 gouf eng Erënnerungsplack fir de Charly Gaul, e Wierk vun der Yvette Gastauer-Claire, am Parc municipal an der Stad Lëtzebuerg ageweit.

Spëtznimm

• Ange de la Montagne
• Monsieur Pipi dëse Spëtznumm krut e well en am Giro 1957, op engem schlechten Dag dacks huet misse vum Vëlo klammen, fir op d'Säit ze trieden, an de Bobet an de Géminiani hien attackéiert hunn. Deen Dag huet en och de rosaen Trikot verluer.

Palmarès

1950

• 1. am Grand Prix Général Patton (Amateur)

1951

• 1. am Grand Prix Général Patton (Amateur)
• 1. an der Flèche du Sud

1952

• 2. an der Flèche du Sud

1953

• 1. an der Flèche du Sud
• 2. am Critérium du Dauphiné libéré
• 3. am Tour de Luxembourg
• 8. an der Polymultipliée

1954

• Landesmeeschter am Cyclo-Cross
• 1. am Circuit des Six Provinces
• 5. an der Polymultipliée

1955

• 1. Tour des Provinces du Sud-Est
• 3. am Tour de France 1955
• 6. an der Polymultipliée

1956

• 1. am Giro d'Italia 1956 an 1. am Biergpräis.
  • 1. an der 7. Etapp vu Pescara op Campobasso
  • 1. an der 14. Etapp vu Bologna op San Luca
  • 1. an der 19. Etapp vu Meran op de Monte Bondone.
• 1. bei den Nationale Meeschterschaften op der Strooss a Form vun engem Zäitfueren (Kategorie Professionel)
• 1. am Tour de Luxembourg
• 6. am Giro dell'Emilia (249,5 km)
• 5. an der Cyclo-Cross Weltmeeschterschaft am Bambësch

1957

• 1. bei den Nationale Meeschterschaften op der Strooss an der Course en Ligne (Kategorie Professionel)

1958

• 1. am Tour de France 1958 (2. am Biergpräis)
  • 1. an der 8. Etapp um Circuit zu Châteaulin, Eenzelzäitfueren (46 km)
  • 10. an der 14. Etapp vu Pau op Luchon (129 km)
  • 1. an der 18. Etapp op de Mont Ventoux, Eenzelzäitfueren (21,5 km)
  • 8. an der 20. Etapp vu Gap op Briançon (165 km)
  • 1. an der 21. Etapp vu Briançon op Aix-les-Bains (219 km)
  • 1. an der 23. Etapp vu Briançon op Dijon, Eenzelzäitfueren (74 km)
• 3. am Giro d'Italia 1958
  • 1. an der 14. Etapp vu San-Marino op San-Marino.
• 8. am Tour de Luxembourg
• 10. an der Flèche wallonne

1959

• 1. am Giro d'Italia
• 1. bei den Nationale Meeschterschaften op der Strooss an der Course en Ligne (Kategorie Professionel)
• 1. am Tour de Luxembourg

1960

• 1. bei den Nationale Meeschterschaften op der Strooss an der Course en Ligne (Kategorie Professionel)

1961

• 1. bei den Nationale Meeschterschaften op der Strooss an der Course en Ligne (Kategorie Professionel)
• 1. am Tour de Luxembourg

1962

• 1. bei den Nationale Meeschterschaften op der Strooss an der Course en Ligne (Kategorie Professionel)
• Landesmeeschter am Cyclo-Cross

Gielercher

De Charly Gaul gouf véiermol zum lëtzebuergesche Sportler vum Joer gewielt, an 1999 zum "Sportler vum Joerhonnert".

No him benannt

Fir un de Charly Gaul z'erënnere sinn no him benannt:

• eng Rei Stroossen, sou z. B. zu Dippech, Esch-Uelzecht an zu Suessem,
• eng Vëlosstreck, den itinéraire cyclable Charly Gaul vu Fenteng op d'Ellenger Gare.

Literatur zum Theema

• Frank Wilhelm (alias François Guillaume), 2008. Charly Gaul. In: Lieux de mémoire au Luxembourg. Erinnerungsorte in Luxemburg. 2. Editioun, S. 133-138. S. Kmec, B. Majerus, M. Margue, P. Peporte, éditeurs. éditions saint-paul, Lëtzebuerg.
• Roland Barthes: Le Tour de France comme épopée. In: Mythologies. Paris: Éditions du Seuil, 1957, pp. 110–121.
• Christian Laborde: L'ange qui aimait la pluie. Paris: Éditions Albin Michel, 1994. ISBN 2-226-06977-1
• François Mersch: Bergauf, bergab mit Charly Gaul. Luxemburg: Editioun François Mersch, 1959. 241 Säiten.
• Gast Zangerlé: Charly Gaul, l'Ange de la Montagne et son époque, Éditions Saint-Paul, 1998 (Versioun op Däitsch: Charly Gaul, Der Engel der Berge und seine Zeit)
• Gast Zangerlé: La saga Charly Gaul, Éditions Saint-Paul, Lëtzebuerg, 2006, ISBN 2-87963-598-5. (Versioun op Däitsch: Der Mythos Charly Gaul, ISBN 2-87963-597-7).
• Chrëscht Beneké: Luxemburger Sportler des 20. Jahrhunderts. 50er, Éditions Revue, Luxemburg 2009, S.24-39, ISBN 2-919999-56-7
• André Klein, Joe Geimer, Pierre Gricius, Heute wäre der Engel der Berge 90 Jahre alt geworden, Luxemburger Wort, 8. Dezember 2022, S.46-47

Kuckt och

• Portal Sport
• Lëscht vu lëtzebuergesche Sportler
• Lëscht vu lëtzebuergeschen Olympioniken
• Lëtzebuergesch Sportler vum Joer
• Äerzengel, Film iwwer de Charly Gaul

Um Spaweck

Commons: Charly Gaul – Biller, Videoen oder Audiodateien

• Dem Charly Gaul säi Palmarès
• Äerzengel, en Documentaire vum Claude Waringo

Virdrun	Sportler vum Joer	Duerno
	1954 - 1955 - 1956	Josy Stoffel
Josy Stoffel	1958	Jean Link