Rond-point Robert-Schuman

De Rond-point Robert-Schuman ass eng ronn Plaz um Lampertsbierg an der Stad Lëtzebuerg op där fënnef Stroossen zesumme kommen:

• am Nordwesten, d'Avenue Pasteur
• am Norden, d'Rue des Glacis
• am Osten, de Boulevard Robert Schuman
• am Süden, d'Neipuertsgaass
• am Westen, de Boulevard de la Foire.

Rond-point Robert-Schuman

Numm	fr: Rond-point Robert-Schuman
Deel vun	N52
Land	Lëtzebuerg
Gemeng	Lëtzebuerg
Uertschaft	Lëtzebuerg
Quartier	Lampertsbierg
Postcode	2525
Koordinaten	49° 37’ 01’’ N       06° 07’ 33.9’’ O
Genannt no	Robert Schuman

D'Nationalstrooss 51 verleeft a West-Ost-Richtung als Ënnerféierung ënnert dem Rond-Point Schuman erduerch a verbënnt de Boulevard de la Foire mam Boulevard Robert Schuman.

Pläng, fir sou eng Ënnerféierung aus zweemol enger Spuer ënnert dem Rond-Point erduerch unzeleeën, fir de Verkéier vum Kierchbierg Richtung Areler an Escher Strooss (an ëmgedréint) méi flësseg ze maachen, goufen 1986 bekannt gemaach. Gläichzäiteg sollt uewendrop eng Rëtsch vu Sailen am Krees opgestalt ginn, déi zum Deel uewendrop matenee verbonne waren. Den Tunnel gouf an de Joren dono gebaut; d'Sailen awer, well s'an de Lieserbréifsäite vun den Dageszeitunge staark kritiséiert goufen, net.

Och wann d'Plaz „Rond-Point“ an hirem Numm huet, sou ass keng Intersection à sens giratoire obligatoire, wéi dat fir e Kreesverkéier am lëtzebuergesche Code de la route virgesinn ass.

D'Plaz gouf 1963 nom Robert Schuman benannt; de Schuman war e franséische Politiker a Matgrënner vun der CECA deen 1886 a Clausen gebuer gouf.

Gebaier

Dat eenzegt Gebai (Hausnummer 1) um Rond-Point Schuman ass de Groussen Theater vun der Stad.

Kuckt

• Aner Rond-pointen an der Stad Lëtzebuerg
  • Rond-point Robert-Schaffner, den Iergäertchen
  • Rond-point Serra um Kierchbierg

Um Spaweck

Commons: Rond-point Robert-Schuman – Biller, Videoen oder Audiodateien