Minière Prince Henri
D'Minière Prince Henri zu Esch-Uelzecht, och nach Minière Eisekaul genannt, gouf als Konzessioun "Holzebierg - Prince Henri" zanter dem Joer 1900 exploitéiert.
.jpg)
.jpg)
.jpg)
Den Numm geet op de fréiere Prince-lieutenant vu Lëtzebuerg, de Prënz Hari, zeréck.
D'Entrée fir an d'Minière ass zu Esch an der Eisekaul. Lénks donieft war e Fërdertuerm mat Schacht fir an dat schwaarzt Lager, deen awer virun 1935 nees ofmontéiert gouf.
Eng vun de Galerië geet am sougenannte Burbacher Lach fort, ënner dem Holzebierg erduerch, a kënnt op der Rëmelenger Säit am Laangegronn eraus, do wou haut d'Gleiser vun der Intermoselle leien. Um déifste Punkt louch dës Galerie ronn 100 Meter ënner dem Buedem. Haut lafen d'Kabele vun der Kollektivantenn do derduerch.
En aneren Agank war zu Rëmeleng am Pafert.
D'Minière huet haaptsächlech d'Héichiewe vun der Brasseur-Schmelz (déi spéider der Rothe Erde, dunn der Société Métallurgique des Terres Rouges an duerno der Arbed-Terres Rouges gehéiert huet) op Barbuerg alimentéiert. En Deel vun der Minett ass awer och duerch de Laangegronn evakuéiert ginn.
D'Proprietäre waren (chronologesch):
- Aachener Hütten-Aktien-Verein (1900)
- Gelsenkirchener Hütten- und Bergwerksverein (1907)
- Société Métallurgique des Terres Rouges (1919)
- ARBED (1937)
Zweete WeltkrichÄnneren
Wärend dem Zweete Weltkrich huet d'Fërderung opgehalen. Eng vun de Galerië gouf als Bunker Eisekaul mat hëlzenem Dortoir a klengem Kacheck ageriicht, fir datt sech do tëscht Abrëll an August 1944 bis zu 25 Refractairë verstoppe konnten. Jiddweree vun de Jonge war bewaffent, fir sech am Fall vun engem Iwweraschungsugrëff wieren ze kënnen. De Bunker louch eng 2 km vun der Entrée ewech, ronn 70 m ënner dem Buedem. D'Minière hat de Virdeel, datt se verloosse Galerien opweises hat, an datt se Esch mat Rëmeleng an Däitsch-Oth verbonnen huet. De Ravitaillement gouf vu baussen organiséiert a mat elektresche Lokomotiven erabruecht. An der Nuecht vum 19. op den 20. August 1944 war et eriwwer mat der Cache, wéi eng Patrull vun der "Werkschütz" do laanschtkoum. D'Refractairë sinn duerno vun den Escher Leit a vun deenen aus den aneren Dierfer vun der Ëmgéigend verstoppt ginn.
MonumentÄnneren
1965 gouf do ee Monument mat enger Plack ageweit. D'Opschrëft op der Plack ass:
En l'honneur des vaillants résistants, qui, en 1944, ont réussi à sauver la vie de 25 patriotes réfugiés devant la terreur nazie dans un bunker de la mine Eisekaul.
Les Rescapés.
D'Monument gouf am Laf vun de Joren duerno op de Gaalgebierg, bei de Camping, geplënnert.
Kuckt ochÄnneren
Um SpaweckÄnneren
| Commons: Minière Prince Henri – Biller, Videoen oder Audiodateien |
