Gaalgebierg (Esch-Uelzecht)

Dësen Artikel beschäftegt sech mat dem Hiwwel zu Esch-Uelzecht. Fir aner Plaze mam selwechten Numm, kuckt wgl. Gaalgebierg.

De Gaalgebierg ass en Zeiebierg zu Esch-Uelzecht, op deem ënner anerem en Deel vum Stadpark, e Bësch, e Camping, an den Escher Déierepark leien.

Gaalgebierg

Lokalisatioun
Land	Lëtzebuerg
Gemeng	Esch-Uelzecht
Plaz	Esch-Uelzecht
Koordinaten	49°29'5,10"N, 5°59'8,23"O
Struktur	Zeiebierg
Fläch	63 ha
Héicht	400,9 m
Basisschicht	Ënneschten Dogger (dou)
Deckschicht(en)	Glimmermergel (dom1) Ëttenger Kallek (dom2) Haut-Pont-Kallek (dom3)

Beschreiwung

E läit am Süde vun Esch, wou en un den Uelzechtdall stéisst. Fir de Rescht trennt eng 30 bis 60 Meter déif Sank de Bierg vun den Héichte vun der Minettscuesta un déi en am Osten (Ostbierg, Leisebierg), Süden (Holzebierg, Heenzebierg) a Westen (Kazebierg) stéisst.

Déi héchst Plaz ass um Camping mat enger Héicht vu 400,9 Meter.

Accès

Vun der Escher Gare aus ass de Gaalgebierg fir Foussgänger iwwer d'Passerell nieft der Escher Gare z'erreechen. Deelweis ass de Gaalgebierg och mam Auto zougänglech. D'Escher Gemeng bedreift och eng Bus-Navette, de Gaalgebus fir bis zu 8 Passagéier, mat deem ee vun der Bus-Gare aus all hallef Stonn bis uewen op de Gaalgebierg an zeréck fuere kann.

Numm

Am 17. Joerhonnert hat den Här vun Esch d'Recht, d'Awunner auszebaatschen, hire Kapp ofschloen ze loossen oder si erhänken ze loossen. 1676, wéi Lëtzebuerg en Deel vun de Spuenesche Nidderlanden ënner dem Kinnek Carlos II. vu Spuenien war, gouf den éischte Gaalgen um haitege Gaalgebierg gebaut. Am selwechte Joer gouf den éischten Escher Bierger vum Geriicht zum Doud verurteelt, gekäppt a mat de Féiss um Gaalgen opgehaangen.