Kierch Biekerech

D'Kierch zu Biekerech ass eng kathoulesch Kierch, déi zur Par Atertdall Sainte-Claire an zu der Gemeng Biekerech gehéiert.

Kierch vu Biekerech

D'Kierch vu Biekerech (2013)

Uertschaft / Plaz

Biekerech

Par

Atertdall
Sainte-Claire

Numm / Patréiner

Hl. Péitrus a Paulus

Konsekratioun

1723

Baujoer

1711

Koordinaten

49° 43’ 56.3’’ N
05° 53’ 08.1’’ O

Kierchen - Kapellen

D'Patréiner vun der Kierch sinn déi zwéin Helleg Péitrus a Paulus, deenen hiert Fest den 29. Juni gefeiert gëtt. Niewpatréiner sinn den hellege Sebastian an den hellege Rochus. Viru 1628 war den hellege Péitrus deen eenzege Patréiner.

D'Kierch läit am Oste vun der Uertschaft nieft der Dikrecher Strooss, der N24.

Den 11. Februar 2022 gouf s'als nationaalt Monument klasséiert.^[1]

Zur fréierer Par Biekerech hunn ausser der Parkierch vu Biekerech och nach d'Kapell vu Liewel, d'Kapell vun Hitten an d'Jobskapell um Kuelebierg gehéiert.

Geschicht

Déi éischt Kierch zu Biekerech gëtt dokumentaresch schonn am 12. Joerhonnert ernimmt.

1711 gouf ënner dem Paschtouer Kuborn d'Schëff vun der haiteger Kierch nei gebaut. Se gouf du 1723 vum Tréierer Weibëschof Johann Matthias von Eyss konsekréiert^[2]

1742 a 1748 krut dëse Bau en neien Daach. Den Tuerm koum 1750 dobäi. Um Kierchtuerm iwwer der Agangsdier ass d'Joreszuel 1750 grouss ze gesinn.

1850 ass d'Querschëff agebaut ginn. 1897 gouf den haitege Chouer an d'Sakristei gebaut.

Am Tuerm hänken dräi Klacken, zwou vun 1869/1870 (Helleg Péiter & Pol a Marie) vun engem Géisser François vu Metz an eng vun 1976 (Tous les Saints) vun der Klackegéisserei Mabilon vu Saarburg.

D'Kierch gouf fir d'lescht 2000 bis 2001 renovéiert; dobäi gouf och den Duxall ofgerappt an d'Uergel gouf nieft dem lénkse Säitenaltor opgeriicht.

Well am Laf vun der Zäit vill un der haiteger Kierch geschafft gouf, ass dat zentraalt Kiercheschëff romanesch, d'Querschëff awer gotesch. Den Haaptaltor am Chouer staamt aus dem Barock.

Kräizwee

De Kräizwee huet 7 Statiounen a fänkt ronn 150 Meter vun der Kierch ewech un a féiert bis bei d'Jobskapell um Kuelebierg.

D'Statioune stinn all am Fräien a sinn aus Lëtzebuerger Sandsteen.

Mëttlerweil sinn déi eenzel Statiounen alleguer Kopien, vu datt d'Originaler scho viru 1600 opgeriicht goufen.

Uergel

D'Hauptuergel an der Biekerecher Parkierch (Dezember 2013).

D'Uergel gouf 1931 vun der Lëntgener Uergelfabréck ënner der Leedung vum Geoerges Haupt gebaut an den 11. Oktober 1931 ageweit.

D'Instrument gouf bei der Renovatioun vun der Kierch an de Joren 2000-01 vum Duxall an de Chouer deplacéiert, d'Dispositioun gouf awer net geännert an ass nach ëmmer déi nämmlecht.

Den Opbau vun der Uergel:

I Haaptwierk (6 Reg.)
II Schwellwierk (8 Reg.)
Pedall (3 Reg.)

Literatur

Bosseler, Nic, 1975: Beckerich, Hüttingen und Levelingen, in ihrer schicksalhaften Geschichte im Wandel der Jahrhunderte, Krippler & Cie, 332 S., S. 78-123

D'Paschtéier vu Biekerech

1265: Nikolaus von Bekirchen
1276: Theodorich von Bethkyrche
1351: Johann von Betonglises
1476: Michel
1476: Jean Naeuve de Noirhusen
1484: Nikolaus de Belkirchen
1510: Pilgrinus
1540: Michel Naewen
1550: Reinhard Dunninger
1552: Johann von Gerlingen
1570: Nikolaus von Brittert (Breitert)
1579: Conrad Ell
1580: Nikolaus Rantzleiden
1586: Anton Donlingen
1589: Michel Heintz
1596: Johann Kalbfleisch (Mucheron, Machuray, Moschion)
1617: Robert Lindanus
1623: Nikolaus Molinaeus (Molinarus)
1633: Rudolf Weingart
1636: Ludwig Molinaeus (Moliné, Molinari)
1679: Michel Kuborn (Geimlinger, Kuboren) vu Grëmmelescht
1716: Nicolas Becker
1717: Peter Mallaise (Maller, Mallert) vu Stroossen
1737: Heinrich Bertembois vu Grendel
1758: Peter Mayss (Meys, Meis) vu Schweech
1775: Heinrich Hemmer vu Bierchem
1794: Nikolaus Michels vu Leideleng
1800: Nikolaus Palen vu Rued
1818: Peter Guerstener vu Bruch
1873: Johann Welter vun Ierpeldeng (Sauer)
1875: Nikolaus Mertens vu Mamer
1900: Theodor Maeillet vu Rouderssen
1908: André Clemens vu Méischdref
1929: Joseph Poos vu Béiwen
1947: Albert Muller aus dem Rollengergronn
1952: Mathias Fellens vu Wäiswampech
2000: John. Bintz vun Useldeng
2004: Nicolas Hardt vu Grooljen
2005: Denis Wellisch vu Colmar (Fr.), leschte Paschtouer deen am Paschtoueschhaus zu Biekerech gewunnt huet
zanter 2010: Mathieu Janssen