Baudouin vun der Belsch

De Baudouin Albert Charles Léopold Axel Marie Gustave, ((nl) Boudewijn Albert Karel Leopold Axel Marie Gustaaf), gebuer de 7. September 1930 op Schlass Stuyvenberg, zu Laeken, an der Belsch, a gestuerwen den 31. Juli 1993 op Schlass Motril, a Spuenie war vun 1951 bis 1993 Kinnek vun de Belsch. Hie war den eelste Jong vum Leopold III. aus dem Haus Sachsen-Coburg Gotha an deem senger éischter Fra, der Prinzessin Astrid vu Schweden.

Baudouin vun der Belsch
Titelen
Kinnek vun de Belsch
Zäit	11.08.1950 — 17.07.1951 (Regence)
Virgänger	Leopold III. vun der Belsch
Zäit	17.07.1951 – 31.07.1993
Nofollger	Albert II. vun der Belsch
Biographie
Gebuer	7. September 1930 Laeken
Gestuerwen	31. Juli 1993 Motril
Bestuet mat	Fabiola de Mora y Aragón
Papp	Leopold III. vun der Belsch
Mamm	Astrid vu Schweden
Geschwëster	Marie-Christine vun der Belsch, Ingeborg Verdun, Albert II. vun der Belsch, Alexander vun der Belsch, Joséphine-Charlotte vun der Belsch, Maria-Esméralda vun der Belsch

De Monogramm

No der Landung vun den Alliéierten 1944 gouf d'kinneklech Famill fir d'éischt an Däitschland op Hirschstein, an am Mäerz 1945 op Strobl an Éisträich bruecht. No der Befreiung krut de Kinnek Leopold III. virgeworf, am Krich bei der däitscher Invasioun, 1940, ze fréi kapituléiert ze hunn. Hie konnt dowéinst net direkt an d'Belsch zeréck. Säi Brudder, de Prënz Charles, huet d'Regence iwwerholl, well säi Brudder an der "Incapacitéit, ze regéiere" wier.

Well et politesch zu kenger Léisung ëm d'Question royale koum, gouf schlussendlech decidéiert, e Referendum (Consultation populaire) ofzehalen. 58 % vun de Wieler hu sech fir de Leopold ausgeschwat, wann et och regional staark Ënnerscheeder am Resultat gouf. Den 22. Juli 1950 ass de Leopold op Bréissel hanneschtkomm. Et koum doropshin zu schwéieren Onroue bei wallouneschen Aarbechter, sou datt de Leopold III. ofgedankt a virgeschloen huet, säi Jong, de Prënz Baudouin, sollt Kinnek ginn. Dësen huet de 17. Juli 1951 säin Eed op d'Verfassung ofgeluecht a gouf de fënnefte Kinnek vun de Belsch.

De 15. Dezember 1960 huet hie sech mat der Doña Fabiola Fernanda María de las Victorias Antonia Adelaida de Mora y Aragón (11. Juni 1928 - 5. Dezember 2014) bestuet, enger fréierer Infirmière a Kannerbuchautorin. Si krute keng Kanner.

1990 koum et zu enger Verfassungskris, well de Baudouin, wéinst sengem kathoulesche Glawen, e Gesetz dat den Avortement liberaliséiere sollt, net ënnerschreiwen (an deemno a Kraaft triede loossen) wollt. Op säin eegene Wonsch hin huet déi belsch Regierung hien de 4. Abrëll 1990 fir net am Stand, ze regéieren erkläert. D'Verfassung huet fir sou ee Fall virgesinn, datt déi ganz Regierung d'Funktioun vum Staatschef iwwerhuele géif. Nodeems all Regierungsmemberen d'Gesetz ënnerschriwwen haten, hu se deen Dag drop, de 5. Abrëll 1990, de Baudouin nees fir kapabel erkläert, ze regéieren.

No sengem stënterlechen Doud gouf, well e selwer keng Kanner hat, säi Brudder Albert II. säin Nofollger.

Kuckt och

• Lëscht vun den Herrscher vun der Belsch

Um Spaweck

Commons: Baudouin vun der Belsch – Biller, Videoen oder Audiodateien

• CV vum Baudouin