Traité vu London (1867)

Dëse Geschichtsartikel ass eréischt just eng Skizz. Wann Dir méi iwwer dëst Theema wësst, sidd Dir häerzlech invitéiert, aus dëse puer Sätz e richtegen Artikel ze schreiwen. Wann Dir beim Schreiwen Hëllef braucht, da luusst bis an d'FAQ eran.

Den Traité vu London aus dem Joer 1867 war d'Resultat vun engem Kongress, deen tëscht dem 7. an dem 11. Mee 1867 zu London ofgehale gouf. D'Zil vun dësem Kongress war et, eng Léisung fir d'Lëtzebuerg-Kris ze fannen.

Säit mat den Ënnerschrëften a Sigelen

De Wëllem III. wollt nämlech Lëtzebuerg un den Napoleon III. verkafen, mä den Otto von Bismarck war domat net d'accord. Am Traité vu London gouf d'Fro gereegelt, a Lëtzebuerg a Limburg aus dem Däitsche Bond entlooss. Lëtzebuerg krut seng Onofhängegkeet an et gouf als neutral erkläert. Dofir huet d'Festung Lëtzebuerg misse geraumt an uschléissend geschleeft ginn.

D'Schleefe vun der Festung huet 16 Joer gedauert (1867-1883), woubäi d'Opbaute vum Bock verschwonne sinn, awer glécklecherweis d'Kasematte wéinst Gefor fir d'Stad net gesprengt konnte ginn.

Ënnerschrëften um Traité

Dës Länner hunn, duerch hir Representanten, den Traité vu London ënnerschriwwen:

• Éisträich-Ungarn, representéiert duerch de Rudolf Apponyi
• D'Belscht Kinnekräich, representéiert duerch de Sylvain Van de Weyer
• D'Keeserräich Frankräich, representéiert duerch de Prince de La Tour d'Auvergne-Lauraguais
• D'Kinnekräich Italien, representéiert duerch de Marquis d'Azeglio
• D'Groussherzogtum Lëtzebuerg, representéiert duerch de Victor de Tornaco an den Emmanuel Servais
• D'Kinnekräich vun den Nidderlanden, representéiert duerch de Barong Bentinck
• D'Kinnekräich Preisen, representéiert duerch de Grof Bernstorff-Stintenburg
• D'Russescht Keeserräich, representéiert duerch de Barong Brunnow
• D'Vereenegt Kinnekräich, representéiert duerch de Lord Stanley

Italie war am Ufank net op d'Konferenz invitéiert, well et sougutt wéi näischt direkt mat Lëtzebuerg ze dinn hat. Mee dëst war eng giedlech Geleeënheet fir de Kinnek Vittorio Emanuele, fir datt dat nei geschaf Italie mat den anere Groussmuechten zesummen op enger internationaler Konferenz kéint derbäi sinn, an hien huet déi aner iwwerzeegt kritt, datt säi Land mat um Dësch sollt sëtzen.

Et ass dëst déi éischt Kéier, datt e Vertrieder vu Lëtzebuerg en internationalen Traité mat ënnerschriwwen huet.

Kuckt och

• Traité vu London (1839)

Um Spaweck

• Biller vum Originaldokument um Site vun den Nationalarchiven.
• Diane Lecorsais Trinkfreudige Soldaten, enge Gassen und ein erster "Finanzplatz" op wort.lu den 18. Mee 2017
• Zweites Gründungsdatum Luxemburgs op wort.lu den 12. Mee 2017
• Pol Schock Editorial - Luxemburg schleift sich ab op wort.lu den 11. Mee 2017
• Pol Schock 150 Jahre Londoner Vertrag - Luxembourg for sale op wort.lu den 11. Mee 2017