Wikipedia, déi fräi Enzyklopedie

Tilly Metz

lëtzebuergesch Politikerin

D'Tilly Metz, gebuer de 26. Mee 1967 an der Stad Lëtzebuerg, ass eng lëtzebuergesch Politikerin a Member vun der grénger Partei (déi Gréng).

Tilly Metz
Tilly Metz, 2022 (cropped).jpg
Gebuer 26. Mee 1967
Lëtzebuerg
Nationalitéit Lëtzebuerg
Educatioun Universitéit vu Léiwen
Aktivitéit Politiker, Lycéesprofesser
Partei déi gréng
Wikidata-logo-without-paddings.svg

Nodeem si Geeschtes- a Sozialwëssenschaften enseignéiert huet, war si Directrice adjointe vum Lycée technique pour professions éducatives et sociales (LTPES) zu Miersch.

Si war Buergermeeschtesch vun der Gemeng Weiler zum Tuer an ass zanter Juni 2018 Member vum Europäesche Parlament an der Grupp déi Gréng/ALE. Do engagéiert se sech besonnesch an den Themen Déiereschutz, Gesondheet a Mënscherechter.

Politesch CarrièreÄnneren

Wärend hirem Psychologies- a Pedagogiesstudium war d'Tilly Metz an der Sozialistescher Partei Lëtzebuerg am Cercle Michel Welter engagéiert, dee sech virun allem mat Gesondheet, Educatioun a Behënnerungstheme beschäftegt. 2001 ass si du Member an der grénger Partei ginn a war vun 2004 bis 2009 hir Spriecherin[1].

2005 gouf d'Tilly Metz Buergermeeschtesch vun der Gemeng Weiler zum Tuer a blouf dat bis 2011[2]. Si war déi éischt weiblech Buergermeeschtesch vun där Gemeng an déi éischt gewielt Buergermeeschtesch vun de Gréngen an der Gemeng[1].

Am Oktober 2017 gouf si an de Gemengerot vun der Stad Lëtzebuerg gewielt.

2018 gouf si fir déi Gréng/ALE-Fraktioun am Europaparlament, d'Nofollgerin vum Claude Turmes deen demissionéiert huet fir de Camille Gira an der Regierung z'ersetzen, wéi deen de 16. Mee 2018 gestuerwen ass. Bei de Wale fir d'Europäescht Parlament 2019 gouf si erëmgewielt.

Am Europäesche Parlament ass si d'Presidentin vun der Delegatioun fir Bezéiunge mat Zentralamerikanesche Länner (DCAM)[3]. Si ass och e permanente Member vum Comité fir Ëmwelt, Ëffentlech Gesondheet a Liewensmëttelsécherheet (ENVI)[4], dem Comité fir Transport an Tourismus (TRAN)[5] an der Delegatioun vun der Euro-Latäinamerikanescher Parlamentarescher Versammlung (DLAT)[6]. Si ass en Ersatzmember vum Comité fir Landwirtschaft an nohalteg Entwécklung (AGRI)[7].

Fir 12 Méint huet d'Tilly Metz den ANIT Spezialcomité[8] presidéiert, deen am Juni 2020 gegrënnt gouf fir Verstéiss géint d'Uwendung vum Uniounsrecht iwwer de Schutz vun Déiere beim Transport a verbonnen Operatioune bannent an ausserhalb vun der Unioun ze ënnersichen.

InteressevertriedungÄnneren

ËmweltÄnneren

D'Tilly Metz huet gehollef de Rapport "From Farm to Fork" auszeschaffen, an deem si déi ëmmer méi intensiv exportorientéiert Agrarpolitik verurteelt, déi fir d'Ëmwelt schiedlech ass. D'Gesetzer fir Pestiziden ze reduzéieren si géint déi mächteg agribusiness Lobbye geriicht[9]. Als Member vun der Kommissioun fir den Transport an den Tourismus setzt Tilly Metz sech mat der Stëmm vun de Gréngen/ALE fir en nohaltegen Tourismus an[10]. Si huet un der Gesetzgebung deelgeholl fir e soziale Klimafong op d'Been ze stellen fir der Erhéijung vun den Energiepräisser entgéint ze wierken, déi déi wirtschaftlech a sozial benodeelegt Stéit am meeschte betrëfft[11].

GesondheetÄnneren

D'Tilly Metz engagéiert sech am Beräich vun de rare Krankheeten a Behënnerungen. 11 Joer laang war si Presidentin vun der Vereenegung " Multiple sclérose Letzebuerg"[12], déi sech als Zil gesat huet, den Alldag vu Leit mat Multiple Sklerose an hir Integratioun an d'Gesellschaft ze verbesseren an ze erliichteren.

Am Europaparlament, a virun allem an der ENVI-Kommissioun, ass d'Tilly Metz aktiv an de Gesondheetsfroen. Si war e puer Mol Schietsrapporterin fir déi Gréng/ALE-Fraktioun, ënner anerem d'Ofstëmmung iwwer de Bericht vun enger pharmazeutescher Strategie[13] an d'Propositioun fir eng Regulatioun vum Europäesche Parlament a vum Conseil fir d'Roll vun der Europäescher Medikamenter-Agence ze stäerken.

D'Tilly Metz war stellvertriedende Member vun der Spezialcommissoun am Kampf géint de Kriibs (BECA)[14], déi als Äntwert op d'wuessend Krribsprevalenz an Europa gegrënnt gouf[15].

Si ass ausserdeem Rapporteur vum Spezialcomité iwwer "Lektioune vun der COVID-19-Pandemie an Empfeelunge fir d'Zukunft"[16] deen am Mäerz 2022 gegrënnt gouf.

MënscherechterÄnneren

D'Tilly Metz engagéiert sech fir d'Mënscherechter, notamment duerch hir Presidence vun der Delegatioun fir Bezéiunge mat Zentralamerikanesche Länner (DCAM)[3] am Europaparlament. D'Delegatioun organiséiert d'Aarbecht a mëscht Recherchen iwwert déi politesch, wirtschaftlech, sozial, a Mënscherechtssituatioun an den néng Partnerlänner Belize, Costa Rica, Kuba, der Dominikanescher Republik, El Salvador, Guatemala, Honduras, Nicaragua a Panama. Hir Prioritéite sinn de Schutz vun de Mënscherechter, d'Rechter vun de Fraen an der LGBTQ+ Gemeinschaft, souwéi de Schutz vun Naturvölker an Ëmweltschützer an dëser Regioun[17].

DéiereschutzÄnneren

An den éischte Jore vun hirem Mandat huet d'Tilly Metz sech besonnesch fir Déiereschutz agesat. Si gouf zur Cheffin vun der Enquêtëkommissioun zum Schutz vun den Déiere beim Transport[1] ernannt, där hire Schlussrapport[18] am Dezember 2021 ugeholl gouf. Si huet betount, datt et wichteg ass, fir en eenheetleche Schutzniveau fir Déiere wärend der Rees ze garantéieren, genee wéi et wichteg ass, datt Transporteuren a Chauffeuren sech un eenheetleche Reegele beim grenziwwerschreidend Transport mussen halen[19]

D'Tilly Metz setzt sech och géint Déierentester an a begréisst, datt d'Europaparlament fir en Aktiounsplang gestëmmt huet fir d'Benotzung vun Déiere bei wëssenschaftlechen Experimenter an Tester ofzeschafen. Den adoptéierten Text ass net bindend fir d'Memberstaaten.[20].

AtomwaffenÄnneren

Am Februar 2019 huet d'Tilly Metz, zesumme mat zwou aneren Europadeputéierten aus der grénger Fraktioun (der Molly Scott Cato an der Michèle Rivasi an anere belschen Aktiviste vun der Organisatioun Agir pour la Paix, op der Militärbasis Kleine Brogel demonstréiert, andeems se d'Pist fir F16- Fligere blockéiert hunn. Domat wollte si op d'US Atomwaffen, déi zënter 1984 op der Basis gelagert sinn, opmierksam maachen an hire Réckzuch, wéi och allgemeng dee vun US-Atomwaffen op europäeschem Territoire, verlaangen.

Kuckt ochÄnneren

Um SpaweckÄnneren

ReferenzenÄnneren

  1. ↑ 1,0 1,1 1,2 L’INTERVIEW DU MOIS Tilly Metz. issuu. Gekuckt de(n) 2022-11-10.
  2. ↑ Commune Weiler-la-Tour. elections.public.lu. Gekuckt de(n) 2022-11-10.
  3. ↑ 3,0 3,1 Home | DCAM | Delegationen | Europäisches Parlament. www.europarl.europa.eu. Gekuckt de(n) 2022-11-10.
  4. ↑ Info | ENVI | Ausschüsse | Europäisches Parlament. www.europarl.europa.eu. Gekuckt de(n) 2022-11-10.
  5. ↑ Info | TRAN | Ausschüsse | Europäisches Parlament. www.europarl.europa.eu. Gekuckt de(n) 2022-11-10.
  6. ↑ Präsentation | Über die Delegationen | DLAT | Delegationen | Europäisches Parlament. www.europarl.europa.eu. Gekuckt de(n) 2022-11-10.
  7. ↑ Info | AGRI | Ausschüsse | Europäisches Parlament. www.europarl.europa.eu. Gekuckt de(n) 2022-11-10.
  8. ↑ Info | ANIT | Ausschüsse | Europäisches Parlament. www.europarl.europa.eu. Gekuckt de(n) 2022-11-10.
  9. ↑ How the Farm to Fork Strategy can Fix our Food System
  10. ↑ Cláudia MONTEIRO DE AGUIAR, BERICHT über die Festlegung einer EU-Strategie für nachhaltigen Tourismus | A9-0033/2021 | Europäisches Parlament. www.europarl.europa.eu. Gekuckt de(n) 2022-11-10.
  11. ↑ European Parliament, Social Climate Fund | Legislative Train Schedule. European Parliament. Gekuckt de(n) 2022-11-10.
  12. ↑ Multiple Sklerose Lëtzebuerg. Gekuckt de(n) 10 November 2022.
  13. ↑ Dolors MONTSERRAT, BERICHT über eine Arzneimittelstrategie für Europa | A9-0317/2021 | Europäisches Parlament. www.europarl.europa.eu. Gekuckt de(n) 2022-11-10.
  14. ↑ Info BECA Ausschüsse Europäisches Parlament. www.europarl.europa.eu. Gekuckt de(n) 2022-11-10.
  15. ↑ European Cancer Information System. ecis.jrc.ec.europa.eu. Gekuckt de(n) 2022-11-10.
  16. ↑ Angenommene Texte - Einsetzung eines Sonderausschusses zu den Erkenntnissen aus der COVID-19-Pandemie und Empfehlungen für die Zukunft - Donnerstag, 10. März 2022. www.europarl.europa.eu. Gekuckt de(n) 2022-11-10.
  17. ↑ déi Gréng. tillymetz.lu. Gekuckt de(n) 2022-11-10.
  18. ↑ Von besonderem Interesse. Home. ANIT. Ausschüsse. Europäisches Parlament. www.europarl.europa.eu. Gekuckt de(n) 2022-11-10.
  19. ↑ Fiche de procédure: 2020/2269(INI). Observatoire législatif. Parlement européen. oeil.secure.europarl.europa.eu. Gekuckt de(n) 2022-11-10.
  20. ↑ MEPs prod Commission to chart animal testing phase out
Vun „https://lb.wikipedia.org/w/index.php?title=Tilly_Metz&oldid=2415938“