Samantha Cristoforetti

D'Samantha Cristoforetti, gebuer de 26. Abrëll 1977 zu Mailand, ass eng italieenesch Kampfpilotin an Astronautin.

Samantha Cristoforetti

Land	Italien
Agentur	ESA
Auswiel	20. Mee 2009
Zuel	1
Éischte Start	23. November 2014
Lescht Landung	11. Juni 2015
Dauer	199d 16h 43min
1. Missioun	Expeditioun-42-43
2. Missioun
ausgescheet	aktiv

D'Samantha Cristoforetti op der re:publica zu Berlin (2012)

Liewen

Studium

D'Cristoforetti huet am Kader vum Erasmus-Austauschprogramm op der Technescher Universitéit München, der École nationale supérieure de l'aéronautique et de l'espace zu Toulouse an der Russescher Chimie-Technologescher Universitéit zu Moskau Ingenieurswëssenschafte studéiert, an de Studium am Joer 2001 ofgeschloss. Am Joer 2005 huet si e Master an der Loft- a Raumfaarttechnik op der Universitéit Neapel absolvéiert.

Loftwaff

D'Cristoforetti koum 2001 bei d'italieenesch Loftwaff an huet un der Loftwaffenakademie Pozzuoli studéiert, déi si am Joer 2005 ofgeschloss huet. Dono gouf si un der Sheppard Air Force Base zu enger Kampfpilotin ausgebilt. No hirem Ofschloss huet si vun 2006 un beim Geschwader 51º Stormo Ferruccio Serafini zu Istrana a vun 2008 un beim 32° Stormo „Armando Boetto“ zu Amendola gedéngt.

Raumfaart

D'Cristoforetti hat sech bei der Auswielmethod vun der ESA géint méi wéi 8.400 weider Interessenten duerchgesat a gouf den 20. Mee 2009 zu Paräis, als eenzeg Fra ënner sechs neien Astronaute vum Europäeschen Astronautecorps, dem Public virgestallt.

Den 3. Juli 2012 hat d'ESA bekanntgemaach, datt d'Cristoforetti am Joer 2014 zu engem Laangzäitopenthalt op d'ISS starte géif. Si ass den 23. November 2014 mam Raumschëff Sojus TMA-15M op d'International Raumstatioun geflunn als Member vun den ISS-Expeditiounen 42 an 43. De 7. Juni 2015 gouf si op hirem 195. Missiounsdag vun der US-Amerikanerin Sunita Williams als Rekordhalterin fir Laangzäitflich vu Fraen am Weltall ofgeléist^[1]. D'Landung war den 11. Juni 2015.

De 6. Mäerz 2013 krut si d'Verdéngschtmedail vun der Italieenescher Republik iwwerreecht^[2].

Privates

Zu hiren Hobbyen zielen Biergklammen, Dauchen, déi chineesesch Sprooch an Hielefuerschung. Si schwätzt Italieenesch (Mammesproch), Englesch, Däitsch, Franséisch a Russesch.

Wéi vill Astronauten ass och d'Samantha Cristoforetti Funkamateurin mat dem Amateurfunkruffzeechen IZ0UDF^[3].