Lamorménil

Lamorménil och Lamôrmenil oder Lamormenil ass eng Uertschaft an der belscher Provënz Lëtzebuerg.

Lamorménil
Land	Belsch
Regioun	Wallounien
Communautéit	Franséisch Communautéit
Provënz	Lëtzebuerg
Arrondissement	Marche-en-Famenne
Gemeng	Manhay
Koordinaten	50° 15’ 17.10’’ N       05° 38’ 13.26’’ O
Telefonszon	063
Postcode	6706

Bis zu de belsche Gemengefusioune vun 1977 war Lamorménil eng Sektioun vun der fréierer Gemeng Dochamps.

Lamorménil läit um Westhank vun enger 540 Meter héijer Kopp, tëscht der Aisne am Norden an hiren zwou Niewebaachen der Lue am Süden an am Westen souwéi dem Ruisseau du Pont d'Ayneu am Osten.

Geschicht

Grad wéi déi fréier Gemeng Dochamps huet Lamormenil an der Feodalzäit zur Seigneurie vu Montaigu am Quartier Marche gehéiert.

Bekannt Persounen

De Guillaume Germai (1570-1648) a säi Brudder Henri (1576-1647) allen zwéi Jesuitepateren sinn zu Lamorménil op d'Welt komm. Eng Plack um Parvis vun der Kierch zu Dochamps erënnert un déi zwéi Bridder.

Kuckeswäertes

D'Jousefskapell vun 1933 ass e Gebai am neo-romanesche Stil dat no der Traditioun vum Condroz a vun de belschen Ardennen aus Sandsteng a bloe Steng gebaut gouf. Vis-à-vis vun der Kapell steet e Weekräiz dat un déi zwéi Germai-Bridder erënnert.

Am Duerf gëtt et nach puer Häff aus dem 19. Joerhonnert déi mat Sandsteemollonge gebaut sinn an deelweis mat Schierbele gedeckt sinn. Zwéi Schieferträch erënneren un d'landwirtschaftlech Aktivitéit vum Duerf.

Um Spaweck

Commons: Lamorménil – Biller, Videoen oder Audiodateien