CoRoT-7 b

CoRoT-7 b, fréier CoRoT-Exo-7 b genannt, ass d'Bezeechnung vun engem Exoplanéit am Stärebild Monoceros. Mat engem Duerchmiesser vu ronn 22.000 Kilometer gehéiert hien zu de klengste bekannten Exoplanéiten. Hie gouf am Januar 2009 entdeckt a kreest ëm de Stär CoRoT-7. D'System ass ronn 150 Parsec (ongeféier 490 Liichtjoer) vun eiser Äerd ewech.

Verglach vun de Gréissten: Äerd, CoRot-7b an Neptun

kënschtleresch Duerstellung vum CoRot-7b

Eegenschaften

De CoRoT-7 b huet en Duerchmiesser vu ronn 22.000 Kilometer (zirka 3,6 Äerdradien, zirka 0,31 Jupiterradien). Hie gouf als siwenten Exoplanéitekandidat mat Hëllef vum Weltraumteleskop CoRoT-Weltraumteleskop entdeckt, wouduerch en och seng Bezeechnung krut. Exoplanéite ginn duerch déi grouss Zuel vun nei entdeckten extrasolare Planéite mat der Bezeechnung vum Zentralstär duergestallt a mat engem zousätzleche klenge Buschtaf (vum laténgeschen Alphabet, ugefaange mat „b“) identifizéiert.

De Planéit ass vun der Äerd ongeféier 150 Parsec (~ 490 Liichtjoer) ewech a kreest ëm säin Zentralstär CoRoT-7 op enger Distanz vu ronn 2,55 Millioune Kilometer (zirka 0,017 AE). Fir en Ëmlaf ronderëm säi Stär brauch hie nëmme ronn 20 Stonnen.

Nodeem d'Mass vum CoRoT-7 b ufanks op ongeféier 11 Äerdmasse (zirka 0,035 M_J) geschat gouf, hunn elo genee Miessunge, ënner Rücksicht vum nei entdeckten Nopeschplanéit CoRoT-7 c, datt CoRoT-7 b mat 4,8 Äerdmassen ee masseaarme Exoplanéit ass. Well och den Duerchmiesser vum CoRoT-7 b relativ kleng ass, gëtt hien zu den äerdänleche Planéiten an zu de sougenannte Superäerde gezielt.

D'Uewerflächentemperatur ass no Schätzunge wéinst der kuerzer Distanz zum Zentralstär iwwer 1300 Kelvin (~1000 Grad Celsius). D'Atmosphär besteet enger Simulatioun vun der Washington University zu St. Louis virun allem aus Natrium, Kalium, Siliziummonoxid a Sauerstoff. E klengen Deel maache Bestanddeeler aus: Magnesium, Aluminium, Kalzium an Eisen. Et gëtt ugeholl, datt dës Stoffer an héijeren Atmosphärschichte kondenséieren an et op CoRoT-7b dofir Kiselsteng „reent“.

Den Zentralstär

→ Haaptartikel: CoRoT-7

De Stär CoRoT-7 ass en Haaptreiestär vum Spektraltyp K0 mat enger visueller Hellegkeet vun 11,7 Magnitud. Mat enger Uewerflächentemperatur vu ronn 5300 Kelvin ass hien änlech wéi eis Sonn.

Kuckt och

Portal Astronomie

• Lëscht vun Exoplanéiten

Um Spaweck

• "Venustransit" bei CoRoT-7 – Artikel bei der Thüringer Landessternwarte Tautenburg
• CoRoT entdeckt extrasolaren Gesteinsplaneten – Artikel bei AVGB