Centre Wax

De Centre Wax ass e Kulturzentrum an der Rue de l'Église zu Péiteng, deen an der renovéierter Péitenger Millen ageriicht gouf an ënner der Gestioun vun der Konscht-Millen Péiteng a.s.b.l. steet.

De Kulturzentrum Wax (Feb. 2017)

De Centre Wax vum Kreesverkéier aus gekuckt (Okt. 2012)

Dat rout Haus virum Centre Wax (Feb. 2017)

D'offiziell Aweiung war den 18. Oktober 2012 a Presenz vun der Kulturministesch Octavie Modert.

Geschicht vum Gebai

• 1983: De Millebetrib gëtt agestallt, nodeem d'Millen 200 Joer laang am Besëtz vun der Famill Waxweiler war.
• 198x: De Staat keeft d'Gebai mat dem ganze Beréng fir kënnen de Contournement vu Péiteng ze bauen.
• 1986: D'Mille gëtt als nationaalt Monument klasséiert.
• 2000: D'Gebailechkeete gi vun der Gemeng Péiteng ënner dem deemolege Buergermeeschter Jean-Marie Halsdorf fir 11,5 Millioune Frang opkaaft.
• 2009 - 2012: Renovatioun an Ëmbau vum Gebai. Zoustänneg fir d'Renovéierung war d'Tatiana Fabeck. D'Maschinne vun der Mille sinn och erhalen a renovéiert ginn.

Aktivitéiten

• Am Rez-de-chaussée ass eng Brasserie an e Restaurant ageriicht.
• Um éischte Stack si Konschtatelieren.
• De Raum ënner dem Daach, dee mat enger Klengkonschtbün soll ekipéiert ginn, kann och fir Versammlungen a Receptioune benotzt ginn.

De Veräi Konscht-Millen Péiteng

D'Associatioun gouf den 28. Juni 2012 gegrënnt mam Zweck de Centre Wax ze verwalten a soziokulturell ze beliewen. President ass de Roger Klein.

Kuckt och

• Lëscht vun den nationale Monumenter an der Gemeng Péiteng
• Millen zu Lëtzebuerg

Um Spaweck

• Offiziell Websäit vum Centre Wax
• Websäit vum Veräin Konscht-Millen