Brichermillen (Mutfert)

Dësen Artikel beschäftegt sech mat dem Lieu-dit an der Gemeng Conter. Fir dee mat engem änlechen Numm an der Gemeng Helperknapp, kuckt wgl. Bricher Millen.

D'Brichermillen ass eng fréier Millen a Lieu-dit an der Gemeng Conter. Se läit un der Sir, op enger Héicht vun 264 Meter op der Grenz vun de Gemenge Conter, Weiler zum Tuer an Duelem. Dolaanscht féiert den CR132 vu Siren op Mutfert.

Brichermillen
D'Brichermillen, Mäerz 2013
An anere Sproochen	de: Brüchermühle
Land	Lëtzebuerg
Kanton	Lëtzebuerg
Gemeng	Conter
Buergermeeschter	Marion Zovilé-Braquet (CSV)
Koordinaten	49° 34’ 13.2’’ N       06° 13’ 53’’ O

E puer Honnert Meter nordëstlech vun der Mille läit de Bricherhaff. Béid Gebaier gehéieren dem selwechte Proprietär.

Geschicht

D'Mille gëtt fir d'éischt 1689 schrëftlech ernimmt, et gëtt awer ugeholl datt op där Plaz scho laang virdrun eng Mille stoung. D'Millen huet e puermol de Besëtzer gewiesselt an ass sou och ëmgebaut a vergréissert ginn. Zanter dem Enn vum 19. Joerhonnert gehéiert se der Famill Hemmen.

Bis 1913 gouf d'Energie mat Waasserkraaft gewonnen, duerno gouf mat Elektresch geschafft. Bei enger Explosioun gouf d'Gebai 1944 schwéier beschiedegt an ass duerno an der haiteger Form nei opgebaut ginn. Mam Millebetrib gouf 1975 opgehalen, zanterhier sinn do Wunnengen ageriicht.

Den Numm Bricher kënnt vum däitsche Wuert Bruch oder och Bruchwald, wat ee suppege Bësch ass.

Wanderweeër

Iwwer d'Brichermille féiert de Circuit auto-pédestre Nummer 1, den interkommunale Wanderwee Conter / Weiler zum Tuer an den Natur-Kulturpad Conter-Siren.

Quell

• De Panneau bei der Millen

Kuckt och

• Millen zu Lëtzebuerg

Um Spaweck

Commons: Brichermillen (Mutfert) – Biller, Videoen oder Audiodateien