Abell 1689
Den Abell 1689 ass e Galaxiëkoup, dee ronn 2,2 Milliarde Liichtjoer (670 Mpc) wäit vun eiser Äerd ewech am Stärebild Virgo läit. Et ass dee massiivsten Objet am Universum dee bis elo bekannt ass.
Bei Observatioune vum Galaxiëkoupzentrum déi d'Astronome mam Weltraumteleskop Hubble gemaach hunn, goufe ronn 10.000 Kugelstärekéip entdeckt. Op Basis vun där Zuel schätzen d'Astronomen, datt et an deem Koup an engem Beräich vu 2,4 Millioune Liichtjoer méi wéi 160.000 Kugelstärekéip ka ginn. Dat wier dann déi bis elo gréisst observéiert Populatioun.
D'Hubble-Observatioune weisen, datt sech déi meescht vun dësen Objeten an der Géigend vum Koupzentrum gebilt hunn, also do, wou och de gréissten Deel vun donkler Matière soll sinn. Jee méi ee sech dann distanzéiert, ëmsou manner Kugelstärekéip kënnen entdeckt ginn.[1]
Den Abell 1689 gëtt wéinst senger grousser Gravitatiounswierkung vu Fuerscher als Gravitatiounslëns benotzt an hat sou d'Entdeckung vun der A1689-zD1, enger iwwer 13 Milliarde Joer aler Galaxie (z ≈ 7,6) erméiglecht. Déi visuell Mass vun Abell 1689 mécht allerdéngs nëmmen ee Prozent vun der observéierter Gravitatiounswierkung aus, wouduerch déi am Ament villdiskutéiert Froen iwwer d'donkel Matière weidere Stoff kréien.
Kuckt och änneren
Um Spaweck änneren
- (en) Galaxy cluster Abell 1689: Biggest 'Zoom Lens' in Space Takes Hubble Deeper into the Universe (HubbleSite)
- (en) Galaxy cluster Abell 1689: Astronomers Find One of the Youngest and Brightest Galaxies in the Early Universe (HubbleSite)
- (en) Astronomers take a step towards revealing the Universe's biggest mystery, ESA/Hubble Press Release.