Virgo-Galaxiëkoup

De Virgo-Galaxiëkoup ass e grousse Galaxiëkoup mat op d'mannst 1300, méiglecherweis awer 2000 Galaxien, deem säin Zentrum op enger Distanz vu 65 Millioune Liichtjoer läit.

De Koup mécht den Zentrum vum lokale Superkoup, deen och Virgo-Superkoup genannt gëtt. Déi Lokal Grupp, vun der Galaxiëgrupp, zu där eis Mëllechstrooss gehéiert, ass en Deel vun dësem Superkoup.

Entdeckung

Galaxien am Zentrum vum Virgo-Galaxiëkoup mat Nimm a visuellen Hellegkeeten.
Déi zwéi gréissten Objete op dësem Bild sinn déi elliptesch Galaxien M84 an M86.

Den éischte Member vum Virgo-Galaxiëkoup gouf am Februar 1771 vum Charles Messier entdeckt. Mir wëssen haut, datt et sech bei der niwweleger Wollek, déi de Messier deemools katalogiséiert hat, fir Verwiesselunge mat Koméiten zevirzekommen, tatsächlech ëm déi elliptesch Risegalaxie Messier 49 handelt. Schonn am Mäerz vum selwechte Joer huet de Messier weider hell Membergalaxien, déi de Pierre Méchain entdeckt hat (dorënner d'Risegalaxie Messier 87, déi och als Virgo A bekannt ass) a säi Katalog agedroen. Dee Mount kann dofir als den Zäitpunkt vun der Entdeckung vu Galaxiëkéip ugesi ginn.

De Messier huet a sengem Katalog am Ganze 16 Galaxien agedroen, déi haut als Membere vum Virgokoup identifizéiert sinn: M49, M58, M59, M60, M61, M84, M85, M86, M87, M88, M89, M90, M91, M98, M99 a M100. De Messier huet a senge Notizen hanner der Androung fir M91 déi follgend Sätz geschriwwen (iwwersat nom Kenneth Glyn Jones):^[1]

D'Stärebild Virgo a speziell säin nërdlechen Deel ass eent vun de Stärebiller, dat déi meescht Niwwelen huet. De Katalog huet der 13, déi bestëmmt goufen, nämlech d'Nummeren 49, 58, 59, 60, 61, 84, 85, 86, 87, 88, 89, 90 an 91. All dës Niwwele schénge keng Stären ze hunn.

De Messier hat also schonn deemools erkannt, datt dës Niwwelen eng Grupp formen an datt et sech net ëm Stärekéip handelt. Ronn 150 Joer virun der éischter Observatioun vun Eenzelstären am Andromedaniwwel, konnt de Messier natierlech d'Natur vun de Galaxien als Stäresystem, baussenzeg vun eiser Mëllechstrooss, net erkennen.

Déi hell Sombrero-Galaxie M104, déi duerch hir Lag um Himmel visuell zu dëser Grupp gehéiert, ass allerdéngs kee Member vum Koup, well si eis méi no ass, wéi déi aner Galaxiëmembere vum Koup.

Galaxien am Virgokoup

Et gëtt ongeféier 30 Galaxien am Virgokoup, déi méi hell wéi 10,5. Gréissteklass sinn:^[1]

Galaxie	Typ	Mag
NGC 4192 = M98	SbI-II	10^m,13
NGC 4216	SbII	9^m,98
NGC 4254 = M99	ScI	9^m,84
NGC 4303 = M61	ScI	9^m,67
NGC 4321 = M100	ScI	9^m,37
NGC 4365	E2	10^m,5
NGC 4374 = M84	S0	9^m,27
NGC 4382 = M85	S0	9^m,22
NGC 4406 = M86	S0	9^m,18
NGC 4429	S0	10^m,16
NGC 4438	SBa	10^m,08
NGC 4442	E5p	10^m,48
NGC 4450	Sb	10^m,12
NGC 4459	E2	10^m,40
NGC 4472 = M49	E4	8^m,37

Galaxie	Typ	Mag
NGC 4473	E4	10^m,22
NGC 4477	S(B)a	10^m,42
NGC 4486 = M87	E1	8^m,62
NGC 4501 = M88	Sb+I	9^m,52
NGC 4526	E7	9^m,64
NGC 4535	S(B)c	9^m,82
NGC 4548 = M91(?)	SBb	10^m,19
NGC 4552 = M89	E0	9^m,81
NGC 4569 = M90	Sb+	9^m,48
NGC 4579 = M58	Sb	9^m,78
NGC 4596	SBa	10^m,48
NGC 4621 = M59	E3	9^m,79
NGC 4654 = IC3708	ScII	10^m,46
NGC 4649 = M60	E1	8^m,83
NGC 4762	SB0	10^m,22

Um Spaweck

(en) California Institute of Technology site iwwer de Virgo-Koup.
(en) Heron Island Proceedings
(en) Atlas of the Universe / The Virgo Cluster
(en) Chandra X-Ray Observatory: The Virgo Cluster
(en) The Virgo Cluster of Galaxies, SEDS Messier-Säiten

Kuckt och

Virgo (Stärebild)

Portal Astronomie

Referenzen

↑ ^1,0 ^1,1 Virgo-Koup bei SEDS

[seds-1] 1,0 ^1,1 Virgo-Koup bei SEDS

[1]