Villa Gillard

Geographesch Koordinaten:

49° 36’ 53.5’’ N 06° 07’ 47.9’’ O

D'Villa Gillard war en herrschaftlecht Haus an der Uewerstad vun der Stad Lëtzebuerg. Se louch um Eck vum Boulevard Royal mam Eecher Bierg.

Déi franséisch Ambassade an der Villa Gillard (ëm 1900)

Op der Plaz wou virdun en ëffentleche Gaart, de sougenannte jardin creux war, hat d'Marie Collart, Wittfra vum Industrielle Charles Eugène Gillard, am Joer 1883 eng Villa baue gelooss.

D'Marie Collart huet 1887 hire Schwoer, de Baron Charles Jacquinot, bestuet an d'Villa verkaaft. An der Villa war dunn déi franséisch Ambassade ier d'BIL Proprietär vum Gebai gouf an d'Villa als Déngschtwunneng fir den Direkter gebraucht gouf.

D'Villa ass 1962 ofgerappt gi fir de Siège vun der Bank, deen niewendru war, no de Pläng vum Nicolas Schmit-Noesen ze vergréisseren.

1998 huet d'Zentralbank déi ganz Terraine kaaft an d'Gebai renovéiere gelooss. Dat neit Gebai dat vum „Bureau Architecture & Urbnanisme 21 Worré et Schiltz“ ëmgebaut gouf, dréit haut den Numm vum Pierre Werner.

Literatur

• Christian Aschman, Joanna Grodecki, Robert L. Philippart Lëtzebuerg moderne: Liebeserklärung an die Hauptstadt S. 86-87, Édition Maison Moderne, 2013, ISBN 978-99959-33-07-4.

Um Spaweck

• Nummer 2 am Boulevard Royal - Geburtsort der Luxemburger Zentralbank op wort.lu den 31. Juli 2017 (gekuckt den 20. August 2017)