Verkéiersgebuetsschëld

E Verkéiersgebuetsschëld ass eng Vertikal Signalisatioun, déi e Gebuet uweist.

Zu Lëtzebuerg

Zu Lëtzebuerg ass et ëmmer e bloe Rondel mat bannendran engem wäisse Piktogramm.

Am Texte coordonné vum Lëtzebuerger Code de la Route, deen an engem Arrêté grand-ducal vum 23. November 1955 publizéiert an duerno e puermol geännert gouf, sinn d'Gebuetsschëlter am Kapitel V Voie publique, an der Sektioun IV De la signalisation routière am Artikel 107, ënner der Rubrik IV. SIGNAUX D'OBLIGATION beschriwwen:

	Bedeitung	Bezeechnung(en)
1	Obligatoresch Richtung	Schëld D, 1a
2	Gebuet fir z'ëmfueren	Schëld D, 2
3	Kräizung mat obligatoreschem Kreesverkéier	Schëld D, 3
4	Obligatoresche Vëloswee oder obligatoresch Vëlosspuer	Schëld D, 4 - Schëld D, 4a
5	Obligatoresche Foussgängerwee	Schëld D, 5
5a	Obligatoresche Wee fir Vëlosfuerer a Foussgänger	Schëld D, 5a - Schëld D, 5b
5b	Enn vum obligatoresche Foussgängerwee	Schëld D, 5c
5c	Enn vum obligatoresche Wee fir Vëlosfuerer a Foussgänger	Schëld D, 5aa - Schëld D, 5ba
6	Obligatoresche Wee fir Reider	Schëld D, 6
6a	Enn vum obligatoresche Wee fir Reider	Schëld D, 6a
7	Gebuet fir eng Mindestvitesse	Schëld D, 7
8	Enn vum Gebuet fir eng Mindestvitesse	Schëld D, 8
9	Gebuet fir Schnéiketten	Schëld D, 9
9a	Enn vum Gebuet fir Schnéiketten	Schëld D, 9a
10	Reservéiert Spuer fir Gefierer vum reegelméissegen ëffentlechen Transport	Schëld D, 10 - Schëld D, 10a
11	Reservéiert Spuer fir den Tram	Schëld D, 11 - Schëld D, 11a
12	Obligatoresch Richtung fir Gefierer déi geféierlech Gidder transportéieren	Schëld D, 12

Technesch Donnéeën

D'Verkéiersgebuetsschëlter si Rondele mat engem bloen Hannergrond a mat wäisse Symboler oder Opschrëften.

Nieft verschiddenen Ausnamen, muss den Duerchmiesser vun de Verkéiersgebuetsschëlter an den Uertschaften op d'mannst 500 mm sinn, baussent den Uertschaften op d'mannst 700 mm an op den Autobunnen op d'mannst 900 mm.

Opstelle vun de Schëlter

Gemenkerhand ginn d'Schëlter op der rietser Säit an der Fuerrichtung a baussent der Fuerbunn opgeriicht. Am Kader vun engem Schantje kënne verschidde Schëlter op der Fuerbunn selwer opgestallt ginn. D'Schëlter déi en Enn vun engem Gebuet uweisen, kënnen op der Récksäit vum Gebuetsschëld ubruecht ginn.

D'Verkéiersgebuetsschëlter ginn am Allgemenge baussent den Uertschafte vun der Bauverwaltung a bannent den Uertschafte vun der jeeweileger Gemengeverwaltung opgestallt.

Kuckt och

• Verkéiersschëlter aus dem lëtzebuergesche Code de la Route

Um Spaweck

Commons: Verkéiersgebuetsschëld – Biller, Videoen oder Audiodateien