Institut national pour le patrimoine architectural

Den Institut national pour le patrimoine architectural (INPA) gehéiert zu de Kulturinstituter vum Staat. Et gouf duerch d'Gesetz vum 25. Februar 2022 geschaf an ersetzt, resp. iwwerhëllt d'Aufgabe vum fréiere Service des sites et monuments nationaux (SSMN).

Institut national pour le patrimoine architectural
An dësem Gebai vun der Abtei Neimënster ass de Sëtz vum Institut national du patrimoine architectural
Institut national pour le patrimoine architectural
SSMN
Land	Lëtzebuerg
Secteur	Kultur
Leedung	Patrick Sanavia
Verwaltungssëtz	Lëtzebuerg
Adress	26, rue Münster L-2160 Lëtzebuerg
Ënnersteet der/dem	Ministère de la Culture
Gegrënnt	19. September 1977

Den Agank vum Gebai wou den INPA säi Sëtz huet

Unerkennung fir eng gutt Restauratioun

Geschicht

Déi éischt legislativ Virschrëften iwwer d'Erhalen an de Schutz vun den nationale Landschaften a Monumenter ginn op e Gesetz vum 12. August 1927 zeréck. De Grondsteen dozou hat d'Section historique vum Institut grand-ducal geluecht, där hire President d'Regierung Reuter mat engem Gesetzesvirprojet befaasst hat, fir sou e Gesetz zu Lëtzebuerg ze schafen. Als Basis dofir huet dat franséischt Gesetz iwwer d'historesch Monumenter vun 1913 (Loi du 31 décembre 1913 sur les monuments historiques) gedéngt. Am Gesetz vun 1927 gouf d'Commission des sites et monuments nationaux an d'Liewe geruff.

Den Zweete Weltkrich, besonnesch duerch Verwüüstungen an der Ardennenoffensiv, hat vill Schied un den nationale Monumenter hannerlooss. Dat huet mat sech bruecht datt an der ëffentlecher Meenung d'Bewosstsi fir den nationale Patrimoine opgefrëscht gouf.

Duerch e ministeriellt Reglement vum 13. Mee 1971 gouf ënner dem Kulturministère de Service des monuments historiques an d'Liewe geruff. Dee Service krut d'Aufgab fir d'Moossname fir de Schutz, den Ënnerhalt an d'Restauratioun vun historesche Monumenter auszeféieren.

De Service des sites et monuments nationaux ass duerch Gesetz vum 19. September 1977 gegrënnt ginn an huet de Service des monuments historiques ersat.

D'Gesetz vun 1977 gouf duerch d'Gesetz vum 8. Dezember 1988 iwwer d'Reorganisatioun vun de Kulturinstituter vum Staat ofgeschaaft an ersat. Dat neit Gesetz huet festgehalen datt d'Kulturinstituter vum Staat aus dem Service des sites et monuments nationaux, den Nationalarchiven, der Nationalbibliothéik, dem Nationalmusée fir Geschicht a Konscht an dem Nationalmusée fir Naturgeschicht bestinn.

De 25. Februar 2022 koum d'Gesetz iwwer de Kulturpatrimoine eraus, dat d'Aufgabe vu verschiddene Kulturinstituter vum Staat nei definéiert huet an ë. a. déi vum Institut national pour patrimoine architectural, dat de Service des sites et monuments nationaux ofléist.

Aufgaben

00	De Contenu vun dësem Kapitel oder dësem Artikel ass net vollstänneg oder net méi aktuell. Hëlleft wgl. mat, en ze komplettéieren oder nees op de leschte Stand ze bréngen.

Am Gesetz vum 25. Juni 2004 iwwer d'Reorganisatioun vun de Kulturinstituter vum Staat sinn am Artikel 7 d'Aufgabe vum Service des sites et monuments nationaux festgeluecht. Dës sinn, ë. a., d'Studéieren, d'Erhalen, d'Schützen an d'Opwäerte vum nationalen architektoneschen an industrielle Patrimoine, dorënner déi Gebaier an Objeten, déi op der Lëscht vun de klasséierte Monumenter stinn; d'Ausféieren an d'Iwwerwaache vu Reparaturen un de Gebaier an Objeten op där Lëscht; de Public duerch Campagnen, Konferenzen an Ausstellunge fir den Denkmalschutz an déi geschützte Gebaier an Objeten ze sensibiliséieren, asw.

Direkteren

• Alfred Steinmetzer (1971-1982)
• Georges Calteux (1982-2004)
• Christiane Steinmetzer (2004-2008)
• Patrick Sanavia (zanter 2008)

Literatur

• Mayer, Christina: Topographie der Baukultur des Großherzogtums Luxemburg. Kanton Echternach, Band 1, Ministère de la Culture, Service des sites et monuments nationaux, 2010, ISBN 978-2-495-15120-7
• Jochen Zenthöfer a verschidden Auteuren: Monumentum: respektvolle Erneuerung historischer Bausubstanz in Luxemburg und der Grossregion, Bd.1: Praktische Denkmalpflege, Sauvegarde du Patrimoine, 2013, 144 S., ISBN 978-999590002-1
• Jochen Zenthöfer a verschidden Auteuren: Monumentum: respektvolle Erneuerung historischer Bausubstanz in Luxemburg und der Grossregion, Bd.2: Handwerkskunse, Sauvegarde du Patrimoine, 2014, 160 S., ISBN 978-99959-0-062-5
• Jean-Claude Schumacher: Monuments historiques de l'industrie luxembourgeoise - Denkmäler Luxemburger Industriekulltur, Service des sites et monuments nationaux, 1997, 143 S., ISBN 2-919883-00-3

Um Spaweck

• Websäit vum Institut national pour le patrimoine architectural (fr)
• Loi du 12 août 1927, concernant la conservation et la protection des sites et monuments nationaux am Mémorial N° 48 vum 31. August 1927 S.651 - S. 658
• Règlement ministériel du 13 mai 1971 portant création d'un service des monuments historiques am Mémorial A - N° 35 vum 29. Mee 1971, S. 539
• Loi du 19 septembre 1977 portant création d'un Service des Sites et Monuments Nationaux am Mémorial A - N° 58 vum 6. Oktober 1977, S. 1788 - S. 1789
• Règlement grand-ducal du 17 septembre 1980 fixant les compétences du Service des Sites et Monuments nationaux créé par la loi du 19 septembre 1977 am Mémorial A - N° 69 vum 16. Oktober 1980
• Loi du 28 décembre 1988 portant réorganisation des instituts culturels de l´Etat am Mémorial A - N°71 vum 28. Dezember 1988, S. 1480 - 1492
• Loi du 25 juin 2004 portant réorganisation des instituts culturels de l'Etat am Mémorial A - N° 120 vum 15. Juli 2004, S. 1798 - S. 1810
• Von Bauernhausern, Gerbereien und Burgen Forum für Politik, Gesellschaft und Kultur