Radio Luxembourg

Dësen Artikel beschäftegt sech mat dem englesch-sproochege Radiossender. Fir den däitsche Sender, kuckt wgl. Radio Luxemburg (Die vier fröhlichen Wellen).

Radio Luxembourg (en) war eng lëtzebuergesch kommerziell englesch-sproocheg Radiosstatioun, déi vun 1933 bis 1992 fir d'Auditeuren aus Groussbritannien an aus Irland ausgestraalt gouf. Et war bis 1948, wéi op Mëttelwell (208 m) ëmgeschalt gouf, de stäerkste Laangwelle-Sender an Europa an am gréissten Deel vun Europa disponibel. De Radiossender huet zur RTL Group gehéiert.

Den Englänner Stephen Williams dee scho virdru bei der International Broadcasting Company a Radio Publicity geschafft hat, war den éischte Moderateur vu Radio Luxembourg an och den éischten Direkter. Sonndes, wa vun der BBC méi eescht a reliéis Sendungen ausgestraalt goufen, huet ronn d'Hallschent vun den engleschen Auditeuren dann op Radio Lëtzebuerg ëmgeschalt. Well et der BBC net erlaabt war Reklammen ze senden, gouf dat vu Radio Luxembourg gemaacht, sou datt RTL ee vun den éischte „kommerzielle Radiossendere“ war. Radio Luxembourg war bis 1967 déi eenzeg kommerziell Radiosstatioun op de Britteschen Inselen.

An de Joren 1950–70 war Radio Luxembourg mat senge Musekssendunge ganz beléift, a war souguer ee vun den notabele Promoteure vun der Rock-N-Roll-Musek.

An den 1980er Jore goung d'Popularitéit vun der Radiosstatioun zeréck a se war net méi profitabel. 1992 gouf se zougemaach.

Senderen

• Sender vun Housen
• Sender vu Jonglënster
• Dag- an Nuetssender vu Maarnech

Kuckt och

• RTL Radio Lëtzebuerg
• Radio Luxemburg (Die vier fröhlichen Wellen).
• Luxembourg Effect

Um Spaweck

• D'Fanpage (en)
• The Great 208 'Radio Luxembourg' op radiosoundsfamiliar.com (en)