Haaptmenü opmaachen
Fréiere Waassertuerm um Site, nationaalt Monument (Zousazinventaire).

Quartier Alzette ass en urbanistesche Projet, an de Gemenge Schëffleng an Esch-Uelzecht, bei deem d'Areal vun der fréierer Metze Schmelz (dono Arbed Esch-Schëffleng an ArcelorMittal Rodange et Schifflange), op deem tëscht 1870 an 2012 Eisen a Stol produzéiert a verschafft gouf, bis 2035 an en neie Quartier fir 12.000 Awunner ëmgewandelt soll ginn.

Inhaltsverzeechnes

GeschichtÄnneren

Nodeems et no iwwer 140 Joer mat den industriellen Aktivitéiten um Site (Schmelz, Walzwierk, Drotstrooss, Elektrostoluewen) 2012/13 fir zerguttst eriwwer war, huet d'ArcelorMittal, Proprietaire vum gréissten Deel vum Terrain[1], zesumme mat der Regierung an den zwou betraffene Gemengen 2016 e Memorandum of Understanding ënnerschriwwen, de Site nees ze beliewen. D'Agora, déi jee zur Hallschecht dem Staat an ArcelorMittal gehéiert, soll sech dorëms këmmeren.[2]

2017 huet eng Etüd festgestallt, datt dat Ganzt realisabel wier, an de Buedem ass net iwwerméisseg verknascht.[3] 2018 gouf e Concours ausgeschriwwen, fir e Gesamtplang z'entwerfen, bei deem 2019, vu véier Entwërf[4] de Projet vum däneschen Urbanistebüro Cobe Architects zréckgehale gouf.

De ProjetÄnneren

De Plang gesäit vir, nohaltege Wunnraum ze schafen, e Quartier vun de kuerze Weeër, deen un déi bestoend oder geplangt Schinnen- a Busreseauen agebonne soll sinn an dee mat Esch a Schëffleng gutt verbonne soll sinn. Dobäi sollb Wäert drop geluecht ginn, déi architektonesch Zeie vun der industrieller Vergaangenheet z'erhalen an/oder fir nei Zwecker ëmzebauen oder ze benotzen. D'Uelzecht an d'Dipbech, déi derduerch oder derlaanscht lafen, solle renaturéiert a mat de fréiere Killweieren an de Projet integréiert ginn.[5]

Am Ganze sollen op 62 Hektar bis 2030/35 12.000 Leit wunnen an der 7.000 schaffe kënnen. Ëm 2023/24 sollen déi éischt Louse verkaaft kënne ginn.[6]

BillerÄnneren

Zoustand 2019

LiteraturÄnneren

Um SpaweckÄnneren

Referenzen an NottenÄnneren

  1. Déi aner 10 % gehéieren dem Staat, ë. a. dem Fonds du rail.
  2. "Intro" op quartieralzette.lu (gekuckt 2019-06-22).
  3. Agora: "Rapport de synthèse des études environnementales et des diagnostics préalables." Septembre 2017.
  4. "Visionen für die Brache Esch/Schifflingen." wort.lu, 06.04.2019.
  5. "Leitfragen" op quartieralzette.lu.
  6. Hansen, 2019, an der Literatur.