Monolith

De Begrëff Monolith (griich. mono - eenzel~ a lithos - Steen) heescht souvill wéi "Eesteen". Bezeechent ginn domat gréisser Natursteng, wéi z. B. den Ayers Rock (Uluru) an Australien oder soss Objeten, déi aus engem Stéck bestinn.

De Stone Mountain am Stone Mountain Park, Georgia.

A bestëmmte Reliounen a Kulturen hu monolithesch Steng dacks eng reliéis oder kultesch Bedeitung.

Déi dräi gréissten natierlech Monolithe sinn:

1. Mount Augustus an Australien;
2. Uluru (Ayers Rock), am Outback an Australien;
3. Stone Mountain, bei Atlanta, Georgia, USA.

An der anticker Konscht ginn och déi Statuen, déi aus engem Stee gehae sinn, monolithesch genannt.

Iwwerdroe Bedeitung

Am iwwerdroene Sënn gëtt als monolithesch bezeechent, wat wéi aus engem Goss, also net zesummegesat oder aus verschiddene Stécker ass.

An der Ekonomie kennt een och de Begrëff monolithesch. D'Wirtschaftsstruktur ass monolithesch, wa s'op een eenzege Wirtschaftssecteur opgebaut ass. Dat war de Fall fir Lëtzebuerg, soulaang wéi d'Land bal ausschliisslech vun de Schmelzen ofgehaangen huet.