La 'question juive' au Luxembourg (1933-1941): L'Etat luxembourgeois face aux persécutions antisémites nazies

La 'question juive' au Luxembourg (1933-1941): L'Etat luxembourgeois face aux persécutions antisémites nazies, och bekannt als Rapport Artuso, no sengem Auteur Vincent Artuso, ass e Rapport, deen dësen am Kader vun engem Fuerschungsprojet, am Optrag vun der Lëtzebuerger Regierung, 2015 virgeluecht huet.

Doran analyséiert hien ë. a. d'Roll vun der Verwaltungskommissioun zu Lëtzebuerg an den éischte Méint vun der däitscher Besatzung 1940-1944/45.

Geschicht

De Sujet vun deem Fuerschungsprojet huet sech 2013 erausgeschielt, nodeems den Historiker Denis Scuto Lëschte vu jiddesche Schoulkanner publizéiert hat, déi d'Verwaltungskommissioun déi eenzel Gemengen oder Lycéeë gedoen hat, opzestellen. Den deemolege Premierminister Jean-Claude Juncker sot doropshin an enger Debatt^[Wou ?], et géif e "Flou" iwwer de Grad vu Kollaboratioun vun der Regierungskommissioun mam Gauleiter Gustav Simon senger Zivilverwaltung.

D'Uni Lëtzebuerg krut den Optrag, eng Recherche doriwwer ze maachen. De Vincent Artuso krut e Fuerschungsoptrag, an huet d'Resultat vu senge Recherchen an engem Ofschlossrapport am Februar 2015 virgestallt.

E kënnt zum Schluss, datt d'Verwaltungskommissioun an 3 Beräicher mat der däitscher antisemittescher Politik kollaboréiert huet: dem Identifizéiere vun de Judde beim Expulséieren aus dem ëffentlechen Déngscht, aus de fräie Beruffer an aus dem Schoulwiesen a bei der Zwangsenteegnung vun hirem Besëtz.^,

Rezeptioun

D'Reaktiounen op de Rapport ware vun de Medie gréisstendeels positiv. Sou huet d'Revue vun engem "Meilenstein" geschwat. D'Historiker Henri Wehenkel a Charles Barthel hunn, wann och aus ganz ënnerschidddleche Grënn, hir Bedenken ugemellt.

Ausbléck

Den 9. Juni 2015 huet d'Chamber eestëmmeg eng Resolutioun ugeholl, an där se sech bei der jiddescher Communautéit fir d'Verhale vun Deeler vun de Lëtzebuerger Verwaltunge virun a wärend dem Zweete Weltkrich entschëllegt huet. Déi Resolutioun huet sech op d'Conclusioune vum Artuso sengem Rapport gestäipt.

Text vun der Motioun, déi d'Chamber ugeholl huet:
« La Chambre des députés,
1. reconnaît et déplore profondément les souffrances infligées à la communauté juive, à ses membres luxembourgeois et étrangers, durant l’occupation nazie du Luxembourg;
2. exprime ses excuses à la communauté juive, alors que du fait des actes fautifs commis, la responsabilité de l'autorité publique luxembourgeoise se trouve engagée;
3. rappelle l'importance de poursuivre les recherches historiques, notamment dans le but de perpétuer le devoir de mémoire pour éviter l'oubli de faits dramatiques et marquants de notre Histoire;
4. prend l'engagement solennel de faire tout son possible afin que de telles atrocités ne puissent se reproduire, de continuer à défendre avec vigueur les droits de l'homme et de lutter contre toute forme d'antisémitisme, de racisme et de xénophobie. »

Och d'Regierung huet sech deenen Entschëllegungen ugeschloss.

Literatur

• La « question juive » au Luxembourg (1933-1941): L'Etat luxembourgeois face aux persécutions antisémites nazies. Rapport final remis au Premier ministre le 9 févirer 2015. Uni Lëtzebuerg, 2015. PDF Download bei rtl.lu; PDF-Download bei gouvernement.lu.
• La question juive au Grand-Duché ; in: woxx, Nr. 1210 (12/04/2013), Ss. 6-7 (ill.).
• Dépasser le mythe national; in: d'Lëtzebuerger Land, 11. November 2011