Kierch Dol

D'Kierch vun Dol ass eng kathoulesch Kierch, déi zur Par Öewersauer Saint-Pirmin, zum Dekanat Norden an zu der Gemeng Géisdref gehéiert.

Kierch vun Dol
Filialkierch vun Dol (2014) Filialkierch vun Dol (2014)
Uertschaft / Plaz	Dol
Par	Öewersauer Saint-Pirmin
Dekanat	Norden
Numm / Patréiner	Hl. Vinzenz
Konsekratioun	1869
Baujoer	1866
Koordinaten	49° 56’ 04.1’’ N       05° 58’ 17.1’’ O
Kierchen - Kapellen

Series pastorum a Chronik vun der Par Dol.

De Patréiner vun der Kierch ass den hellege Vinzenz, deem säi Fest den 22. Januar gefeiert gëtt. De Patréiner vum Duerf ass den hellegen Donatus.

Se steet an der Duerfstrooss, dem CR321A, op der Kräizung mat der Strooss Op der Heckt. Op der Südsäit nieft der Kierch steet e Kräiz (vun 1994) zur Erënnerung un de fréiere Kierfecht op där Plaz.

Geschicht

Déi éischt bekannt Kapell zu Dol, déi warscheinlech dem hellege Lambert geweit war, gouf 1523 an engem Dokument ernimmt. Well se baufälleg war gouf se am Joer 1737 ënner dem Paschtouer H. Severin duerch eng nei ersat, déi Plaz fir 200 Leit hat. 1808 gouf dës Kierch zur Parkierch ernannt.

1865 huet de Gemengerot enger Vergréisserung vun der Kierch zougestëmmt, soudatt d'Kierch an hirer haiteger Form 1866 fäerdeg gouf. Se gouf de 14. Juli 1869 vum Bëschof Nicolas Adames konsekréiert. Als Niewepatréiner gouf den hellege Jousef gewielt.

1929 ass ënner dem Paschtouer Logeling eng gréisser Renovéierung virgeholl ginn. Nom 2. Weltkrich gouf d'Kierch ënner dem Paschtouer Jos. Frisch nees opgebaut.

Bei der 100-Joerfeier de 4. Mee 1969 gouf den neie Kierfecht ageweit, dee virdrun nieft der Kierch war.

Bis de 7. Mee 2017 war d'Doler Kierch d'Parkierch vun der Par Dol, déi zum Parverband Öwersauer, Sankt Pirmin, zu der Pastoralregioun Norden an zum Dekanat Wolz gehéiert huet. Zur fréierer Par Dol huet ausser der Parkierch vun Dol och nach d'Remigiuskierch vun Nacher gehéiert.

Kuckt och

• Lëscht vu reliéise Gebaier zu Lëtzebuerg
• Lëscht vun de Lëtzebuerger Paren
• Lëscht vun de fréiere Lëtzebuerger Paren

Um Spaweck

Commons: Kierch Dol – Biller, Videoen oder Audiodateien

• Websäit vun der Par Öewersauer Saint-Pirmin
• D'Fënstere vun der Kierch vun Dol op der Websäit vun der Stiftung Forschungsstelle Glasmalerei des 20. Jh. e. V. (de)
• D'Kierch Dol an der Facebookgrupp Patrimoine religieux Luxembourg - Reliéisen Ierwen Lëtzebuerg ^[sic]

• 
  Aganksportal vun der Kierch vun Dol
• 
  Kräiz nieft der Kierch vun Dol zur Erënnerung un de fréiere Kierfecht