Kepler-22b

De Kepler-22b ass een äerdänlechen extrasolare Planéit dee ronderëm de sonnenänleche Stär Kepler-22 kreest.

Gréissteverglach Kepler-22b (kënschtleresch fräi Duerstellung) mat Planéiten aus eisem Sonnesystem

Entdeckung

De Planéit gouf mat Hëllef vum Kepler-Weltraumteleskop entdeckt. Dësen Teleskop zeechent Hellegkeetsschwankungen op, déi optrieden, wann e Planéit vun der Äerd aus gesinn, genee viru sengem Zentralstär laanschtzitt. Fir d'éischt gouf de Planéit schonn am Joer 2009 gesinn. Seng Entdeckung gouf awer eréischt de 5. Dezember 2011 no senger drëtter Observatioun, déi fir d'Bestätegung erfuerderlech war, geséchert, a publizéiert.

Eegenschaften

De Kepler-22b ëmkreest de sonnenänleche Stär Kepler-22, e G5-Stär, dee ronn 600 Liichtjoer vun der Äerd ewech ass. Fir en Ëmlaf brauch e ronn 290 Deeg. En huet ongeféier den 2,4-fachen Duerchmiesser vun der Äerd, also zirka 30.500 km. De Planéit ass an der habitabler Zon, an där prinzipiell äerdänlech Temperaturen an d'Existenz vu Waasser a flësseger Form méiglech sinn. Iwwer d'Uewerfläch oder eng eventuell Atmosphär vum Planéit ass nach näischt bekannt. D'Duerchschnëttstemperatur ass op 22 °C geschat ginn.

Et gëtt gehofft, beim nächsten Transit spektroskopesch Miessunge maachen ze kënnen.

Um Spaweck

Commons: Kepler-22b – Biller, Videoen oder Audiodateien

• Kepler-22 b an der Extrasolar Planets Encyclopaedia (ofgeruff de 6. Dezember 2011)
• Kepler-22b kepler.nasa.gov, (ofgeruff de 7. Dezember 2011)

Kuckt och

Portal Astronomie

• Lëscht vun Exoplanéiten
• Äerdänleche Planéit
• Exoplanéit