Catherine vu Siena
|
Dësen Artikel beschäftegt sech mat der Helleger Catherine vu Siena. Fir aner Helleger déi Catherine heeschen, kuckt wgl. Helleg Catherine. |
D'Helleg Catherine vu Siena, gebuer de 25. Mäerz 1347 zu Siena, gestuerwen den 29. Abrëll 1380 zu Roum, ass eng chrëschtlech Helleg a Mystikerin. Hiert Fest ass den 29. Abrëll.
| Catherine vu Siena | |
|---|---|
 Déi Helleg Catherine vu Siena op engem Bild an der Kierch Santa Maria del Rosario zu Roum | |
| Titel | |
| Titel | Ambassadeur |
| Biographie | |
| Gebuertsnumm | Caterina di Jacopo di Benincasa, Caterina di Jacopo di Benincasa |
| Gebuer |
25. Mäerz 1347 jul. Siena |
| Gestuerwen |
29. Abrëll 1380 jul. Roum |
| Doudesursaach | Hiereschlag |
| Aktivitéit |
Uerdensschwëster, Politiker, Philosoph, Diplomat, Schrëftsteller |
| Aner Informatiounen | |
| Statut | Hellegen (1461) |
| Gedenkdag | 29. Abrëll |
 | |
 | |
Liewen
ännerenD'Catherine gouf als e Kand an der adeleger Famill Benincasa gebuer. De Poopst huet zu där Zäit zu Avignon residéiert. Mat sechs oder siwe Joer hat si hir éischt Visioun, an där si wéi et schéngt de Jesus zesumme mat den Apostele Péitrus, Paulus a Johannes gesinn huet. Nach als jonkt Meedchen huet si versprach, fir ëmmer eng Jongfra ze bleiwen. Wéi hir Eltere si mat 12 Joer engem Mann versprieche wollten, huet si sech geweigert, hien ze bestueden.
1363, mat 16 Joer, ass d'Catherine engem Dominikaneruerde bäigetrueden, erëm géint de Wëlle vun hiren Elteren. Si huet am Gebiet zeréckgezu gelieft, bis eng nei Visioun hir kloer gemaach huet, datt si sech an den Déngscht vun den Aarme stellen a Kranker fleege sollt. Ausserdeem huet si ugefaangen, ëffentlech zu Froen, déi d'Kierchepolitik ugoungen, hir (dacks kritesch) Meenung ze soen, wat zu där Zäit virun allem fir Fraen ongewéinlech war. A Bréiwer un héichgestallt Perséinlechkeeten huet si fir eng grëndlech Reform vun der Kierch plädéiert. 1374 gouf si dowéinst virun eng Versammlung vu wichtege Representante vun hirem Uerden zitéiert, dann awer fräigesprach. Vun do un huet si am Optrag vun der Kierch däerfe reesen a priedegen.
Hir Reputatioun huet sech séier verbreet a vill Leit hu si ëm Rot gefrot, souguer de Poopst selwer. 1376 ass d'Catherine op Avignon gereest, fir den deemolege Poopst Gregor XI. z'iwwerzeegen, zeréck op Roum ze kommen. Wärend dem grousse Schisma huet si sech fir d'Eenheet vun der Kierch agesat.
Den 29. Abrëll 1380 ass si mat 33 Joer gestuerwen. Si gouf an der Dominikanerkierch Santa Maria sopra Minerva zu Roum begruewen.
Duerstellung
ännerenD'Catherine vu Siena gëtt gemenkerhand mat enger Dominikanertenue, engem (flamenden) Häerz, enger Stigmata, engem Rousekranz, oder engem Doudekapp duergestallt.
Veréierung
ännerenD'Catherine gouf:
- den 29. Juni 1461 vum Poopst Pius II. helleggesprach,
- den 8. Mäerz 1866 vum Poopst Pius IX. als Patréinesch vu Roum deklaréiert,
- den 18. Juni 1939 vum Pius XII. zur Patréinesch vun Italien ernannt,
- de 4. Oktober 1970 vum Poopst Paul VI. zur Kiercheléierin ernannt, an
- 1999 vum Poopst Jean Paul II. zur Patréinesch vun Europa erkläert.
Si gëtt als Patréinesch vun den Infirmieren, Wäschfraen, Parsekretärinnen, de Leit déi stierwen, de Laien an den Dominikaneruerden, als Preventioun géint Feier, géint Kappwéi a géint d'Pescht veréiert.