Guimarães

Guimarães (IPA: [gimɐ'ɾɐ̃ĩʃ]) ass eng Stad mat ronn 52.000 Awunner am Norde vu Portugal am Distrikt Braga. Si war déi éischt Haaptstad vum Land a gëtt dowéinst och Wéi vun der Natioun genannt.

Guimarães

Vue iwwer d'Stad

Land

Portugal

Regioun :

Norte

Ënnerregioun :

Ave

Distrikt :

Braga

Awunner :

52.181 Aw. (2006)

Koordinaten :

41° 26’ 34’’ N
08° 17’ 38’’ W

Lag vu Guimarães a Portugal

D'Alstad vu Guimarães gehéiert zum Weltierwe vun der UNESCO.

Geographie

Guimarães läit um Bord vun der Serra da Penha, eng 45 km nordëstlech vu Porto an eng 20 km südëstlech vu Braga.

Geschicht

960 soll do déi räich galizesch Gräfin Mumadona Dias eng Klouschterbuerg (Castelo de Vimaranes) baue gelooss hunn. Den Henri vun der Bourgogne huet d'Stad 1095 zu der Haaptstad vu senge Grofschafte gemaach an huet ronderëm den Tuerm vum Klouschter eng Buerg opriichte gelooss. Do gouf 15 Joer duerno säi Jong Alfonso I. (Afonso Henriques) gebuer.

No der Schluecht vu São Mamede, de 24. Juni 1128, gouf déi portugisesch Kinnigin Teresa entmuecht.

1140 huet den Alfonso, nodeem en d'Maure geklappt hat, Coimbra zu der éischter Haaptstad vu sengem neie Räich gemaach. 1143 huet Kastilien am Traité vun Zamora missen d'Onofhängegkeet vu Portugal unerkennen.

Am 15. Joerhonnert war Guimarães d'Residenz vun den Herzoge vu Bragança. 1853 huet Guimarães d'Stadrecht kritt.

Kultur a Kuckeswäertes

Guimarães gouf vum Conseil vun der Europäescher Unioun, zesumme mam sloweenesche Maribor, zu der Europäescher Kulturhaaptstad 2012 ausgeruff.

Muséeën

Zu den 3 dichtgegste Muséeën zu Guimarães zielen de Museu Alberto Sampaio (Sakral Konscht), de Museu de Arte Primitiva Moderna (Modern naiv Konscht) an de Museu da Socidedade Martins Sarmento.

Gebaier

Kuckeswäert si virun allem déi historesch Alstad, de Castelo d'Kierchen Igreja do São Miguel do Castelo, Igreja Nossa Senhora da Oliveira und Igreja dos Santos Passos an d'Palaisen Paço dos Duques de Bragança a Palácio de Vila Flor.

Castelo: Dës al romanesch Buerg gouf an der Mëtt vum 10. Joerhonnert op Uerder vun der galizescher Gréifin Mumadona gebaut, fir d'Stad an d'Klouschter virun Ugrëffer vun den Normannen an Araber ze schützen. De Buergfrid (Torre de Menagem) ass 27 m héich. De Salazar huet d'Buerg an den 1940er Jore renovéiere gelooss.
An der Capela São Miguel do Castelo nobäi, vum Ufank vum 12. Jh. gouf 1111 den éischte portugisesche Kinnek Afonso I. (Henriques) gedeeft. An er Entrée steet eng Kopie vum Dafsteen, d'Original ass an der Igreja de Nossa Senhora da Oliveira. Kuckeswäert sinn déi sëllege Grafplacken am Buedem.

Vue vum Castelo no Süden, riets vir d'Capela, lénks hannendrun de Palais.
D'Buergmaueren
Vue vu baussen
Capela São Miguel do Castelo

Paço Ducal (Paço dos Duques de Bragança): De Palais gouf ëm 1420 vum Afonso H. no franséischem Virbild am normannesch-burgundesche Stil gebaut.
D'Monument vum Afonso Henriques, net wäit ewech, gouf vum Sculpteur António Soares dos Reis 1887 geschaf.
De Largo do Brasil ass eng vun de schéinste Plazen an der Stad. op der Südostsäit steet d'barock Igreja dos Santos Passos vu 1769.

Paço Ducal
Paço Ducal
Monument fir den Afonso Henriques
Largo do Brasil
Igreja dos Santos-Passos

D'restauréiert Alstad besteet aus enger Abberzuel vu Gässelen, klenge Geschäfter a Konventer. Eng vun de schéinsten an eelste stroossen ass d'Rua de Santa Maria, déi vun der Buerg op d'Zentralplaz, de Largo da Oliveira ("Olivebamplaz") féiert.
Dat wichtegst Gebai um Largo da Oliveira ass d'Igreja de Nossa Senhora da Oliveira.
Am Kräizgank an an aneren Deeler vund er Kierchass zanter 1928 de Museo Alberto Sampaio installéiert, wou bedeitend Exponater aus Kierchen aus der Regioun ausgestallt ginn.
Den Alpendre ass eng quadratesch manuelinesch-gotesche Sailenhal. E steet zanter 1342 virum Westportal vun der Kierch.
Dat fréiert Stadhaus (antigos paços do conselho) aus dem 14. Jh., renovéiert Enn vum 17. Jh., steet vis-à-vis vun der Igreja de Nossa Senhora da Oliveira.

Strooss an der Alstad
Alpendre op dem Largo da Oliveira
Igreja de Nossa Senhora da Oliveira
Bannenhaff vum Museo Alberto Sampaio, fréiere Kräizgank
Fréiert Stadhaus (antigos paços do conselho)

Ekonomie

Zu Guimarães gëtt et virun allem Textil- a Schongindustrie.

Verkéier

Zanter 1884 ass Guimarães iwwr d'Linha de Guimarães op Porto un d'portugisescht Eisenbunnsnetz agebonnen. 2004 gouf d'Spur méi breet gemaach an elektrifizéiert. zanterhier gëtt et och eng Direktlinn op Lissabon.

Sport

Am Dom-Afonso-Henriques-Stadion vuum Foussballclub Vitória Guimarães mat 30.000 Sëtzplaze goufen e puer Matcher vun der Foussball-Europameeschterschaft 2004 gespillt.

Jumelagen

Guimarães ass jumeléiert mat

Compiègne, Frankräich, zanter 2004
Londrina, Brasilien, zanter 1987
Mé-Zóchi, São Tomé und Príncipe, zanter 1989
Brive-la-Gaillarde, Frankräich, zanter 1992
Igualada, Spuenien, zanter 1994
Tacoronte, Spuenien, zanter 1996
Rio de Janeiro, Brasilien, zanter 1998
Kaiserslautern, Däitschland, zanter 2000
Colonia del Sacramento, Uruguay, zanter 2000

Um Spaweck

Commons: Guimarães – Biller, Videoen oder Audiodateien