Eech zu Kaalmes

D'Eech zu Kaalmes, ass eng eng Summereech (Quercus robur; chêne pédonculé; Stieleiche), déi zu Kaalmes an der Gemeng Sëll, am Ausgank vum Duerf, nieft der gefaasster Quell Béik (och Béick geschriwwen) steet. Se zielt zënter 1981 zu de bemierkenswäerte Beem zu Lëtzebuerg.

Eech zu Kaalmes
D'Eech zu Kaalmes am Wanter (Februar 2024)
Kategorie	Bemierkenswäert Beem zu Lëtzebuerg
Land	Lëtzebuerg
Gemeng	Sëll
Plaz	Kaalmes
Adress	Am Sëllerlach
Koordinaten	49°43'29,60"N, 5°58'0,30"O
Bamaart	Stilleech
Geschaten Alter	300 Joer
Héicht	20,7 m (2023)
Duerchmiesser	1,25 m (2023)
Ëmfang	3,93 m (2023)

D'Eech zu Kaalmes. Riets déi gefaasste Quell. (Januar 2008).

D'Eech an d'Quell (Januar 2008).

Lokalisatioun

D'Eech steet beim Sëllerlach, am Flouer Brakegaart. Et fënnt ee se, wann een, vu Sëll hier, zu Kaalmes déi éischt Strooss no lénks, duerno, am Ausgank vum Duerf, de Wee no riets hëlt.

Beim Fouss vun der Eech entspréngt eng gefaasste Quell (Quell Béik), déi pro Dag ronn 1000 m³ Waasser ausschëtt, dat vun hei aus an den Drénkwaasser-Reservoir um Ditzebierg gepompelt gëtt. Zanter 1947 gehéiert dës Quell, mat der Eech, dem Waassersyndikat DEA. Ufanks der 1980er Joren huet de Syndikat d'Faassung vun der Quell komplett erneiert an eng Schutzzon ronderëm ugeluecht.

Entwécklung vum Bam

Den Alter vun dëser wéineg bekannter Eech gëtt op ronn 300 Joer geschat. Zur Säit vum Duerf hin ass de Stamm vum Buedem un, bis iwwer den éischten Aascht eraus opgerass.

Dem Ëmfang no ass dëse Bam déi drëttdéckst Eech, an den aachtdéckste Bam zu Lëtzebuerg (cf. Quell 2002).

Ongeféier Moosse vum Bam (m)

Joer	$U$	$d$	$h$
1980	5,55	1,77
≈2000	5,84	1,87	25,00
2023	3,93	1,25	20,70

Fotoalbum

• 
  Op béid Säite vum Wee: d'Quelleschutzzon (Abrëll 2009)
• 
  En Deel vum Duerf vun der Eech aus gesinn
• 
  De Stamm vun der Eech
• 
  Opfälleg Schuelemuster

Kuckt och

• Aner bemierkenswäert Beem an der Gemeng Sëll:
  • Eech zu Sëll
  • Allee tëscht Bruch a Sëll
  • Dräidar zu Iener
• Bemierkenswäert Beem zu Lëtzebuerg

Quellen

• Murat, Danièle et al. Les arbres remarquables du Grand-Duché de Luxembourg. [3^e parution revue et adaptée]. Diekirch: ANF, 2023. Print. ISBN 978-2-9199474-3-0 (Eech zu Kaalmes: S. 102-103, Text a Foto).

• Sinner, J. et al., 2002. Les arbres remarquables. Administration des eaux et forêts. Musée national d'histoire naturelle. 255 S. (Eech zu Kaalmes: S. 26-27, Text a Foto).
• Administration des eaux et forêts, 1981. Arbres remarquables du Grand-Duché de Luxembourg. Imprimerie Saint-Paul, 167 S. (Cf. S. 22-23, Foto an Text).

Um Spaweck

Commons: Eech zu Kaalmes – Biller, Videoen oder Audiodateien

• Websäit vum Syndicat de distribution d'eau des Ardennes (DEA)